"ஆஸ்திரேலியாவில் துவைத்து விடுவார்கள்.. கம்பீரின் செல்லப் பிள்ளை”.. கிழித்து தொங்கவிட்ட ஸ்ரீகாந்த்

மும்பை: இந்திய கிரிக்கெட் அணியின் ஆஸ்திரேலிய சுற்றுப்பயணத்திற்கான ஒருநாள் மற்றும் டி20 அணிகள் அறிவிக்கப்பட்டதிலிருந்தே, அதுகுறித்த விவாதங்களும் சூடுபிடிக்கத் தொடங்கியுள்ளன. இந்திய அணியின் முன்னாள் கேப்டனும், 1983 உலகக் கோப்பை நாயகனுமான கிருஷ்ணமாச்சாரி ஸ்ரீகாந்த், தனது வழக்கமான அதிரடி பாணியில் அணித் தேர்வு குறித்து சரமாரியாகக் கேள்விகளை எழுப்பியுள்ளார். குறிப்பாக, இளம் வேகப்பந்து வீச்சாளர் ஹர்ஷித் ராணாவை, புதிய தலைமைப் பயிற்சியாளர் கௌதம் கம்பீரின் "செல்லப் பிள்ளை" என்று அவர் கிண்டலாக விமர்சித்தது சலசலப்பை ஏற்படுத்தியுள்ளது.

தனது யூடியூப் சேனலில் அணித் தேர்வு குறித்துப் பேசிய ஸ்ரீகாந்த், ஹர்ஷித் ராணாவின் தொடர்ச்சியான தேர்வு குறித்து நகைச்சுவையாகக் குறிப்பிட்டார். "ஹர்ஷித் ராணா அணியில் ஒரு நிரந்தர வீரர். ஏனென்றால் அவர் கௌதம் கம்பீரின் செல்லப் பிள்ளை. கேப்டன் சுப்மன் கில்லுக்குப் பிறகு, அணித் தாளில் எழுதப்படும் முதல் பெயர் அவருடையதாகத்தான் இருக்கும்" என்று ஸ்ரீகாந்த் கிண்டலாகக் கூறினார்.

டெல்லியைச் சேர்ந்த வேகப்பந்து வீச்சாளரான ஹர்ஷித் ராணா, ஐபிஎல் தொடரில் கொல்கத்தா நைட் ரைடர்ஸ் அணிக்காக கௌதம் கம்பீரின் வழிகாட்டுதலின் கீழ் சிறப்பாகச் செயல்பட்டார். இந்த ஆண்டு இங்கிலாந்துக்கு எதிராக ஒருநாள் போட்டியில் அறிமுகமான அவர், தற்போது ஜஸ்பிரித் பும்ராவுக்கு ஓய்வளிக்கப்பட்ட நிலையில், ஒருநாள் அணியில் தனது இடத்தைத் தக்கவைத்துக் கொண்டுள்ளார். கம்பீர் பயிற்சியாளராகப் பொறுப்பேற்ற பிறகு, ராணாவுக்குத் தொடர்ந்து வாய்ப்புகள் வழங்கப்படுவது குறிப்பிடத்தக்கது.

"நிதீஷ் குமார் ரெட்டி எதற்கு? தேவையற்ற தேர்வு!"

ஹர்ஷித் ராணா குறித்த தனது கருத்தை நகைச்சுவையாக முன்வைத்த ஸ்ரீகாந்த், ஆல்-ரவுண்டர் நிதீஷ் குமார் ரெட்டியின் தேர்வு குறித்து தனது கடுமையான அதிருப்தியை வெளிப்படுத்தினார். ஒருநாள் அணியில் நிதீஷ் குமார் சேர்க்கப்பட்டது தேவையற்றது என்று அவர் சாடினார். "நிதீஷ் குமார் ரெட்டி எங்கிருந்து திடீரென வந்தார்? அவர்களிடம் கேட்டால், ஹர்திக் பாண்டியாவின் மாற்று வீரர் என்பார்கள். ஆனால், ஹர்திக்கிற்கு உண்மையான மாற்று வீரர் ரவீந்திர ஜடேஜாதான், நிதீஷ் குமார் ரெட்டி அல்ல" என்று ஸ்ரீகாந்த் காட்டமாகத் தெரிவித்தார்.

மேலும் அவர் கூறுகையில், "நிதீஷ் குமார் ரெட்டியை ஆஸ்திரேலிய ஆடுகளங்களில் அடித்துத் துவைத்து விடுவார்கள். அவரை ஒரு ஆல்-ரவுண்டராகத் தேர்வு செய்வது நியாயமற்றது. அவர் ஓரளவிற்குப் பந்துவீசக்கூடிய ஒரு பேட்ஸ்மேன் மட்டுமே. அவர் சாம்பியன்ஸ் டிராபி அணியிலோ அல்லது ஒருநாள் போட்டிகளுக்கான திட்டத்திலோ கூட இதற்கு முன் இருந்ததில்லை. எப்படியோ அவரை அணியில் திணித்துவிட்டார்கள்" என்று கடுமையாக விமர்சித்தார்.

இருப்பினும், நிதீஷ் குமார் ரெட்டிக்கு ஆஸ்திரேலிய மண்ணில் விளையாடிய அனுபவம் உள்ளது. 2024-25 பார்டர்-கவாஸ்கர் டிராபி தொடரின் போது, அவர் தனது டெஸ்ட் அறிமுகத்தை ஆஸ்திரேலியாவில் நிகழ்த்தினார். அந்த அனுபவத்தைக் கருத்தில் கொண்டு தேர்வுக் குழுவினர் அவருக்கு வாய்ப்பளித்திருக்கலாம்.

ஸ்ரீகாந்தின் இந்தக் கருத்துகள், கம்பீரின் வருகைக்குப் பிறகு, குறிப்பிட்ட வீரர்களுக்கு அதிக முக்கியத்துவம் அளிக்கப்படுகிறதா என்ற கேள்வியை எழுப்பியுள்ளது. ஆஸ்திரேலியத் தொடரில் இந்த இளம் வீரர்களின் செயல்பாட்டை வைத்துத்தான் தேர்வுக் குழுவின் முடிவுகள் சரியா, தவறா என்பதைத் தீர்மானிக்க முடியும்.