IND vs ENG: “பும்ரா மட்டும் இல்லைனா நான் இங்கே நிற்க முடியாது”.. ஆட்டநாயகன் சஞ்சு சாம்சன் நெகிழ்ச்சி

மும்பை: 2026 டி20 உலகக் கோப்பை கிரிக்கெட் தொடரின் இரண்டாவது அரையிறுதிப் போட்டியில் இந்திய அணி, இங்கிலாந்தை 7 ரன்கள் வித்தியாசத்தில் வீழ்த்தியது. இந்தப் போட்டியில் 42 பந்துகளில் 89 ரன்கள் குவித்து அணியின் வெற்றிக்கு வித்திட்ட சஞ்சு சாம்சன் ஆட்டநாயகனாகத் தேர்வு செய்யப்பட்டார். போட்டியின் முடிவில் அவர் தனது சிறப்பான ஆட்டம் மற்றும் அணியின் வெற்றி குறித்து மனம் திறந்து பேசினார்.

திட்டமிட்ட ஆட்டம்

தனது ஆட்டம் குறித்துப் பேசிய சஞ்சு சாம்சன், "உண்மையைச் சொல்ல வேண்டுமென்றால், கடந்த போட்டியிலேயே நான் நல்ல ஃபார்முக்கு வந்துவிட்டதை உணர்ந்தேன். அந்த உத்வேகத்தைத் தொடர்ந்து இந்த போட்டியிலும் வெளிப்படுத்த நினைத்தேன். நாட்டுக்காக விளையாடும் இத்தகைய முக்கியமான நாக் அவுட் போட்டிகளில் ஃபார்மில் இருப்பது எளிதான விஷயம் அல்ல.

அதனால் இது ஒரு பெரிய போட்டி என்பதை உணர்ந்து, ஆடுகளத்தில் நிலைத்து நிற்க எனக்குச் சிறிது கூடுதல் நேரம் எடுத்துக் கொண்டேன். எனது இன்னிங்ஸை மிகவும் தெளிவாகக் கணித்து விளையாடினேன். தொடக்கத்தில் எனக்குச் சில அதிர்ஷ்டம் கிடைத்தது, அதைப் பயன்படுத்தி அணியின் ஸ்கோரை உயர்த்த நினைத்தேன்" என்று தெரிவித்தார்.

250 ரன்கள் என்பது அணியின் திட்டம்

வான்கடே மைதானத்தின் தன்மையை நன்கு அறிந்திருந்ததால் பெரிய ஸ்கோர் அவசியம் என்பதை உணர்ந்ததாக சஞ்சு சாம்சன் கூறினார். "வான்கடே மைதானத்தில் எந்த ஸ்கோரையும் எதிரணியால் எளிதாக எட்ட முடியும் என்பது எங்களுக்குத் தெரியும். இங்கு 250 ரன்கள் எடுத்தால் கூட, அது பாதுகாப்பான ஸ்கோர் இல்லை என்பதை இங்கிலாந்து பேட்ஸ்மேன்கள் தங்களது ஆட்டத்தின் மூலம் நிரூபித்தனர்.

டாஸ் வென்ற அவர்கள் எங்களைப் பேட்டிங் செய்யப் பணித்தபோதே, நாங்கள் பெரிய இலக்கை நிர்ணயிக்க வேண்டும் என முடிவு செய்தோம். அபிஷேக் சர்மா ஆட்டமிழந்த பிறகு, நானும் இஷான் கிஷனும் அமைத்த கூட்டணி முக்கியமானது. நாங்கள் 250 ரன்களை எட்ட முடியும் என்று நம்பினோம், அறையிலும் இது குறித்தே ஆலோசித்தோம். கடைசியில் அணிக்குத் தேவையான ரன்களைச் சேர்த்தது மகிழ்ச்சியளிக்கிறது" என்று அவர் கூறினார்.

IND vs ENG: இந்தியாவின் வெற்றிக்கு காரணமே இந்திய கேப்டன் சூர்யகுமார் போட்ட இந்த பிளான்தான்!

பும்ராவுக்குத் தான் இந்த விருது சேரும்

இந்த வெற்றியின் முழுப் பெருமையும் பந்துவீச்சாளர்களையே சாரும் என்று கூறிய சஞ்சு சாம்சன், குறிப்பாக ஜஸ்பிரித் பும்ராவை வெகுவாகப் பாராட்டினார். "இன்று நாங்கள் வெற்றி பெற்றதற்கு முழு காரணமும் ஜஸ்பிரித் பும்ரா தான். அவர் ஒரு உலகத்தரம் வாய்ந்த பந்துவீச்சாளர். தலைமுறையில் ஒருமுறை மட்டுமே அவரைப் போன்ற பந்துவீச்சாளரைப் பார்க்க முடியும்.

உண்மையில் இந்த ஆட்டநாயகன் விருது அவருக்குத்தான் வழங்கப்பட வேண்டும். கடைசி ஓவர்களில் அவர் வீசிய அந்தச் சிறப்பான பந்துவீச்சு இல்லை என்றால், நான் இப்போது வெற்றி பெற்ற அணியின் சார்பாக இங்கு நின்றிருக்க முடியாது. கடினமான சூழ்நிலையிலும் பந்துவீச்சாளர்கள் தங்களை நம்பிச் செயல்பட்ட விதம் பாராட்டுக்குரியது" என்று நெகிழ்ச்சியுடன் குறிப்பிட்டார்.

IND vs ENG: “மிகப்பெரிய தவறை செய்தேன் அதுதான்..”.. தோல்வி குறித்து இங்கிலாந்து கேப்டன் புரூக் வேதனை

சதத்தை விட வெற்றியே முக்கியம்

இறுதியாகச் சதம் அடிக்கத் தவறியது குறித்துப் பேசிய அவர், "சதம் அடிப்பது பற்றி நான் கவலைப்படவில்லை. டி20 போட்டியைப் பொறுத்தவரை சதம் என்பது தானாக அமைவதுதான். இது டெஸ்ட் அல்லது ஒருநாள் போட்டி அல்ல, நிதானமாக விளையாடி ரன்களைச் சேர்ப்பதற்கு. பேட்டிங் செய்யக் களமிறங்கிய பிறகு தொடர்ந்து பந்துகளை அடித்து விளையாடுவது மட்டுமே ஒரே வழி.

இறுதியில் அணி வெற்றி பெறும் திசையில் இருந்தால், நான் எவ்வளவு ரன்கள் எடுத்தேன் என்பது முக்கியமல்ல. அணியின் வெற்றியில் பங்காற்றியதே எனக்குப் போதும்" என்று சஞ்சு சாம்சன் தெரிவித்தார். மேலும், வான்கடே மைதானத்தில் விளையாடுவது தனது சிறுவயது கனவு என்றும், அங்கு கூடியிருந்த ரசிகர்கள் இரு அணிகளுக்கும் ஆதரவளித்தது கிரிக்கெட்டின் மீதான அவர்களது அன்பைக் காட்டுவதாகவும் சஞ்சு சாம்சன் மகிழ்ச்சி தெரிவித்தார்.