IND vs ENG: இவர் ஏன் இந்திய அணி வீரர்களுடன் பயிற்சி செய்றாரு? ஸ்விங் மன்னனை எதற்கு அழைத்தார் கம்பீர்

லண்டன்: இந்திய அணி தற்போது இங்கிலாந்துக்கு எதிரான ஐந்தாவது டெஸ்ட் போட்டிக்கு தீவிரமாக தயாராகி வருகிறது. இந்தத் தொடரை தீர்மானிக்கும் முக்கியமான போட்டி ஜூலை 31 அன்று லண்டனில் உள்ள தி ஓவல் மைதானத்தில் தொடங்கவிருக்கிறது. இந்திய அணி தற்போது சில காயங்களால் பாதிக்கப்பட்டுள்ளது.

போட்டிக்கு ஒரு நாள் முன்பு நடைபெற்ற பயிற்சி முகாமில், வெள்ளைப் பந்து கிரிக்கெட்டில் இந்திய அணிக்காக விளையாடிய தீபக் சாஹர், இந்திய அணியுடன் மைதானத்தில் பயிற்சி செய்து கொண்டு இருந்தார். இது தொடர்பாக வெளியான வீடியோவில், சாஹர் அந்த இடத்தில் இருந்தாலும், இந்திய அணியின் அதிகாரப்பூர்வ பயிற்சி உடையை அணியவில்லை என்று தெரிவிக்கப்பட்டுள்ளது.

தீபக் சாஹர் வெள்ளைப் பந்து வடிவங்களில் இந்திய அணிக்காக விளையாடியிருந்தாலும், இன்னும் டெஸ்ட் கிரிக்கெட்டில் அறிமுகமாகவில்லை.சாஹர் இந்திய அணியுடன் எந்தவொரு அதிகாரப்பூர்வ அணியில் இல்லை என்றாலும், அவர் அங்கு பயிற்சி செய்ததன் மூலம் அணியில் சேர்க்கப்படுவதற்கான வாய்ப்பு இருக்கிறது.

தீபக் சாஹர் பந்தை நன்றாக ஸ்விங் செய்வார் என்பதால், அவரை பயிற்சிக்காக கவுதம் கம்பீர் அழைத்து இருக்கலாம் என்றும் கூறப்படுகிறது. இருப்பினும், இதுவரை BCCI இது தொடர்பாக எந்த அறிவிப்பையும் வெளியிடவில்லை. முன்னணி விக்கெட் கீப்பர்-பேட்ஸ்மேன் ரிஷப் பந்த் கால்விரல் எலும்பு முறிவு காரணமாக விலகியுள்ளார். மேலும் ஜஸ்பிரீத் பும்ரா இறுதிப் போட்டியில் விளையாடுவது சந்தேகமாக உள்ளது. இதன் விளைவாக, தேர்வுக்குழு அனுபவமிக்க பேட்ஸ்மேன் நாராயண் ஜெகதீசனை அணியில் சேர்த்துள்ளது.

ஆண்டர்சன்-டெண்டுல்கர் டிராபி தொடரைப் பொறுத்தவரை, இது இரு அணிகளின் ரசிகர்களுக்கும் ஒரு சிறப்பு வாய்ந்த தொடராக இருந்து வருகிறது. முதல் போட்டியில் இங்கிலாந்து அணி ஐந்து விக்கெட்டுகள் வித்தியாசத்தில் வெற்றி பெற்று தொடரை வலுவாகத் தொடங்கியது. இருப்பினும், இந்திய அணி எட்ஜ்பாஸ்டனில் நடந்த இரண்டாவது டெஸ்டில் மாபெரும் வெற்றியைப் பதிவு செய்து பதிலடி கொடுத்தது.

மூன்றாவது டெஸ்ட் மீண்டும் இங்கிலாந்துக்கு சாதகமாக அமைந்தது, ஆனால் மான்செஸ்டரில் நடந்த நான்காவது டெஸ்ட் டிராவில் முடிந்தது.தற்போது தொடர் 2-1 என்ற கணக்கில் இங்கிலாந்துக்கு சாதகமாக உள்ளது. கென்னிங்டன் ஓவல் மைதானத்தில் டிரா கூட இங்கிலாந்து அணியை தொடரை வெல்ல வைக்கும். மறுபுறம், சுப்மன் கில் தலைமையிலான இந்திய அணி, தொடர் தோல்வியை தவிர்க்க வேண்டுமானால், ஒலி போப் தலைமையிலான அணிக்கு எதிரான இந்தப் போட்டியில் வெற்றி பெற வேண்டும்.

இங்கிலாந்து அணி ஏற்கனவே இந்தப் போட்டிக்கான தங்கள் பிளேயிங் லெவனை அறிவித்துள்ளது, ஆனால் பென் ஸ்டோக்ஸ் தோள்பட்டை காயம் காரணமாக இந்தப் போட்டியில் விளையாட மாட்டார்.ஸ்டோக்ஸைத் தவிர, இங்கிலாந்து அணியில் மேலும் மூன்று மாற்றங்கள் செய்யப்பட்டுள்ளன. வேகப்பந்து வீச்சாளர்கள் ஜோஃப்ரா ஆர்ச்சர் மற்றும் பிரைடன் கார்ஸ் விலகியுள்ளனர், மேலும் லியாம் டாசனும் அணியில் இருந்து வெளியேறியுள்ளார். இவர்களுக்கு பதிலாக ஜேக்கப் பெத்தல், ஜேமி ஓவர்டன், ஜோஷ் டங் மற்றும் கஸ் ஆட்கின்சன் ஆகியோர் அணியில் சேர்க்கப்பட்டுள்ளனர்.