பண்டியாவாக மாறிய தோனி.. அந்த 14 பந்துகள்.. பழைய நினைவுகளுக்கு போன ரசிகர்கள்!!

ரன் ரேட் திட்டம்

இந்தியா முதலில் பேட்டிங் ஆடிய போது, தவான் சதமும், ரோஹித் அரைசதமும் அடிக்க, இந்தியா நல்ல நிலையில் இருந்தது, களத்தில் கோலி இருந்தார். அதனால், உடனடியாக ரன் ரேட்டை ஏற்ற வேண்டும் என்ற நிலையில், ஹர்திக் பண்டியா, ராகுல் மற்றும் தோனியை முந்திக் கொண்டு களமிறங்கினார்.

பண்டியா அபாரம்

இந்த நேரத்தில் தோனி இறங்கினால் தான் சரியாக இருக்கும் என சிலர் கூறினாலும், பண்டியா 27 பந்துகளில் 48 ரன்கள் குவித்து தான் முன்னே இறங்கியது சரிதான் என நிரூபித்தார்.

உள்ளே வந்த தோனி

அவர் கடைசி 5 ஓவர்கள் இருக்கும் போது ஆட்டமிழந்தார். இப்போது யாரை களமிறக்குவார் கோலி, என காத்துக் கொண்டு இருந்த போது தோனி பெரும் வரவேற்புடன், உள்ளே வந்தார்.

அதிரடி ஆட்டம்

தோனி வெறும் 14 பந்துகள் மட்டுமே சந்தித்தார். அதில் 1 சிக்ஸ், 3 ஃபோர் அடித்து 27 ரன்கள் குவித்து ஆட்டமிழந்தார். உண்மையில், நீண்ட காலமாக ஹர்திக் பண்டியா கடைசி 5 ஓவர்கள், 10 ஓவர்கள் இருக்கும் போது களமிறங்கி அதிரடியாக ரன் குவித்து ஆட்டமிழப்பார்.

பண்டியாவாக மாறிய தோனி

அவரது இடத்தை எடுத்துக் கொண்ட தோனி, பண்டியாவாகவே மாறி அதிரடி ஆட்டம் ஆடினார். இதைப் பார்த்த போது, தோனியின் துவக்க நாட்கள் நினைவுக்கு வந்தது. கங்குலி தோனியை அறிமுகம் செய்த போது சில போட்டிகள் வரை அவர் 6, 7 ஆகிய இடங்களில் தான் ஆடி வந்தார்.