IND vs ENG: நம்ம பவுலிங் படைய பார்த்தீங்களா? சொல்லி வச்சி தூக்கிய பிரசித் கிருஷ்ணா.. இங்கிலாந்துக்கு சோகம்

கார்டிஃப்: இங்கிலாந்துக்கு எதிரான இரண்டாவது ஒருநாள் போட்டியில், இந்திய வேகப்பந்து வீச்சாளர் பிரசித் கிருஷ்ணா ஆரம்பத்திலேயே விக்கெட்டுகளை வீழ்த்தி அசத்தினார். இப்போட்டியில் முதலில் பேட்டிங் செய்த இந்திய அணி 44 ஓவர்களில் வெறும் 233 ரன்களுக்கு ஆல்-அவுட் ஆனது. இந்த எளிய இலக்கைத் தற்காத்துக் கொள்ள இந்திய அணிக்கு சிறப்பான தொடக்கம் அவசியமாக இருந்தது.

அதற்கு ஏற்றவாறு, இங்கிலாந்து அணி தனது இன்னிங்ஸைத் தொடங்கிய முதல் பந்திலேயே பென் டக்கெட்டை ஆட்டமிழக்கச் செய்து ஜஸ்பிரித் பும்ரா அசத்தலான தொடக்கத்தைத் தந்தார்.அவரைத் தொடர்ந்து பந்துவீச வந்த பிரசித் கிருஷ்ணா, ரன் எதுவும் தராமல் தனது முதல் ஓவரை மெய்டனாக வீசினார். அதைத் தொடர்ந்து தனது அடுத்த ஓவரிலும் ஆதிக்கம் செலுத்திய அவர், ஜேக்கப் பெத்தலின் முக்கிய விக்கெட்டை வீழ்த்தி இங்கிலாந்துக்கு மேலும் நெருக்கடி கொடுத்தார்.

நான்காவது ஓவரின் நான்காவது பந்தில், இடதுகை பேட்டரான பெத்தலுக்கு எதிராக ரவுண்ட் தி விக்கெட் முறையில் வீசப்பட்ட பந்து, பேட்டின் எட்ஜில் பட்டு விக்கெட் கீப்பர் இஷான் கிஷானிடம் கேட்ச் ஆனது. இதனால் பெத்தல் 10 பந்துகளில் 4 ரன்கள் மட்டுமே எடுத்து ஆட்டமிழந்தார். இதன் காரணமாக இங்கிலாந்து அணி 8 ரன்களுக்கு 2 விக்கெட்டுகளை இழந்து ஆரம்பத்திலேயே தடுமாறியது.

IND vs ENG: முதல் பந்திலேயே விக்கெட்.. கதி கலங்கிய இங்கிலாந்து.. பும்ரா அபாரம்

2027 ஒருநாள் உலகக் கோப்பை நெருங்கி வரும் வேளையில், அதற்கு முன்னதாக நடக்கும் போட்டிகள் வீரர்களின் திறமையை நிரூபிப்பதற்கான முக்கிய தளமாக அமைந்துள்ளன. இந்திய அணியைப் பொறுத்தவரை, ஒருநாள் போட்டிகளில் தொடர்ந்து வாய்ப்புகளைப் பெற்று வரும் பிரசித் கிருஷ்ணா, தென்னாப்பிரிக்காவில் நடைபெறவுள்ள உலகக் கோப்பை தொடருக்கான தனது இடத்தை உறுதி செய்வதை இலக்காகக் கொண்டுள்ளார்.

முன்னதாக பர்மிங்காமில் நடந்த முதல் ஒருநாள் போட்டியில், பிரசித் கிருஷ்ணா 10 ஓவர்களில் 2 மெய்டன்களுடன் 50 ரன்கள் கொடுத்து ஜாஸ் பட்லர் மற்றும் சாம் கரன் ஆகியோரின் விக்கெட்டுகளை வீழ்த்தினார். அதற்கு முன்பு சென்னையில் ஆப்கானிஸ்தானுக்கு எதிராக நடைபெற்ற மூன்றாவது ஒருநாள் போட்டியில் 23 ரன்களுக்கு 5 விக்கெட்டுகளைக் கைப்பற்றி அசத்தியிருந்தார்.

IND vs ENG: விராட் கோலி, ரோகித் சர்மா பார்ட்னர்ஷிப்பில் சாதனை.. இது தான் கடைசி முறையா?

இந்த இரண்டாவது ஒருநாள் போட்டிக்கு முன்னதாக, பிரசித் கிருஷ்ணா 26 ஒருநாள் போட்டிகளில் விளையாடி 25.74 சராசரியிலும், 5.86 எகானமியிலும் 47 விக்கெட்டுகளை வீழ்த்தியுள்ளார். சில சமயங்களில் கூடுதல் ரன்களைக் கொடுத்தாலும், விக்கெட்டுகளை வீழ்த்தும் இவரின் தனித்துவமான திறன் உலகக் கோப்பை அணியில் இவருக்கு வலுவான இடத்தை பெற்றுத்தர அதிக வாய்ப்புள்ளது.