IND vs ENG: ஜடேஜாவின் நோ-பால் தந்த ட்விஸ்ட்.. பறந்து பிடித்த கே.எல்.ராகுல்.. என்ன நடந்தது?

மான்செஸ்டர்: இந்தியா - இங்கிலாந்து இடையேயான நான்காவது டெஸ்ட் போட்டியில், இந்திய பந்துவீச்சாளர்களை இங்கிலாந்து தொடக்க வீரர்கள் சோதித்து வந்த நிலையில், ரவீந்திர ஜடேஜா வீசிய ஒரு நோ-பால் ஆட்டத்தின் போக்கையே மாற்றியது. சதம் அடிப்பார் என எதிர்பார்க்கப்பட்ட ஜாக் கிராலி, கே.எல்.ராகுலின் அபாரமான கேட்சால் வெளியேறினார்.

இந்தியா மற்றும் இங்கிலாந்து அணிகளுக்கு இடையேயான நான்காவது டெஸ்ட் போட்டி மான்செஸ்டரில் விறுவிறுப்பாக நடைபெற்று வருகிறது. இந்தப் போட்டியில் முதலில் பேட்டிங் செய்த இந்திய அணி 358 ரன்களுக்கு ஆட்டமிழந்தது. இதையடுத்து, இங்கிலாந்து அணி தனது முதல் இன்னிங்ஸை தொடங்கியது. தொடக்க வீரர்களான ஜாக் கிராலி மற்றும் பென் டக்கெட் ஆகியோர் இந்திய பந்துவீச்சை துவம்சம் செய்யத் தொடங்கினர்.

இந்திய பந்துவீச்சாளர்கள் விக்கெட் எடுக்க முடியாமல் திணறிய நிலையில், இந்த ஜோடி முதல் விக்கெட்டுக்கு 166 ரன்கள் சேர்த்து வலுவான அடித்தளம் அமைத்தது. ஜாக் கிராலி அதிரடியாக விளையாடி சதம் அடிப்பார் என்று அனைவரும் எதிர்பார்த்தனர்.

ஆட்டத்தின் 32வது ஓவரை ரவீந்திர ஜடேஜா வீசினார். அந்த ஓவரின் கடைசி பந்தை கிராலி பவுண்டரிக்கு விரட்டினார். ஓவர் முடிந்துவிட்டது என்று ஜடேஜா தனது தொப்பியை வாங்க நடுவரிடம் சென்றபோது, அது நோ-பால் என்று அறிவிக்கப்பட்டது. இது இந்திய அணிக்கு பெரும் ஏமாற்றத்தை அளித்தது.

ஆனால், அந்த நோ-பால் தான் ஆட்டத்தில் ஒரு பெரிய திருப்பத்தை ஏற்படுத்தியது. விதிப்படி, ஜடேஜா கூடுதலாக ஒரு பந்தை வீச வேண்டியிருந்தது. அந்தப் பந்தை எதிர்கொண்ட ஜாக் கிராலி, அதை தற்காப்புடன் விளையாட முயன்றார். ஆனால், பந்து அவரது பேட்டின் விளிம்பில் பட்டு ஸ்லிப் திசையில் சென்றது.

அங்கு நின்று கொண்டிருந்த கே.எல். ராகுல், ஒரு நொடியும் தாமதிக்காமல், தாழ்வாக வந்த பந்தை நோக்கிப் பாய்ந்து, அற்புதமான ஒரு கேட்சைப் பிடித்தார். இதை சற்றும் எதிர்பாராத கிராலி, 84 ரன்களில் ஆட்டமிழந்து ஏமாற்றத்துடன் பெவிலியன் திரும்பினார்.

ஒரு நோ-பால் காரணமாக கிடைத்த கூடுதல் பந்தில் விக்கெட் வீழ்ந்தது இந்திய அணிக்கு பெரும் நிம்மதியைக் கொடுத்தது. அபாரமாக ஆடிக்கொண்டிருந்த இங்கிலாந்தின் தொடக்க ஜோடியை பிரித்து, கே.எல். ராகுல் மற்றும் ஜடேஜா கூட்டணி இந்தியாவுக்கு தேவையான திருப்புமுனையை ஏற்படுத்திக் கொடுத்தது.