IND vs AUS: கம்பீர் ஆதிக்கத்துக்கு எதிராக கோலி ட்விட்டர் பதிவு.. ஆஸ்திரேலிய தொடருக்கு முன் மோதல்

மும்பை: இந்திய கிரிக்கெட் ஜாம்பவான் விராட் கோலி, தனது சமூக வலைதளப் பதிவின் மூலம், பயிற்சியாளர் கம்பீருக்கு சூசகமாக ஒரு செய்தியை அனுப்பியுள்ளார். விராட் கோலியை ஆஸ்திரேலிய தொடருடன் ஓரங்கட்ட முயற்சி நடந்து வரும் நிலையில், "நான் இன்னும் கைவிடவில்லை; என் ஆட்டம் முடியவில்லை," என்பதை உரக்கச் சொல்லி இருக்கிறார்.

இந்திய கிரிக்கெட்டில் அதிகார மையம் கௌதம் கம்பீரின் கையில் சென்றுள்ளது. அவரது சகாப்தம் தொடங்கியுள்ளது. இளம் வீரர்களுக்கு முக்கியத்துவம், விராட் கோலி, ரோஹித் சர்மா போன்ற சீனியர்களுக்கு அழுத்தம் என அணி நிர்வாகத்தின் அணுகுமுறை மாறியுள்ள நிலையில், விராட் கோலியின் இந்த முக்கிய பதிவு வெளியாகி உள்ளது.

கௌதம் கம்பீர் இந்திய அணியின் தலைமைப் பயிற்சியாளராகப் பொறுப்பேற்றதிலிருந்தே, அணியில் பல மாற்றங்கள் நிகழ்ந்து வருகின்றன. இளம் வீரர்களுக்கு அதிக வாய்ப்புகள் வழங்கப்படுவதும், ரோஹித் சர்மா, விராட் கோலி போன்ற சீனியர் வீரர்களின் எதிர்காலம் குறித்த விவாதங்கள் தீவிரமடைந்திருப்பதும் வெளிப்படையாகத் தெரிகிறது.

டெஸ்ட் மற்றும் டி20-யிலிருந்து கோலி ஏற்கனவே ஓய்வு பெற்றுவிட்ட நிலையில், அவரது ஒருநாள் (ODI) எதிர்காலமும், குறிப்பாக 2027 உலகக் கோப்பையில் அவரது பங்கு குறித்தும் கேள்விகள் எழுப்பப்பட்டு வருகின்றன. இந்தச் சூழலில், ஆஸ்திரேலியாவுக்கு எதிராக நடைபெற உள்ள ஒருநாள் தொடர், கோலியின் எதிர்காலத்தைத் தீர்மானிக்கும் ஒரு தொடராகவே பார்க்கப்படுகிறது.

கோலியின் பதிலடி!

இந்த அழுத்தமான சூழலுக்கு மத்தியில், நீண்ட இடைவெளிக்குப் பிறகு அணிக்குத் திரும்பும் விராட் கோலி, தனது ட்விட்டர் (X) பக்கத்தில், ஒரு குறியீட்டுப் பதிவை வெளியிட்டுள்ளார்: "The only time you truly fail, is when you decide to give up." ("நீங்கள் எப்போது கைவிட முடிவு செய்கிறீர்களோ, அப்போதுதான் நீங்கள் உண்மையாகத் தோற்கிறீர்கள்")

சாதாரணமாகப் பார்த்தால், இது ஒரு உத்வேகம் தரும் மேற்கோள் மட்டுமே. ஆனால், இந்திய கிரிக்கெட்டின் தற்போதைய சூழலில், இந்தப் பதிவு ஒரு நேரடி பதிலடியாகவே பார்க்கப்படுகிறது. "புதிய நிர்வாகம் அழுத்தம் கொடுக்கலாம், விமர்சகர்கள் என் ஓய்வு குறித்துப் பேசலாம், ஆனால் நான் கைவிடத் தயாராக இல்லை. என்னை அவ்வளவு எளிதில் ஓரங்கட்டிவிட முடியாது," என்று கம்பீர் தலைமையிலான நிர்வாகத்திற்கு கோலி அனுப்பியுள்ள மறைமுக செய்தியாகவே இது கருதப்படுகிறது.

வார்த்தைகள் மட்டுமல்ல, செயலும் இருக்கிறது! - தினேஷ் கார்த்திக் உறுதி

கோலியின் இந்த வார்த்தைகள் வெறும் வார்த்தைகள் அல்ல, அதற்குப் பின்னால் கடின உழைப்பும் உள்ளது என்பதற்கு அவருடன் நெருக்கமாக இருக்கும் தினேஷ் கார்த்திக் அளித்த சமீபத்திய பேட்டி சான்றாக அமைந்துள்ளது. "அவர் (கோலி) 2027 உலகக் கோப்பையில் விளையாட ஆர்வமாக இருக்கிறார். சமீபத்தில் லண்டனில் இருந்தபோது கூட, அவர் வாரத்திற்கு 2-3 முறை கிரிக்கெட் பயிற்சி செய்து கொண்டிருந்தார். 2027 உலகக் கோப்பையில் விளையாடுவதில் அவர் தீவிரமாக இருக்கிறார்" என்று தினேஷ் கார்த்திக் உறுதியாகத் தெரிவித்துள்ளார்.

இது, கோலி தனது எதிர்காலத்திற்காக, குறிப்பாக கம்பீரின் புதிய சகாப்தத்தில் தனது இடத்தைத் தக்கவைத்துக் கொள்வதற்காக, எவ்வளவு தீவிரமாகத் தயாராகி வருகிறார் என்பதைக் காட்டுகிறது.

களத்தில் பதிலடி கொடுக்கத் தயாராகும் 'கிங்'

ஒருபுறம் மர்மமான பதிவு, மறுபுறம் நண்பரின் உறுதிமொழி என கோலியைச் சுற்றி பரபரப்பு பற்றிக்கொண்டுள்ளது. ஒரு காலத்தில் இந்திய கிரிக்கெட்டைத் தனது ஆதிக்கத்தின் கீழ் வைத்திருந்த கோலி, இப்போது புதிய அதிகார மையத்தின் கீழ் தனது இடத்திற்காகப் போராட வேண்டிய நிலைக்குத் தள்ளப்பட்டுள்ளார்.

இந்தச் சூழலில், ஆஸ்திரேலியாவுக்கு எதிரான தொடர், வெறும் கிரிக்கெட் போட்டியாக மட்டும் இல்லாமல், கோலியின் எதிர்காலத்தை நிர்ணயிக்கும் ஒரு போர்க்களமாக மாறியுள்ளது. கம்பீரின் புதிய சகாப்தத்தில் தனது இடத்தைத் தக்கவைக்க, கோலியின் பேட் ஆஸ்திரேலிய மண்ணில் என்ன பதில் சொல்லப் போகிறது என்பதைப் பார்க்க ஒட்டுமொத்த கிரிக்கெட் உலகமும் ஆவலுடன் காத்திருக்கிறது.