IND vs ENG: ஹர்திக் செய்த செயல்.. நொந்து போன சிவம் துபே.. மன்னிப்பு கேட்டு சமாளித்த பாண்டியா

மும்பை: 2026 டி20 உலகக் கோப்பை தொடரின் இரண்டாவது அரையிறுதிப் போட்டியில் இங்கிலாந்து அணிக்கு எதிராக இந்திய அணி பேட்டிங்கில் மிகச் சிறப்பான ஆட்டத்தை வெளிப்படுத்தி பெரிய ஸ்கோரை பதிவு செய்துள்ளது. இந்தப் போட்டியில் பேட்டிங் செய்து கொண்டிருந்தபோது, ஹர்திக் பாண்டியாவின் தவறான அழைப்பால் சக வீரர் சிவம் துபே ரன் அவுட் செய்யப்பட்டார். தான் செய்த தவறை உணர்ந்த பாண்டியா உடனடியாக அவரிடம் மன்னிப்பு கேட்ட சம்பவம் ரசிகர்கள் மத்தியில் பேசுபொருளாகியுள்ளது.

இந்தியா மற்றும் இங்கிலாந்து அணிகள் மோதும் இந்த முக்கியமான அரையிறுதிப் போட்டியில் டாஸ் வென்ற இங்கிலாந்து அணி முதலில் பந்துவீச்சைத் தேர்வு செய்தது. இதன்படி முதலில் பேட்டிங் செய்ய களமிறங்கிய இந்திய அணியில் தொடக்க வீரர் அபிஷேக் சர்மா 9 ரன்கள் மட்டுமே எடுத்து ஏமாற்றமளித்தார். ஆனால், மற்றொரு தொடக்க வீரரான சஞ்சு சாம்சன் பொறுப்பாகவும் அதேசமயம் வேகமாகவும் விளையாடி 42 பந்துகளில் 89 ரன்கள் குவித்து ஆட்டமிழந்தார். கேப்டன் சூர்யகுமார் யாதவ் 11 ரன்களில் விக்கெட்டை பறிகொடுத்தாலும், இஷான் கிஷன் தனது பங்கிற்கு 18 பந்துகளில் 39 ரன்கள் சேர்த்தார்.

ரன் அவுட் செய்த ஹர்திக் பாண்டியா

இதன் பின்னர் சிவம் துபே மற்றும் ஹர்திக் பாண்டியா ஆகியோர் ஜோடி சேர்ந்து அணியின் ஸ்கோரை உயர்த்தும் பணியில் ஈடுபட்டனர். இருவரும் ரன்களைச் சேர்த்து வந்த நிலையில், ஆட்டத்தின் பதினெட்டாவது ஓவரில் அந்த எதிர்பாராத ரன் அவுட் சம்பவம் நிகழ்ந்தது. அந்த ஓவரின் மூன்றாவது பந்தை எதிர்கொண்ட ஹர்திக் பாண்டியா, பந்தை அடித்துவிட்டு ரன் எடுக்க ஓடுமாறு சைகை செய்தார். இதனை நம்பி சிவம் துபே பாதி தூரம் ஓடி வந்த பிறகு, வேண்டாம் என பாண்டியா மீண்டும் மாற்றி சைகை செய்தார்.

ஆனால், பாதி தூரத்தைக் கடந்த சிவம் துபேவால் மீண்டும் தனது இடத்திற்குத் திரும்ப முடியவில்லை. அதற்குள் அவர் இங்கிலாந்து அணியால் ரன் அவுட் செய்யப்பட்டார். ஆட்டமிழக்கும் போது அவர் 25 பந்துகளில் 43 ரன்கள் எடுத்திருந்தார். தன்னுடைய தவறான அழைப்பால்தான் சிவம் துபே அவுட் ஆனார் என்பதை உணர்ந்த ஹர்திக் பாண்டியா, ஆடுகளத்திலேயே உடனடியாக அவரிடம் மன்னிப்பு கேட்டார்.

IND vs ENG: சஞ்சுன்னா பிளவர்னு நினைச்சியா ஃபயரு டா.. மரண அடி அடித்த சாம்சன்.. கொண்டாடிய ரசிகர்கள்

253 ரன்கள் குவித்து இந்திய அணி அசத்தல்

இந்த ரன் அவுட் மூலம் இந்திய அணி தனது ஐந்தாவது விக்கெட்டை இழந்தது. அதன் பிறகு களமிறங்கிய திலக் வர்மா, ஹர்திக் பாண்டியாவுடன் இணைந்து ரன்களைச் சேர்த்தார். இறுதி கட்டத்தில் சிறப்பாக ஆடிய திலக் வர்மா 7 பந்துகளில் 21 ரன்கள் எடுத்து ஆட்டமிழந்தார். மறுபுறம் ஹர்திக் பாண்டியாவும் ஆட்டத்தின் கடைசி ஓவரில் விக்கெட்டை இழந்தார். 20வது ஓவரின் ஐந்தாவது பந்தில் 2வது ரன் எடுக்க முயற்சி செய்தபோது பாண்டியாவும் ரன் அவுட் ஆனார்.

IND vs ENG: அரையிறுதியில் இந்திய கேப்டன் எடுத்த அதிரடி முடிவு.. பிளேயிங் 11 என்ன?

ஹர்திக் பாண்டியா 12 பந்துகளில் 27 ரன்கள் எடுத்தார். பேட்ஸ்மேன்களின் கூட்டு முயற்சியால் இந்திய அணி 20 ஓவர்கள் முடிவில் 7 விக்கெட்டுகள் இழப்பிற்கு 253 ரன்கள் என்ற மிகப்பெரிய ஸ்கோரைப் பதிவு செய்தது. இறுதிப்போட்டிக்கு முன்னேற இங்கிலாந்து அணிக்கு 254 ரன்கள் இலக்காக நிர்ணயிக்கப்பட்டது.