IND vs ENG: நங்கூரம் போட்டு 99 ரன் எடுத்து.. இந்திய அணியை வீழ்த்திய ஜோ ரூட்.. இங்கிலாந்து வெற்றி

By Aravinthan

Updated: Friday, July 17, 2026, 6:33 [IST]

கார்டிஃப்: இந்தியாவுக்கு எதிரான 2வது ஒருநாள் போட்டியில் இங்கிலாந்து அணி 4 விக்கெட் வித்தியாசத்தில் அபார வெற்றி பெற்றது. இதன் மூலம் 3 போட்டிகள் கொண்ட ஒருநாள் தொடர் தற்போது 1-1 என்ற கணக்கில் சமநிலையை எட்டியுள்ளது. இங்கிலாந்து அணியின் நட்சத்திர பேட்ஸ்மேன் ஜோ ரூட்டின் பொறுப்பான ஆட்டம் அந்த அணியின் வெற்றிக்கு முக்கிய காரணமாக அமைந்தது.

கார்டிஃபில் நேற்று நடைபெற்ற இந்தப் போட்டியில் டாஸ் வென்ற இங்கிலாந்து அணி முதலில் பந்துவீச முடிவு செய்தது. முதலில் பேட்டிங் செய்த இந்திய அணி 44 ஓவர்களில் 233 ரன்களுக்கு ஆல்-அவுட் ஆனது. இந்திய தரப்பில் ஸ்ரேயாஸ் ஐயர் 66 ரன்களும், விராட் கோலி 65 ரன்களும் எடுத்துப் போராடினர். ஆனால் மிடில் ஆர்டரின் சொதப்பலான ஆட்டத்தால் இந்திய அணி அடுத்தடுத்து விக்கெட்டுகளை இழந்து தடுமாறியது. கடைசி கட்டத்தில் ஜஸ்பிரித் பும்ரா அதிரடியாக 20 ரன்கள் குவித்து ஆட்டமிழக்காமல் இருந்தார். இங்கிலாந்து தரப்பில் ஜோப்ரா ஆர்ச்சர் மற்றும் கஸ் அட்கின்சன் தலா 3 விக்கெட்டுகளை வீழ்த்தினர்.

IND vs ENG Joe Root scored 99 runs and helps England to beat India in 2nd ODI at Cardiff

இதனையடுத்து 234 ரன்கள் என்ற இலக்கை நோக்கி களம் இறங்கிய இங்கிலாந்து அணி, ஆரம்பத்தில் 8 ரன்களுக்குள் 2 விக்கெட்டுகளை இழந்து தவித்தது. பென் டக்கெட் ரன் ஏதும் எடுக்காமலும், ஜேக்கப் பெத்தேல் 4 ரன்களிலும் இந்திய வேகப்பந்து வீச்சில் சிக்கி ஆட்டமிழந்தனர். ஆனால், ஒற்றை ஆளாக நங்கூரம் போல் மைதானத்தில் நிலைத்து நின்று விளையாடிய ஜோ ரூட், 133 பந்துகளில் 9 பவுண்டரிகளுடன் 99 ரன்கள் குவித்து இறுதிவரை ஆட்டமிழக்காமல் அணியை வெற்றிப் பாதைக்கு அழைத்துச் சென்றார்.

அவருக்குத் துணையாக சாம் கர்ரன் 26 ரன்களும், வில் ஜாக்ஸ் 30 ரன்களும், கஸ் அட்கின்சன் ஆட்டமிழக்காமல் 23 ரன்களும் எடுத்தனர். இதனால் இங்கிலாந்து அணி 44.1 ஓவர்களில் 6 விக்கெட் இழப்பிற்கு 235 ரன்கள் எடுத்து அபார வெற்றி பெற்றது. இந்திய தரப்பில் அறிமுக வீரர் குர்னூர் பிரார் 2 விக்கெட்டுகளையும், பும்ரா, பிரசித் கிருஷ்ணா, சிவம் துபே மற்றும் அக்சர் படேல் தலா 1 விக்கெட்டையும் வீழ்த்தினர்.

5 சாதனைகளை தகர்த்து எறிந்த விராட் கோலி.. இங்கிலாந்து மண்ணில் மெகா சாதனைப் பட்டியல்

மூன்று போட்டிகள் கொண்ட இந்த ஒருநாள் தொடர் 1-1 என சமநிலை அடைந்துள்ள நிலையில், தொடரின் வெற்றியாளரைத் தீர்மானிக்கும் 3வது மற்றும் கடைசி ஒருநாள் போட்டி வரும் ஜூலை 19 அன்று லண்டன் லார்ட்ஸ் மைதானத்தில் நடைபெற உள்ளது.