IND vs AFG: விராட் கோலி நீக்கம்.. அவரது இடத்தில் ஆடப் போவது யார்? இந்திய அணியில் ஏற்பட்ட குழப்பம்

மும்பை: ஆப்கானிஸ்தான் அணிக்கு எதிரான ஒருநாள் தொடரில் இந்திய அணியின் மூன்றாம் வரிசையில் ஆடப் போவது யார்? என்ற கேள்வி எழுந்துள்ளது. விராட் கோலி காயம் காரணமாக இந்தத் தொடரில் இருந்து விலகிய நிலையில் இரு வீரர்களுக்கு இடையே அந்த இடத்தை பிடிக்க போட்டி உள்ளது.

இந்தியா மற்றும் ஆப்கானிஸ்தான் அணிகளுக்கு இடையிலான 3 போட்டிகள் கொண்ட ஒருநாள் கிரிக்கெட் தொடர் வரும் ஜூன் 13ஆம் தேதி தொடங்குகிறது. 2027 ஒருநாள் உலகக் கோப்பைக்கான இந்திய அணியின் தயாரிப்புகள் இந்த தொடரில் இருந்தே ஆரம்பமாக உள்ளதால், இப்போட்டி குறித்து ரசிகர்களிடையே பெரும் எதிர்பார்ப்பு எழுந்துள்ளது.

கடந்த ஜனவரி 2026க்கு பிறகு இந்திய அணி மீண்டும் 50 ஓவர் போட்டிகளில் விளையாட உள்ளது. கடைசியாக விளையாடிய தொடரில் தென்னாப்பிரிக்காவுக்கு எதிராக இந்திய அணி 1-2 என்ற கணக்கில் தோல்வியை சந்தித்திருந்தது. இந்நிலையில் முழு பலத்துடன் ஆப்கானிஸ்தானை எதிர்கொள்ள இந்திய அணி தயாராகி வருகிறது.

2026 ஐபிஎல் தொடரின் போது காயமடைந்த நட்சத்திர பேட்ஸ்மேன் விராட் கோலிக்கு பல வாரங்கள் ஓய்வு அளிக்கப்பட்டுள்ளது. இதனால் அவர் இந்த ஆப்கானிஸ்தான் தொடரில் விளையாடவில்லை. அவருக்கு மாற்று வீரராக இளம் அதிரடி பேட்ஸ்மேன் யஷஸ்வி ஜெய்ஸ்வால் அணியில் சேர்க்கப்பட்டுள்ளார். தற்போது ஆடும் லெவன் அணியில் விராட் கோலி வழக்கமாக விளையாடும் 3வது இடத்தில் யாரை களமிறக்குவது என்பதில் அணி நிர்வாகத்திற்கு பெரும் குழப்பம் ஏற்பட்டுள்ளது.

யஷஸ்வி ஜெய்ஸ்வால் இதுவரை 4 ஒருநாள் போட்டிகளில் மட்டுமே விளையாடி 57 சராசரியுடன் 171 ரன்கள் எடுத்துள்ளார். அடிப்படையில் அவர் ஒரு தொடக்க வீரர். தற்போது ரோஹித் சர்மா அணிக்கு திரும்பியுள்ளதால் தொடக்க வீரருக்கான இடம் காலியாக இல்லை. மேலும், ஜெய்ஸ்வால் ஒருநாள் போட்டிகளில் 3வது இடத்தில் பேட்டிங் செய்த அனுபவம் இல்லாதவர்.

இந்த சூழ்நிலையில், அந்த 3வது இடத்திற்கு ஜெய்ஸ்வாலுக்கு முக்கிய போட்டியாளராக அதிரடி பேட்ஸ்மேன் இஷான் கிஷன் உருவெடுத்துள்ளார். இடதுகை பேட்ஸ்மேனான இவர், தான் விளையாடிய 28 ஒருநாள் போட்டிகளில் 4 முறை 3வது இடத்தில் களமிறங்கி விளையாடியுள்ளார். கடைசியாக 2023ஆம் ஆண்டு ஒருநாள் போட்டியில் விளையாடிய இஷான் கிஷன், இதுவரை 27 இன்னிங்ஸ்களில் விளையாடி 1 சதம் மற்றும் 7 அரைசதங்கள் உட்பட 933 ரன்கள் குவித்துள்ளார். இவரது அதிகபட்ச ஸ்கோர் 210 ரன்கள் ஆகும். இவரது பேட்டிங் சராசரி 42.40 மற்றும் ஸ்ட்ரைக் ரேட் 102.19 என சிறந்த நிலையிலேயே உள்ளது.

“ரோஹித் சர்மா கொடுத்த டிப்ஸை இந்திய அணிக்கு எதிராகவே பயன்படுத்துவேன்” - ஆப்கன் ஸ்பின்னர் கசான்பர்

இதனால், 3வது இடத்தில் களமிறங்க யஷஸ்வி ஜெய்ஸ்வாலுக்கு வாய்ப்பு கிடைப்பது தற்போது சற்று கடினமாகவே பார்க்கப்படுகிறது. கோலியின் இடத்தை நிரப்பப் போவது யார் மற்றும் அணியின் பந்துவீச்சு கூட்டணி எப்படி இருக்கப் போகிறது என்பது போன்ற பல சிக்கலான கேள்விகளுக்கு விடையளிக்க வேண்டிய கட்டாயத்தில் இந்திய அணி நிர்வாகம் உள்ளது.