100 ஆண்டு ரெக்கார்டு.. டான் பிராட்மேனின் 4 சாதனைகளுக்கு குறி வைத்த இந்திய கேப்டன் சுப்மன் கில்

லண்டன்: இந்திய டெஸ்ட் அணியின் கேப்டன் சுப்மன் கில், இங்கிலாந்துக்கு எதிரான ஆண்டர்சன்-டெண்டுல்கர் கோப்பை டெஸ்ட் தொடரில் தனது அபார ஆட்டத்தால் பல சாதனைகளை முறியடித்து வருகிறார். முதல் இரண்டு டெஸ்ட் போட்டிகளிலேயே 585 ரன்கள் குவித்து, டெஸ்ட் கிரிக்கெட் வரலாற்றில் பல சாதனைகளை முறியடித்தார். தற்போது அவர் கிரிக்கெட் ஜாம்பவான் டான் பிராட்மேனின் நான்கு சாதனைகளை முறியடிக்கும் வாய்ப்பை பெற்று இருக்கிறார்.

டான் பிராட்மேனின் சாதனைகளை முறியடிக்க வாய்ப்பு!

இங்கிலாந்துக்கு எதிரான மீதமுள்ள மூன்று டெஸ்ட் போட்டிகளிலும் சுப்மன் கில் தனது அபாரமான ஆட்டத்தைத் தொடர்ந்தால், டான் பிராட்மேன் சுமார் 100 ஆண்டுகளாக வைத்திருக்கும் நான்கு உலக சாதனைகளை முறியடிக்கும் வாய்ப்பு உள்ளது.

கேப்டனாக ஒரு டெஸ்ட் தொடரில் அதிக ரன்கள்: 1936-37 ஆஷஸ் தொடரில் பிராட்மேன் கேப்டனாக 810 ரன்கள் எடுத்ததே கேப்டன் ஒருவர் டெஸ்ட் தொடரில் அதிக ரன்கள் எடுத்த சாதனையாக உள்ளது. கில்லுக்கு அதை முறியடிக்க இன்னும் 225 ரன்களே தேவை. இது பிராட்மேனுக்கு கேப்டனாக முதல் தொடர் என்பதும் குறிப்பிடத்தக்கது. சுப்மன் கில் தனது முதல் தொடரில் கேப்டனாக இந்த சாதனையை முறியடிக்க வாய்ப்புள்ளது.

ஒரு டெஸ்ட் தொடரில் அதிக ரன்கள் (மொத்தம்): இது சற்று சவாலான சாதனை என்றாலும், கில்லுக்கு இதுவும் சாத்தியமே. 1930 ஆஷஸ் தொடரில் பிராட்மேன் 974 ரன்கள் எடுத்தது ஒரே டெஸ்ட் தொடரில் ஒரு பேட்ஸ்மேன் எடுத்த அதிகபட்ச ரன்கள் என்ற சாதனையாக உள்ளது. கில் தற்போது 390 ரன்கள் பின்தங்கி இருந்தாலும், அவரது தற்போதைய ஃபார்ம் மற்றும் எஞ்சியிருக்கும் மூன்று டெஸ்ட் போட்டிகளைக் கருத்தில் கொண்டு, இந்த அசைக்க முடியாத சாதனைக்கு அச்சுறுத்தல் ஏற்பட்டுள்ளது.

கேப்டனாக 1000 டெஸ்ட் ரன்களை வேகமாக கடந்தவர்: கேப்டனாக 1000 டெஸ்ட் ரன்களை வெறும் 11 இன்னிங்ஸ்களில் எட்டிய சாதனை பிராட்மேனுக்கு சொந்தமானது. கில் அடுத்த ஆறு இன்னிங்ஸ்களில் 415 ரன்கள் எடுத்தால் இந்தச் சாதனையை முறியடிக்க முடியும்.

ஒரு டெஸ்ட் தொடரில் அதிக சதங்கள்: கில் முதல் இரண்டு டெஸ்ட் போட்டிகளில் மூன்று சதங்கள் அடித்துள்ளார். வெஸ்ட் இண்டீஸ் அணியின் கிளைட் வால்காட் 1955 இல் ஆஸ்திரேலியாவுக்கு எதிராக ஒரு தொடரில் அடித்த ஐந்து சதங்கள் சாதனைகளை சுப்மன் கில் முறியடிக்க வாய்ப்பு உள்ளது. பிராட்மேன் கேப்டனாக ஒரு தொடரில் அதிகபட்சமாக நான்கு சதங்கள் அடித்துள்ளார். கில் இந்தச் சாதனையை சமன் செய்ய இன்னும் இரண்டு சதங்கள் மட்டுமே தேவை.

கோலி, கவாஸ்கர் சாதனைகளும் கில்லின் இலக்கு!

பிராட்மேனின் உலக சாதனைகளைத் தவிர, சுப்மன் கில் பல இந்திய சாதனைகளையும் நெருங்கி வருகிறார். இந்திய கேப்டனாக ஒரு தொடரில் அதிக ரன்கள் எடுத்த சுனில் கவாஸ்கரின் 732 ரன்கள் சாதனையை முறியடிக்க சுப்மன் கில்லுக்கு இன்னும் 148 ரன்கள் மட்டுமே தேவை. இங்கிலாந்தில் ஒரு டெஸ்ட் தொடரில் இந்திய வீரர் எடுத்த அதிக ரன்கள் என்ற ராகுல் டிராவிட்டின் 602 ரன்கள் சாதனையை முறியடிக்க வெறும் 18 ரன்கள் மட்டுமே தேவை.

இங்கிலாந்துக்கு எதிராக ஒரு தொடரில் இந்திய வீரர் எடுத்த அதிக ரன்கள் என்ற யஷஸ்வி ஜெய்ஸ்வாலின் 712 ரன்கள் சாதனையை முறியடிக்க 127 ரன்கள் மட்டுமே தேவை. இந்திய கேப்டனாக இங்கிலாந்துக்கு எதிராக விராட் கோலியின் 655 ரன்கள் சாதனையை முறியடிக்க 91 ரன்கள் குறைவாக உள்ளார்.