IND vs ENG: “கடைசி ஓவரில் 5 சிக்ஸர் எல்லாம் விட்டுக் கொடுத்திருக்க மாட்டேன்”.. அக்சர் பட்டேல் கலகல!

மும்பை: வான்கடே மைதானத்தில் நடைபெற்ற 2026 டி20 உலகக் கோப்பை அரையிறுதிப் போட்டியில் கடைசி ஓவர் வரை சென்று இங்கிலாந்து அணியை வீழ்த்தியது இந்திய அணி. இந்தப் போட்டியில், கடைசி ஓவரை வீசுவதற்குத் தான் தயாராக இருந்ததாகவும், இங்கிலாந்து வெற்றிக்குத் தேவையான 5 சிக்ஸர்களை விட்டுக் கொடுத்திருக்க மாட்டேன் என்றும் இந்திய அணியின் துணை கேப்டன் அக்சர் பட்டேல் போட்டி முடிந்தவுடன் கலகலப்பாக கூறினார்.

கடைசி ஓவர் பரபரப்பு

பரபரப்பாக நடைபெற்ற இந்த அரையிறுதிப் போட்டியில், இங்கிலாந்து அணியின் வெற்றிக்குக் கடைசி 6 பந்துகளில் 30 ரன்கள் தேவைப்பட்டது. அந்தச் சமயத்தில் இந்திய அணியின் முக்கிய சுழற்பந்து வீச்சாளரான அக்சர் பட்டேலுக்கு ஒரு ஓவர் மீதமிருந்தது. வழக்கம் போலச் சுழற்பந்து வீச்சாளரான அவர்தான் கடைசி ஓவரை வீசுவார் என்று எதிர்பார்க்கப்பட்டது.

ஆனால், யாரும் எதிர்பாராத வகையில் கேப்டன் சூர்யகுமார் யாதவ், வேகப்பந்து வீச்சு ஆல்ரவுண்டரான சிவம் துபேவை பந்துவீச அழைத்தார். இந்தப் போட்டியில் அதற்கு முன் சிவம் துபே பந்துவீசி இருக்கவில்லை. அந்த கடைசி ஓவரில் சிவம் துபே 22 ரன்களை விட்டுக் கொடுத்தாலும், இலக்கை எட்ட விடாமல் தடுத்து அணியின் வெற்றியை உறுதி செய்தார்.

நான் தயாராகவே இருந்தேன்

போட்டி முடிந்த பிறகு இது குறித்துப் பேசிய அக்சர் பட்டேல், கேப்டன் அழைத்திருந்தால் கடைசி ஓவரை வீசத் தான் தயாராக இருந்ததாகத் தெரிவித்தார். இது குறித்து அவர் பேசுகையில், "கடைசி ஓவரை வீசுவதற்கு நான் தயாராகவே இருந்தேன். பவுண்டரி எல்லைக்கு அருகே நின்றுகொண்டு பந்துவீசுவது போலப் பயிற்சி செய்து கொண்டிருந்தேன். கடைசி ஓவரில் 30 ரன்கள் என்பது மிக அதிகம். அந்த ஓவரில் எப்படியும் நான் 5 சிக்ஸர்களை எல்லாம் விட்டுக் கொடுத்திருக்க மாட்டேன் என்ற நம்பிக்கை எனக்கு இருந்தது" என்று சிரித்துக்கொண்டே கூறினார்.

IND vs ENG: “பும்ரா மட்டும் இல்லைனா நான் இங்கே நிற்க முடியாது”.. ஆட்டநாயகன் சஞ்சு சாம்சன் நெகிழ்ச்சி

ஆட்டத்தின் முக்கியத் தருணங்கள்

இந்தப் போட்டியில் முதலில் பேட்டிங் செய்த இந்திய அணி 253 ரன்கள் குவித்தது. சஞ்சு சாம்சன் 89 ரன்கள் விளாசினார். பின்னர் களமிறங்கிய இங்கிலாந்து அணிக்கு இளம் வீரர் ஜேக்கப் பெத்தேல் 48 பந்துகளில் 105 ரன்கள் குவித்து கடும் நெருக்கடி அளித்தார். இருப்பினும், கடைசி கட்டத்தில் இந்தியப் பந்துவீச்சாளர்கள் சிறப்பாகச் செயல்பட்டனர்.

குறிப்பாக 18வது ஓவரை வீசிய ஜஸ்பிரித் பும்ரா வெறும் 6 ரன்களை மட்டுமே விட்டுக் கொடுத்தார். இது ஆட்டத்தில் மிகப்பெரிய திருப்பத்தை ஏற்படுத்தியது. அதேபோல 19வது ஓவரை வீசிய ஹர்திக் பாண்டியா 9 ரன்களை மட்டுமே கொடுத்து ஒரு விக்கெட்டையும் வீழ்த்தினார். இதுவே இங்கிலாந்து அணியின் தோல்விக்கு முக்கியக் காரணமாக அமைந்தது.

IND vs ENG: பும்ரா, ஹர்திக் மட்டும் இதை செய்யலைனா.. இந்தியா வென்றிருக்கவே முடியாது.. திருப்புமுனை!

பீல்டிங் பாராட்டு

வெற்றி குறித்துப் பேசிய கேப்டன் சூர்யகுமார் யாதவ், இந்திய அணியின் பீல்டிங் பயிற்சியாளர் டி திலீப் அவர்களை வெகுவாகப் பாராட்டினார். "வீரர்கள் களத்தில் பீல்டிங் செய்வதில் கூடுதல் முயற்சியை வெளிப்படுத்துகிறார்கள். அதற்கான முழுப் பெருமையும் பயிற்சியாளர் திலீப்பையே சாரும்" என்று தெரிவித்தார். இந்த வெற்றியின் மூலம் இந்திய அணி இறுதிப்போட்டியில் நியூசிலாந்து அணியை எதிர்கொள்கிறது. ஞாயிற்றுக்கிழமை அகமதாபாத் மைதானத்தில் நடைபெறும் இந்தப் போட்டிக்காக ரசிகர்கள் ஆவலுடன் காத்திருக்கின்றனர்.

IND vs ENG: செஞ்சுரி எல்லாம் வேண்டாம்.. இந்திய அணிதான் முதலில்.. தியாகம் செய்த சஞ்சு சாம்சன்