IND vs AUS: ஆஸ்திரேலிய அணிக்கு செம அடி.. முக்கிய ஆல்-ரவுண்டர் நீக்கம்.. உள்ளே வந்த மார்னஸ்

பெர்த்: இந்தியா - ஆஸ்திரேலியா அணிகளுக்கு இடையேயான ஒருநாள் தொடர் தொடங்க இன்னும் இரண்டு நாட்களே உள்ள நிலையில், ஆஸ்திரேலிய அணிக்கு ஒரு மிகப்பெரிய பின்னடைவு ஏற்பட்டுள்ளது. அந்த அணியின் நட்சத்திர ஆல்-ரவுண்டரான கேமரூன் கிரீன், காயம் காரணமாக இந்திய அணிக்கு எதிரான மூன்று போட்டிகள் கொண்ட ஒருநாள் தொடரிலிருந்தும் முழுமையாக விலகியுள்ளார். அவருக்குப் பதிலாக, அனுபவ வீரர் மார்னஸ் லபுஷேன் அணியில் சேர்க்கப்பட்டுள்ளார்.

பயிற்சியில் பந்துவீசும்போது, கேமரூன் கிரீனுக்குப் பக்கவாட்டில் வலி (Side Soreness) ஏற்பட்டதாக ஆஸ்திரேலிய கிரிக்கெட் வாரியம் (CA) தெரிவித்துள்ளது. "இது ஒரு சிறிய அளவிலான காயம் தான்; ஒரு முன்னெச்சரிக்கை நடவடிக்கையாகவே அவர் விலக்கப்பட்டுள்ளார்" என்று ஆஸ்திரேலிய கிரிக்கெட் வாரியம் தெரிவித்தாலும், இந்தக் காயம், அடுத்த மாதம் நடைபெற இருக்கும் ஆஷஸ் தொடரில் அவரது பங்கேற்பிற்கு ஆபத்தை ஏற்படுத்துமோ என்ற அச்சம் எழுந்துள்ளது.

ஆஸ்திரேலிய அணியின் வெற்றிக்கு, கிரீனின் ஆல்-ரவுண்ட் ஆட்டம் மிகவும் முக்கியமானது. இந்த நிலையில், அவருக்கு ஏற்பட்டுள்ள காயம், அணி நிர்வாகத்திற்குக் கவலையை ஏற்படுத்தியுள்ளது. "கிரீன், ஒரு சிறிய மறுவாழ்வு சிகிச்சைக்குப் பிறகு, அக்டோபர் 28-ல் தொடங்கும் ஷெஃபீல்ட் ஷீல்ட் தொடரின் மூன்றாவது சுற்றில் விளையாடி, ஆஷஸ் தொடருக்கான தனது தயாரிப்பைத் தொடர்வார் என்று எதிர்பார்க்கிறோம்" என்று ஆஸ்திரேலிய கிரிக்கெட் வாரியம் தனது அறிக்கையில் கூறியுள்ளது.

ஆஷஸ் முக்கியத்துவம்

கடந்த ஆண்டு முதுகுப் பகுதியில் ஏற்பட்ட காயத்திற்காக அறுவை சிகிச்சை செய்துகொண்ட கேமரூன் கிரீன், சமீபத்தில்தான் மீண்டும் பந்துவீசத் தொடங்கினார். தற்போது ஏற்பட்டுள்ள காயம் காரணமாக, இந்தியாவுக்கு எதிரான ஒருநாள் தொடரிலிருந்தும், அதைத் தொடரும் டி20 தொடரிலிருந்தும் விலக வேண்டிய நிலை ஏற்பட்டுள்ளது.

ஏற்கனவே, ஆஸ்திரேலிய அணியின் டெஸ்ட் கேப்டன் பேட் கம்மின்ஸ், காயம் காரணமாக முதல் ஆஷஸ் டெஸ்ட்டில் பங்கேற்க மாட்டார் என்று கூறப்படும் நிலையில், கிரீனின் இந்த விலகல், ஆஸ்திரேலிய அணிக்கு இரட்டை அடியாக அமைந்துள்ளது. கேமரூன் கிரீனின் இந்த விலகல், ஆஸ்திரேலிய அணி, இந்தியாவுக்கு எதிரான தொடரை விட, ஆஷஸ் தொடருக்கே அதிக முக்கியத்துவம் கொடுக்கிறது என்பதை மீண்டும் ஒருமுறை அப்பட்டமாகக் காட்டுகிறது.

இந்தியாவுக்குக் கிடைத்த வாய்ப்பு

ஆஷஸ் தொடருக்கான தயாரிப்பின் ஒரு பகுதியாக, முதல் ஒருநாள் போட்டியில் அணியின் முதன்மை விக்கெட் கீப்பர் அலெக்ஸ் கேரியும் பங்கேற்க மாட்டார் என்று அறிவிக்கப்பட்டுள்ளது. அவர், ஷெஃபீல்ட் ஷீல்ட் போட்டியில் விளையாட உள்ளார்.

இந்தியாவுக்கு எதிரான ஒரு முக்கியமான தொடரில், தங்களது முக்கிய வீரர்களுக்கு ஓய்வளித்து, ஆஷஸ் தொடருக்குத் தயாராவது, ஆஸ்திரேலிய அணியின் நீண்டகாலத் திட்டமிடலைக் காட்டுகிறது. இருப்பினும், கேமரூன் கிரீன் போன்ற ஒரு மேட்ச் வின்னர் இல்லாதது, இந்திய அணிக்கு எதிரான ஒருநாள் தொடரில் ஆஸ்திரேலியாவுக்குப் பெரும் பின்னடைவை ஏற்படுத்தும் என்பதில் சந்தேகமில்லை. இது, இந்திய அணிக்கு சாதகமாக அமைந்துள்ளது.