IND vs AFG: உலக டெஸ்ட் சாம்பியன்ஷிப் பைனலுக்கு இந்தியா தகுதி பெறுமா? கம்பீர் சொன்ன பதில்

சந்திகார்: ஐசிசி உலக டெஸ்ட் சாம்பியன்ஷிப் தரவரிசையில் இந்தியா தற்போது ஆறாவது இடத்தில் உள்ளது. தரவரிசைப் பட்டியலில் ஆஸ்திரேலியா முதலிடத்தில் நீடிக்கிறது. கடந்த மூன்று சைக்கிளில் இருமுறை இறுதிப் போட்டிக்குத் தகுதி பெற்ற போதிலும், நடப்பு சைக்கிளில் இந்தியா மிகவும் கடினமான சூழலை எதிர்கொள்கிறது. இதுவரை விளையாடிய போட்டிகளில் நான்கு டெஸ்ட் தோல்விகளைச் சந்தித்த நிலையில், இறுதிப் போட்டிக்கான வாய்ப்பைத் தக்கவைக்க அணி மிகுந்த போராட்டத்தை முன்னெடுக்க வேண்டிய கட்டாயத்தில் உள்ளது.

இருப்பினும், இந்திய அணியின் தலைமைப் பயிற்சியாளர் கவுதம் கம்பீர் தனது வீரர்களின் திறமை மீது முழு நம்பிக்கை கொண்டுள்ளார். அணி சந்தித்த பின்னடைவுகளைத் தாண்டி, இறுதிப் போட்டியை எட்டும் திறன் இந்த அணிக்கு உண்டு என அவர் தெரிவித்தார். அணியின் ஆழமும், வீரர்களின் திறனும் இழந்த இடத்தை மீட்டெடுக்க போதுமானது என்பதில் அவர் உறுதியாக இருக்கிறார்.

இந்த சைக்கிளில் ஆரம்பத்தில் இங்கிலாந்துக்கு எதிரான தொடரை 2-2 என சமன் செய்த இந்தியா, அதன்பின் வெஸ்ட் இண்டீஸை 2-0 என வீழ்த்தி ஆதிக்கம் செலுத்தியது. ஆனால், கடந்த நவம்பரில் தென்னாப்பிரிக்காவிடம் சந்தித்த தொடர் தோல்வி, அணியின் தரவரிசைப் புள்ளிகளைப் பெருமளவு பாதித்தது. தற்போது இந்தியா 48.15 சதவீத வெற்றி புள்ளிகளை (PCT) பெற்று ஆறாவது இடத்தில் உள்ளது. முதலிடத்தில் ஆஸ்திரேலியாவும், அடுத்தடுத்த இடங்களில் நியூசிலாந்து மற்றும் தென்னாப்பிரிக்காவும் வலுவாக உள்ளன.

IND vs AFG: இந்திய அணியின் பிளேயிங் லெவன் என்ன? ஆகாஷ் சோப்ரா கணிப்பு

இது குறித்து செய்தியாளர்களிடம் பேசிய கம்பீர், "பாருங்கள், நாங்கள் எப்போதும் நம்பிக்கையுடன்தான் இருக்கிறோம். உலக டெஸ்ட் சாம்பியன்ஷிப் இறுதிப் போட்டிக்குத் தகுதி பெறும் வாய்ப்பு இருக்கும் வரை, நாங்கள் நம்பிக்கையுடன் இருப்போம். எங்களிடம் இருக்கும் திறமை மற்றும் தரம் மீது அதீத நம்பிக்கை உள்ளது. எங்களால் உலக டெஸ்ட் சாம்பியன்ஷிப் பட்டத்தை வெல்ல முடியாது என்று நினைக்க எந்த காரணமும் இல்லை," எனக் குறிப்பிட்டார்.

மேலும் அவர், "அறையில் அமர்ந்திருக்கும் அனைவருமே இதைத்தான் நம்புகிறார்கள். அவ்வப்போது ஒன்று அல்லது இரண்டு மோசமான தொடர்கள் அமையலாம், ஆனால் வீரர்களிடம் இருக்கும் வேட்கையும், திறமையும் எங்களுக்குத் தெரியும்," என்று தெரிவித்தார். இறுதிப் போட்டியை இந்தியா எட்டுமா என்பது தற்போது பெரிய கேள்வியாக உள்ளது.

IND vs AFG: இந்திய டெஸ்ட் அணியில் 3வது வீரராக களமிறங்க போவது யார்? கம்பீர் விளக்கம்

இலங்கையில் இரண்டு டெஸ்ட், நியூசிலாந்தில் இரண்டு டெஸ்ட் மற்றும் உள்நாட்டில் ஆஸ்திரேலியாவுக்கு எதிராக ஐந்து போட்டிகள் என இன்னும் ஒன்பது டெஸ்ட் போட்டிகள் எஞ்சியுள்ளன. தகுதி வாய்ப்பைத் தக்கவைக்க, இந்தியா தனது எஞ்சிய ஒன்பது போட்டிகளில் குறைந்தது ஏழில் வெற்றி பெற வேண்டிய கட்டாயத்தில் உள்ளது. நியூசிலாந்தில் இந்தியா கடைசியாக 2009-ல் மட்டுமே வெற்றி பெற்றுள்ள நிலையில், அங்கு நடக்கவிருக்கும் போட்டிகள் இந்திய அணிக்குப் பெரும் சவாலாக அமையும்.