IND vs AUS: இந்தியாவுக்கு எதிரான ஆஸ்திரேலிய ஒருநாள், டி20 அணி அறிவிப்பு.. ஸ்டார்க், மேக்ஸ்வெல் நிலை?

சிட்னி: இந்திய அணிக்கு எதிரான ஒருநாள் மற்றும் டி20 தொடருக்கான தங்களது அணிகளை கிரிக்கெட் ஆஸ்திரேலியா அறிவித்துள்ளது. பெரும் எதிர்பார்ப்புக்கு மத்தியில் வெளியாகியுள்ள இந்த அணித் தேர்வில், நட்சத்திர வேகப்பந்து வீச்சாளர் மிட்செல் ஸ்டார்க் மீண்டும் அணிக்குத் திரும்பியிருப்பது இந்திய அணிக்கு எச்சரிக்கை மணியாக அமைந்துள்ளது. அதே சமயம், அதிரடி ஆல்-ரவுண்டர் கிளென் மேக்ஸ்வெல் காயம் காரணமாக இடம்பெறாதது, ஆஸ்திரேலியாவுக்குப் பெரும் பின்னடைவாகப் பார்க்கப்படுகிறது.

வரும் அக்டோபர் 19-ம் தேதி பெர்த்தில் தொடங்கும் இந்தியாவுக்கு எதிரான ஒருநாள் தொடருக்கான ஆஸ்திரேலிய அணியில், பல முக்கிய மாற்றங்கள் செய்யப்பட்டுள்ளன.

இந்தியாவுக்கு எதிரான ஆஸ்திரேலிய ஒருநாள் அணி:

மிட்செல் மார்ஷ் (கேப்டன்), சேவியர் பார்ட்லெட், அலெக்ஸ் கேரி, கூப்பர் கொனோலி, பென் ட்வார்ஷூயிஸ், நாதன் எல்லிஸ், கேமரூன் கிரீன், ஜோஷ் ஹேசில்வுட், டிராவிஸ் ஹெட், ஜோஷ் இங்லிஸ், மிட்செல் ஓவன், மேத்யூ ரென்ஷா, மேத்யூ ஷார்ட், மிட்செல் ஸ்டார்க், ஆடம் ஜாம்பா.

இந்தியாவுக்கு எதிரான ஆஸ்திரேலிய டி20 அணி (முதல் இரண்டு போட்டிகளுக்கு):

மிட்செல் மார்ஷ் (கேப்டன்), சீன் அபோட், சேவியர் பார்ட்லெட், டிம் டேவிட், பென் ட்வார்ஷூயிஸ், நாதன் எல்லிஸ், ஜோஷ் ஹேசில்வுட், டிராவிஸ் ஹெட், ஜோஷ் இங்லிஸ், மேத்யூ குனேமன், மிட்செல் ஓவன், மேத்யூ ஷார்ட், மார்கஸ் ஸ்டோனிஸ், ஆடம் ஜாம்பா.

மிட்செல் ஸ்டார்க் கம்பேக்: ஆஸ்திரேலிய வேகப்பந்து வீச்சின் முதுகெலும்பான மிட்செல் ஸ்டார்க், மீண்டும்ஆஸ்திரேலிய ஒருநாள் அணிக்குத் திரும்பியுள்ளார். அவரது வருகை, ஆஸ்திரேலியாவின் பந்துவீச்சுக்கு மிகப்பெரிய பலத்தைச் சேர்க்கும் என்பதில் சந்தேகமில்லை.

மேத்யூ ரென்ஷாவுக்கு வாய்ப்பு: இடது கை பேட்ஸ்மேனான மேத்யூ ரென்ஷா, சுமார் இரண்டு ஆண்டுகளுக்குப் பிறகு மீண்டும் ஆஸ்திரேலிய ஒருநாள் அணிக்கு அழைக்கப்பட்டுள்ளார். உள்ளூர் போட்டிகளில் அவர் வெளிப்படுத்திய சிறப்பான ஆட்டமே, இந்த வாய்ப்புக்குக் காரணம்.

அலெக்ஸ் கேரிக்கு ஓய்வு: ஆஸ்திரேலிய அணியின் விக்கெட் கீப்பர் - பேட்ஸ்மேனான அலெக்ஸ் கேரிக்கு, முதல் ஒருநாள் போட்டியிலிருந்து ஓய்வளிக்கப்பட்டுள்ளது. அவர் ஷெஃபீல்ட் ஷீல்ட் எனப்படும் உள்ளூர் டெஸ்ட் தொடரில் பங்கேற்பதற்காக இந்த முடிவு எடுக்கப்பட்டுள்ளது. அவருக்குப் பதிலாக, ஜோஷ் இங்லிஸ் விக்கெட் கீப்பிங் பொறுப்பை ஏற்பார்.

ஆஸ்திரேலிய டி20 அணியிலும் மாற்றங்கள்

ஒருநாள் அணியைப் போலவே, ஆஸ்திரேலிய டி20 அணியிலும் சில முக்கிய மாற்றங்கள் செய்யப்பட்டுள்ளன. ஆனால், தற்போது இந்தியாவுக்கு எதிரான முதல் இரண்டு டி20 போட்டிகளுக்கான அணி மட்டுமே அறிவிக்கப்பட்டுள்ளது. இந்திய அணியில் அதிகம் எதிர்பார்க்கப்பட்ட கிளென் மேக்ஸ்வெல் இடம்பெறவில்லை.

மேக்ஸ்வெல் மிஸ்ஸிங்: நியூசிலாந்து தொடரின்போது மணிக்கட்டில் ஏற்பட்ட எலும்பு முறிவிலிருந்து கிளென் மேக்ஸ்வெல் இன்னும் முழுமையாகக் குணமடையாததால், அவர் இந்தத் தொடரில் இடம்பெறவில்லை. டி20 போட்டிகளில் ஆட்டத்தின் போக்கையே மாற்றக்கூடிய மேக்ஸ்வெல்லின் இழப்பு, ஆஸ்திரேலியாவின் மிடில்-ஆர்டருக்கு ஒரு மிகப்பெரிய பின்னடைவாகும்.

இங்லிஸ் மற்றும் எல்லிஸ் ரிட்டர்ன்: காயம் காரணமாக அவதிப்பட்டு வந்த விக்கெட் கீப்பர் ஜோஷ் இங்லிஸும், விடுப்பில் சென்றிருந்த வேகப்பந்து வீச்சாளர் நாதன் எல்லிஸும் மீண்டும் அணிக்குத் திரும்பியுள்ளனர்.

தேர்வுக் குழுத் தலைவர் ஜார்ஜ் பெய்லி கூறுகையில், "அடுத்த ஆண்டு நடைபெற உள்ள டி20 உலகக் கோப்பைக்கு அணியைத் தயார்படுத்துவதற்கும், அதே சமயம் டெஸ்ட் தொடருக்காக வீரர்களை உள்ளூர் போட்டிகளில் விளையாட வைப்பதற்கும் இடையே ஒரு சமநிலையை உருவாக்க முயற்சிக்கிறோம்" என்று இந்தத் தேர்வு குறித்து விளக்கமளித்தார்.