ஒரு கையில் பேட்.. இன்னொரு கையில் கட்டு.. நாட்டுக்காக வலியைப் பொறுத்துக்கொண்டு போராடிய கிறிஸ் வோக்ஸ்!

லண்டன்: இந்தியாவுக்கு எதிரான ஓவல் டெஸ்ட் போட்டியின் கடைசி நிமிடங்களில், கையில் அடிபட்ட நிலையில் ஒற்றைக் கையுடன் இங்கிலாந்து வீரர் கிறிஸ் வோக்ஸ் பேட்டிங் செய்ய அவர் களமிறங்கியது, இந்திய ரசிகர்கள் உட்பட கிரிக்கெட் ரசிகர்களின் மனதில் நீங்கா இடம்பிடித்துவிட்டது.

இந்த டெஸ்ட் போட்டியில் இந்திய அணி நிர்ணயித்த 374 ரன்கள் என்ற இலக்கை இங்கிலாந்து கிட்டத்தட்ட நெருங்கிவிட்டது. ஒரு கட்டத்தில், இங்கிலாந்து அணி சுலபமாக வெற்றி பெற்றுவிடும் என்றே தோன்றியது. ஆனால், இந்திய பந்துவீச்சாளர் முகமது சிராஜ்-இன் சிறப்பான பந்துவீச்சால், அடுத்தடுத்து விக்கெட்டுகள் விழுந்தன.

கடைசியாக, இங்கிலாந்தின் வெற்றிக்கு வெறும் 7 ரன்கள் மட்டுமே தேவைப்பட்டது. ஆனால், கையில் ஒரே ஒரு விக்கெட்தான் இருந்தது. ஃபீல்டிங்கின் போது கையில் அடிபட்டு, வலியால் துடித்து ஆடுகளத்தை விட்டு வெளியேறிய கிறிஸ் வோக்ஸ் ஒரு கையில் கட்டு போடப்பட்ட நிலையில் களமிறங்கினார். ஒரு கையில் மட்டும் பேட்டிங் செய்ய வேண்டிய நிலையிலும் கிறிஸ் வோக்ஸ், தனது அணியைக் காப்பாற்ற ஆடுகளத்திற்கு வந்தார்.

அவரால் இரண்டு கைகளாலும் பேட்டை சரியாகப் பிடிக்க முடியவில்லை. அதனால், ஒற்றைக் கையால் பேட்டைப் பிடித்தபடி, வலியுடன் களத்தில் நின்றார். அவர் விக்கெட்டை தற்காத்து நிற்க மறுபுறம் இருந்த கஸ் அட்கின்சன் வெற்றி தேடிக் கொடுப்பார் என்ற திட்டத்தை செயல்படுத்தினர்.

அதே சமயம் கிறிஸ் வோக்ஸ் செய்த இந்த முயற்சியைப் பார்த்த இந்திய வீரர்களே அவருக்கு மரியாதை செலுத்தினர். ஆனால், ஆட்டம் பரபரப்பான கட்டத்தில் இருந்ததால், இந்திய பந்துவீச்சாளர்கள் கவனமாகப் பந்து வீசினர். முகமது சிராஜ் வீசிய பந்து, கஸ் அட்கின்சனின் ஸ்டம்ப்பை பதம் பார்த்தது. இந்திய அணி 6 ரன்கள் வித்தியாசத்தில் த்ரில் வெற்றி பெற்றது. ஒரு பந்தை கூட சந்திக்காத நிலையில் கிறிஸ் வோக்ஸின் போராட்டம் தோல்வியில் முடிந்தது.

ஒருவேளை வோக்ஸுக்கு காயம் ஏற்படாமல் இருந்திருந்தால்?

கிறிஸ் வோக்ஸ் ஒரு சாதாரண பந்துவீச்சாளர் மட்டுமல்ல, பேட்டிங்கிலும் சிறப்பாக ஆடக்கூடிய ஒரு சிறந்த ஆல்ரவுண்டர். அவர் டெஸ்ட் கிரிக்கெட்டில் சதம் கூட அடித்திருக்கிறார். பலமுறை இக்கட்டான சூழ்நிலைகளில் தனது பேட்டிங்கால் இங்கிலாந்து அணியை வெற்றி பெறச் செய்துள்ளார்.

ஒருவேளை அவருக்கு அந்த காயம் மட்டும் ஏற்படாமல் இருந்திருந்தால், அந்த 7 ரன்களை அடிப்பது அவருக்குப் பெரிய விஷயமாக இருந்திருக்காது. மேலும், அவர் எட்டாம் வரிசையில் களமிறங்கி இருப்பார். அவர் களத்தில் முழு உடல் தகுதியுடன் இருந்திருந்தால், ஆட்டத்தின் முடிவு இங்கிலாந்துக்கு சாதகமாக மாறியிருக்க அதிக வாய்ப்பிருந்தது.

இறுதியில், இந்திய அணி வெற்றி பெற்று தொடரை சமன் செய்தது. ஆனாலும், தோல்வியடைந்த அணியில் இருந்தாலும், தனது நாட்டுக்காக வலியைப் பொறுத்துக்கொண்டு களமிறங்கிய கிறிஸ் வோக்ஸின் முயற்சி அனைவராலும் பாராட்டப்பட்டது. இந்த டெஸ்ட் போட்டி, இந்தியாவின் வெற்றிக்கு மட்டுமல்ல, வோக்ஸின் இந்த மறக்க முடியாத போராட்டத்திற்காகவும் நினைவில் நிற்கும்.