IND vs ENG: “நீங்க போனா இந்தியா ஜெயிக்காதா?” சீனியர்களை விளாசிய இர்பான் பதான்.. கொதித்த ரசிகர்கள்

லண்டன்: இங்கிலாந்துக்கு எதிரான டெஸ்ட் தொடரை இந்தியா 2-2 என சமன் செய்ததை அடுத்து இந்திய அணியின் சிறப்பான ஆட்டத்தை பலரும் பாராட்டி வரும் நிலையில், இந்திய அணியின் முன்னாள் வீரர் இர்பான் பதான்-இன் ஒரு ட்வீட் சமூக வலைதளத்தில் பெரும் புயலைக் கிளப்பியுள்ளது. அந்த ட்வீட், விராட் கோலி மற்றும் ஜஸ்பிரித் பும்ரா-வை மறைமுகமாகத் தாக்குவதாக ரசிகர்கள் கொந்தளித்துள்ளனர்.

2025 ஆண்டர்சன்-டெண்டுல்கர் கோப்பைக்கான ஐந்து போட்டிகள் கொண்ட டெஸ்ட் தொடர் தொடங்குவதற்கு முன்பே பெரும் திருப்பங்கள் அரங்கேறின. மே 7ஆம் தேதி ரோஹித் சர்மா-வும், மே 12ஆம் தேதி விராட் கோலி-யும் டெஸ்ட் கிரிக்கெட்டில் இருந்து திடீரென ஓய்வு பெறுவதாக அறிவித்தது இந்திய கிரிக்கெட் வட்டாரத்தில் அதிர்வலைகளை ஏற்படுத்தியது. இரண்டு சீனியர் ஜாம்பவான்கள் இல்லாமல் இந்திய அணி எப்படி சமாளிக்கும் என்ற கேள்வி எழுந்தது.

ஆனால், சுப்மன் கில் தலைமையில் களமிறங்கிய இளம் இந்திய அணி, பல சவால்களைச் சந்தித்து தொடரை 2-2 என சமன் செய்து சாதனை படைத்தது. கடைசி மற்றும் ஐந்தாவது டெஸ்ட் போட்டியில், காயம் காரணமாக வேகப்பந்து வீச்சு புயல் ஜஸ்பிரித் பும்ரா-வும் இரண்டு போட்டிகளில் விளையாடவில்லை.

சர்ச்சையை கிளப்பிய இர்பான் பதானின் ட்வீட்

இங்கிலாந்துக்கு எதிரான ஐந்தாவது டெஸ்டில், கடைசி நாளில் வெற்றிக்கு 35 ரன்கள் மட்டுமே தேவை என்ற நிலையில், இந்தியாவின் வெற்றி வாய்ப்பு கேள்விக்குறியாக இருந்தது. ஆனால், முகமது சிராஜ்-இன் அனல் பறக்கும் பந்துவீச்சால், இந்தியா 6 ரன்கள் வித்தியாசத்தில் வெற்றி பெற்றது. சிராஜ் 5 விக்கெட்டுகளை வீழ்த்தி ஆட்டநாயகனாக ஜொலித்தார்.

இந்த வரலாற்றுச் சிறப்புமிக்க வெற்றியைப் பாராட்டி பலரும் பதிவிட்டு வந்த நிலையில், இர்பான் பதான் தனது எக்ஸ் (X) பக்கத்தில், "கிரிக்கெட் யாருக்காகவும் நிற்பதில்லை என்பதை இந்தத் தொடர் மீண்டும் ஒருமுறை அனைவருக்கும் நினைவூட்டுகிறது!" என்று பதிவிட்டிருந்தார்.

கொந்தளித்த கோலி, பும்ரா ரசிகர்கள்

இர்பான் பதான்-இன் இந்த ட்வீட்டைப் பார்த்த ரசிகர்கள், இது தொடருக்கு முன்பாக ஓய்வு பெற்ற கோலி மற்றும் கடைசிப் போட்டியில் ஆடாத பும்ரா-வை குறிவைத்தே போடப்பட்டதாகக் குற்றம் சாட்டத் தொடங்கினர். கோலி மீது ஏன் இவ்வளவு கோபம்? (Why are you so salty with Kohli?) என்பது போன்ற கேள்விகளை ரசிகர்கள் எழுப்பி, இர்பான் பதான்-ஐ கடுமையாக விமர்சித்தனர். இந்த ட்வீட்டின் நேரம் மற்றும் சூழல் ஆகியவை கோலி, பும்ராவை குறிப்பிடுவதாகவே உள்ளது என்பது ரசிகர்களின் வாதமாக இருந்தது.

உண்மையில் இர்பான் பதான் கோலி, பும்ரா-வைத் தாக்கினாரா அல்லது இந்திய அணியின் இளம் வீரர்களின் திறமையையும், இந்திய கிரிக்கெட்டின் வலிமையையும் பாராட்டினாரா என்ற விவாதம் எழுந்துள்ளது. ரோஹித், கோலி போன்ற ஜாம்பவான்கள் இல்லாத போதும், பும்ரா போன்ற முக்கிய பந்துவீச்சாளர் கடைசி போட்டியில் விலகிய போதும், இளம் படை ஒன்று திரண்டு தொடரை சமன் செய்துள்ளது. எந்த ஒரு தனிப்பட்ட வீரரையும் சார்ந்து அணி இல்லை என்பதை உணர்த்தவே பதான் அவ்வாறு பதிவிட்டிருக்கலாம். இது அணியின் மன உறுதியையும், திறமையையும் பாராட்டுவதாகவே எடுத்துக்கொள்ளலாம்.

அதே சமயம் இர்பான் பதான், இதேபோல கடந்த காலங்களிலும் சில வீரர்கள் குறித்து மறைமுகமாக விமர்சித்த சம்பவங்கள் உண்டு. எனவே, இந்த முறையும் அவர் சீனியர் வீரர்களின் விலகலை ஒரு குத்தலாகவே குறிப்பிட்டுள்ளார் என ரசிகர்கள் கருதுகின்றனர்.

எது எப்படியோ, இளம் வீரர்களின் அபாரமான ஆட்டத்தால் கிடைத்த ஒரு மகத்தான வெற்றி, தேவையற்ற சர்ச்சையால் திசைதிரும்பியுள்ளது. சுப்மன் கில் 754 ரன்கள் குவித்தும் மற்றும் முகமது சிராஜ் 23 விக்கெட்டுகள் வீழ்த்தியும் சிறப்பான பங்களிப்பு அளித்தது இந்த தொடரில் இந்தியாவின் வெற்றிக்கு முக்கிய காரணமாக அமைந்தது. ஒருபுறம் வெற்றி தந்த மகிழ்ச்சி இருந்தாலும், மறுபுறம் முன்னாள் வீரரின் கருத்து ஏற்படுத்தியுள்ள இந்த விவாதம் ரசிகர்களிடையே சலசலப்பை ஏற்படுத்தியுள்ளது.