IND vs ENG: செமி பைனல் முடிவே இதில் தான் இருக்கு.. குல்தீப் ஆடுவாரா? கம்பீர் எடுக்கப் போகும் முடிவு

மும்பை: 2026 டி20 உலகக் கோப்பை கிரிக்கெட் தொடரின் இரண்டாவது அரையிறுதிப் போட்டியில் சூர்யகுமார் யாதவ் தலைமையிலான இந்திய அணி, இங்கிலாந்து அணியை மும்பை வான்கடே மைதானத்தில் எதிர்கொள்கிறது. இந்தப் போட்டியில் குல்தீப் யாதவை களமிறக்குவது குறித்து இந்திய அணி பயிற்சியாளர் கம்பீருக்கு தலைவலி ஏற்பட்டுள்ளது.

இந்திய அணி சூப்பர் 8 சுற்றில் தென்னாப்பிரிக்காவிடம் தோல்வியடைந்தாலும், ஜிம்பாப்வே மற்றும் வெஸ்ட் இண்டீஸ் அணிகளுக்கு எதிரான போட்டிகளில் சிறப்பான வெற்றிகளைப் பதிவு செய்து அரையிறுதிக்கு முன்னேறியுள்ளது. மறுபுறம் இங்கிலாந்து அணி தனது சூப்பர் 8 போட்டிகள் அனைத்திலும் வெற்றி பெற்று மிகச் சிறந்த ஃபார்மில் உள்ளது. இந்த நிலையில், முக்கியமான அரையிறுதிப் போட்டிக்கான இந்திய அணியின் ஆடும் லெவனை தேர்வு செய்வதில் தலைமைப் பயிற்சியாளர் கௌதம் கம்பீருக்கு சில சவால்கள் காத்திருக்கின்றன.

குல்தீப் யாதவுக்கு வாய்ப்பு கிடைக்குமா?

இந்த அரையிறுதிப் போட்டியில் கடைசி சூப்பர் 8 போட்டியில் வெற்றி பெற்ற அதே அணியுடன் களமிறங்கவே இந்திய அணி நிர்வாகம் பெரும்பாலும் விரும்பும். இருப்பினும் பந்துவீச்சுத் துறையில் ஒரு மாற்றத்தைச் செய்யலாமா என்ற விவாதம் எழுந்துள்ளது. குறிப்பாக, முன்னணி சுழற்பந்து வீச்சாளர் குல்தீப் யாதவை ஆடும் லெவனில் சேர்ப்பது குறித்து ஆலோசிக்கப்பட்டு வருகிறது.

ஆனால், போட்டி நடைபெறும் மும்பை வான்கடே மைதானத்தின் ஆடுகளம் வேகப்பந்து வீச்சுக்கும், பேட்டிங்கிற்கும் அதிகம் ஒத்துழைக்கக்கூடியது. இதனால், இரண்டு பிரதான சுழற்பந்து வீச்சாளர்களுடன் களமிறங்குவது அணிக்கு சற்று பின்னடைவை ஏற்படுத்தலாம். எனவே, வருண் சக்கரவர்த்தி மட்டுமே அணியின் ஒரே சுழற்பந்து வீச்சாளராகத் தொடர அதிக வாய்ப்புள்ளது. அக்சர் பட்டேல் மற்றொரு சுழற்பந்துவீச்சாளராக இருப்பார்.

எனினும், ஆடுகளத்தின் இறுதித் தன்மையைப் பொறுத்தே குல்தீப் யாதவ் விளையாடுவது குறித்து பயிற்சியாளர் கௌதம் கம்பீர் இறுதி முடிவை எடுப்பார். ஆட்டத்தின் முடிவை தீர்மானிக்கும் ஒரு முக்கிய விஷயமாக இந்தத் தேர்வு அமையும்.

பேட்டிங் வரிசையில் மாற்றங்கள் இருக்குமா?

தொடக்க வீரர்களாக சஞ்சு சாம்சன் மற்றும் அபிஷேக் சர்மா ஆகியோரே மீண்டும் களமிறங்குவார்கள் என எதிர்பார்க்கப்படுகிறது. வெஸ்ட் இண்டீஸ் அணிக்கு எதிரான முந்தைய நாக் அவுட் போட்டியில் சஞ்சு சாம்சன் ஆட்டமிழக்காமல் 97 ரன்கள் குவித்து அணியின் வெற்றிக்கு முக்கியக் காரணமாக அமைந்தார். அதே ஆட்டத்தை அவர் வெளிப்படுத்துவார் என ரசிகர்கள் எதிர்பார்க்கின்றனர். மறுபுறம் தொடர்ச்சியாக ரன் குவிக்கத் தடுமாறி வரும் இளம் வீரர் அபிஷேக் சர்மா, இந்த அரையிறுதி ஆட்டத்தில் சிறப்பான தொடக்கத்தை அளிக்க வேண்டிய கட்டாயத்தில் உள்ளார்.

மூன்றாவது பேட்டிங் வரிசையில் இஷான் கிஷன் களமிறங்கி பொறுப்பாக விளையாடுவார் என எதிர்பார்க்கப்படுகிறது. கேப்டன் சூர்யகுமார் யாதவ் நான்காவது வரிசையிலும், புதிய பொறுப்பை ஏற்றுள்ள திலக் வர்மா ஐந்தாவது வரிசையிலும் களமிறங்கி நடுத்தர வரிசையைப் பலப்படுத்துவார்கள்.

ஆல்ரவுண்டர்கள் மற்றும் பந்துவீச்சு வியூகம்

ஆல்ரவுண்டர்களைப் பொறுத்தவரை சிவம் துபே, ஹர்திக் பாண்டியா மற்றும் அக்சர் பட்டேல் ஆகியோர் அணியில் தொடர்ந்து தங்களது இடத்தைத் தக்கவைப்பார்கள். இங்கிலாந்து அணியின் வலுவான பேட்டிங் வரிசையைக் கட்டுப்படுத்த, இந்த ஆல்ரவுண்டர்கள் தங்களது பந்துவீச்சின் மூலம் கூடுதல் பங்களிப்பை அளிக்க வேண்டியது அவசியமாகும்.

வேகப்பந்து வீச்சைப் பொறுத்தவரை ஜஸ்பிரித் பும்ரா மற்றும் அர்ஷ்தீப் சிங் ஆகியோர் முக்கிய அஸ்திரமாகச் செயல்படுவார்கள். இவர்களது சிறப்பான பந்துவீச்சு இங்கிலாந்து தொடக்க வீரர்களுக்கு நெருக்கடியை ஏற்படுத்தும் என நம்பப்படுகிறது.

இந்திய அணியின் உத்தேச ஆடும் லெவன்:

அபிஷேக் சர்மா, சஞ்சு சாம்சன், இஷான் கிஷன், சூர்யகுமார் யாதவ் (கேப்டன்), திலக் வர்மா, சிவம் துபே, ஹர்திக் பாண்டியா, அக்சர் பட்டேல், அர்ஷ்தீப் சிங், ஜஸ்பிரித் பும்ரா, வருண் சக்கரவர்த்தி.