IND vs AUS: ஸ்ரேயாஸ் செய்த தவறு.. நடித்துக் காட்டி கொந்தளித்த கம்பீர்.. என்ன நடந்தது?

பெர்த்: இந்திய ஒருநாள் அணியின் துணை கேப்டன் ஸ்ரேயாஸ் ஐயரின் 'ஷார்ட் பால்' திணறல், மீண்டும் ஒருமுறை வெளிச்சத்திற்கு வந்துள்ளது. ஆஸ்திரேலியாவுக்கு எதிரான முதல் ஒருநாள் போட்டியில், அவர் தனது அதே பலவீனத்தால் ஆட்டமிழந்த விதம், தலைமைப் பயிற்சியாளர் கௌதம் கம்பீரை கடும் அதிருப்திக்கு உள்ளாக்கியுள்ளது. டிரெஸ்ஸிங் ரூமில், பேட்டிங் பயிற்சியாளரிடம் ஸ்ரேயாஸ் ஆட்டமிழந்த விதத்தை கம்பீர் நடித்துக் காட்டிய வீடியோ, தற்போது சமூக வலைதளங்களில் பரவி வருகிறது.

இந்தியா - ஆஸ்திரேலியா இடையேயான முதல் ஒருநாள் போட்டி, பெர்த் மைதானத்தில் மழைக்கு மத்தியில் நடைபெற்றது. ரோஹித் சர்மா (8), விராட் கோலி (0) ஆகியோர் அடுத்தடுத்து ஆட்டமிழந்து அதிர்ச்சியளித்த நிலையில், அணியை மீட்க வேண்டிய பொறுப்பு, துணை கேப்டன் ஸ்ரேயாஸ் ஐயரின் தோள்களில் இறங்கியது.

ஆட்டத்தின் 14-வது ஓவரை ஆஸ்திரேலியாவின் அனுபவமிக்க வேகப்பந்து வீச்சாளர் ஜோஷ் ஹேசில்வுட் வீசினார். அந்த ஓவரின் இரண்டாவது பந்தை, ஹேசில்வுட் ஒரு 'ஷார்ட் பாலாக', ஸ்ரேயாஸின் உடலை நோக்கி வீசினார். மீண்டும் தனது பழைய பலவீனத்தில் சிக்கிய ஸ்ரேயாஸ், அந்தப் பந்தை எப்படி ஆடுவது என்று தெரியாமல் திணறினார். பந்து, அவரது கிளவுஸில் லேசாகப் பட்டு, விக்கெட் கீப்பர் ஜோஷ் பிலிப்பின் கைகளுக்கு எளிதான கேட்சாகச் சென்றது. 11 ரன்களில் ஸ்ரேயாஸ் ஏமாற்றத்துடன் பெவிலியன் திரும்பினார்.

கம்பீர் நடித்துக் காட்டிய தருணம்

ஸ்ரேயாஸ் ஆட்டமிழந்த சிறிது நேரத்தில், மழை மீண்டும் குறுக்கிட்டதால், ஆட்டம் நிறுத்தப்பட்டது. வீரர்கள் ஓய்வறைக்குத் திரும்பியபோது, கேமராக்கள் இந்திய டிரெஸ்ஸிங் ரூமைக் காட்டின. அப்போது, தலைமைப் பயிற்சியாளர் கௌதம் கம்பீர், பேட்டிங் பயிற்சியாளர் சிதான்ஷு கோட்டாக்குடன் தீவிரமான ஆலோசனையில் ஈடுபட்டிருந்தார்.

அப்போது, ஸ்ரேயாஸ் ஐயர் எப்படி ஷார்ட் பாலில் திணறி, தனது விக்கெட்டைப் பறிகொடுத்தார் என்பதை, கம்பீர் தனது உடல் மொழியால் அப்படியே நடித்துக் காட்டினார். அவரது முகத்தில் தெரிந்த கோபமும், அதிருப்தியும், ஸ்ரேயாஸின் இந்தத் தொடர் சொதப்பல் மீது அவர் எவ்வளவு கோபமாக இருக்கிறார் என்பதை அப்பட்டமாகக் காட்டியது.

திடீரென கேமராக்கள் தன் மீது இருப்பதை உணர்ந்த கம்பீர், உடனடியாகப் பேச்சை மாற்றி, வேறு திசையில் திரும்பினார். ஆனால், அந்தச் சில வினாடிகள், கம்பீரின் கோபத்தை காட்டியது.

ஹேசில்வுட்டின் 7-வது வெற்றி!

இந்தப் போட்டியின் மூலம், சர்வதேச மற்றும் உள்நாட்டுப் போட்டிகள் உட்பட, ஸ்ரேயாஸ் ஐயரை 7-வது முறையாக ஜோஷ் ஹேசில்வுட் ஆட்டமிழக்கச் செய்துள்ளார். இது, ஸ்ரேயாஸின் பலவீனத்தை ஹேசில்வுட் எவ்வளவு துல்லியமாகப் பயன்படுத்துகிறார் என்பதற்கு ஆதாரமாக உள்ளது.

சரிவில் இந்தியா

ரோஹித், கோலி, சுப்மன் கில், ஸ்ரேயாஸ் என டாப் ஆர்டர் பேட்ஸ்மேன்கள் அனைவரும் சொற்ப ரன்களில் ஆட்டமிழந்த நிலையில் மழையால் போட்டி 26 ஓவர்களாக குறைக்கப்பட்டது. இந்திய அணி 26 ஓவர்களில் 9 விக்கெட் இழப்பிற்கு 136 ரன்கள் எடுத்தது. டிஎல்எஸ் முறைப்படி ஆஸ்திரேலிய அணிக்கு 131 ரன்கள் வெற்றி இலக்கு நிர்ணயம் செய்யப்பட்டது.

ஒருபுறம் டாப் ஆர்டர் சரிவு, மறுபுறம் துணை கேப்டனின் பொறுப்பற்ற ஆட்டமிழப்பு, இன்னொருபுறம் பயிற்சியாளரின் கடும் கோபம் என இந்திய அணிக்கு இந்த முதல் போட்டியே ஒரு பெரும் சோதனையாக அமைந்துள்ளது. கம்பீரின் இந்த வெளிப்படையான அதிருப்தி, ஸ்ரேயாஸ் ஐயரின் எதிர்காலத்திற்கு ஒரு எச்சரிக்கை மணியாகவே பார்க்கப்படுகிறது.