இது டெஸ்ட் மேட்ச்சே இல்லை.. பவுலர்கள் செய்த சொதப்பல்.. 20 ஓவரில் 126 ரன் எடுத்து இங்கிலாந்து அதிரடி

லண்டன்: இந்தியா மற்றும் இங்கிலாந்துக்கு இடையேயான 5வது மற்றும் கடைசி டெஸ்ட் போட்டியின் இரண்டாம் நாளில், இங்கிலாந்து அணி தனது முதல் இன்னிங்ஸில் அதிரடியான ஆட்டத்தை வெளிப்படுத்தி இந்திய அணிக்கு அதிர்ச்சி அளித்துள்ளது.

குறிப்பாக, அந்த அணி வெறும் 14.4 ஓவர்களில் 100 ரன்களைக் கடந்து, டெஸ்ட் கிரிக்கெட்டில் இந்தியாவிற்கு எதிராக அதிவேகமாக சதம் அடித்த மூன்றாவது அணி என்ற சாதனையைப் படைத்துள்ளது. இதன் மூலம் இந்திய வேகப் பந்துவீச்சாளர்கள் சொதப்பி உள்ளனர்.

நேற்றைய முதல் நாள் ஆட்ட முடிவில், இந்திய அணி 6 விக்கெட் இழப்பிற்கு 204 ரன்கள் எடுத்திருந்தது. கருண் நாயர் 52 ரன்களுடன் களத்தில் இருந்தார். இரண்டாம் நாள் ஆட்டம் தொடங்கிய சிறிது நேரத்திலேயே, இந்திய அணி தனது மீதமுள்ள 4 விக்கெட்டுகளையும் வெறும் 20 ரன்களுக்குள் இழந்து, 224 ரன்களுக்கு ஆல் அவுட் ஆனது. இங்கிலாந்து தரப்பில் சிறப்பாக பந்துவீசிய கஸ் அட்கின்சன் 5 விக்கெட்டுகளை வீழ்த்தி அசத்தினார்.

இங்கிலாந்தின் பதிலடி

இதையடுத்து, தனது முதல் இன்னிங்ஸைத் தொடங்கிய இங்கிலாந்து அணி, டெஸ்ட் போட்டி என்பதை மறந்து டி20 போட்டி போல விளையாடத் தொடங்கியது. தொடக்க ஆட்டக்காரர்களான ஜாக் கிராலி மற்றும் பென் டக்கெட் ஆகியோர் இந்திய பந்துவீச்சை நாலாபுறமும் சிதறடித்தனர். குறிப்பாக, ஜாக் கிராலி வெறும் 42 பந்துகளில் தனது அரைசதத்தைப் பதிவு செய்தார்.

இந்த ஜோடியின் அதிரடியால், இங்கிலாந்து அணி மதிய உணவு இடைவேளையின் போது, 20 ஓவர்களில் 1 விக்கெட் இழப்பிற்கு 126 ரன்கள் குவித்தது. அப்போது, அந்த அணியின் ரன் ரேட் ஓவருக்கு 6க்கும் மேல் இருந்தது.

இந்திய அணி வீசிய முதல் 20 ஓவர்களில் முகமது சிராஜ், பிரசித் கிருஷ்ணா மற்றும் ஆகாஷ் தீப் ஆகிய மூவர் மட்டுமே பந்து வீசி இருந்தனர். இவர்களில் அனுபவ பந்துவீச்சாளரான சிராஜ் ஓவருக்கு 7 ரன்களுக்கும் மேல் வாரி இறைத்து இருந்தார். மற்ற இருவரும் சராசரியாக ஓவருக்கு 5.50க்கும் மேல் விட்டுக் கொடுத்து இருந்தனர்.

புதிய சாதனை

இந்த போட்டியில், இங்கிலாந்து அணி 14.4 ஓவர்களில் 100 ரன்களை எட்டியது. இதன் மூலம், டெஸ்ட் கிரிக்கெட் வரலாற்றில் இந்தியாவிற்கு எதிராக அதிவேகமாக சதம் அடித்த மூன்றாவது அணி என்ற பெருமையை இங்கிலாந்து பெற்றுள்ளது. இதற்கு முன், ஆஸ்திரேலியா அணி 2011-12ல் 14 ஓவர்களிலும், வங்கதேச அணி 2007ல் 14.1 ஓவர்களிலும் இந்தியாவிற்கு எதிராக 100 ரன்களை கடந்திருந்தன.

இங்கிலாந்து அணியின் இந்த அதிரடியான ஆட்டம், இந்திய அணிக்கு பெரும் பின்னடைவை ஏற்படுத்தியுள்ளது. முதல் இன்னிங்ஸில் குறைந்த ரன்களுக்கு சுருண்டதோடு, இங்கிலாந்து அணியின் வேகமான ரன் குவிப்பையும் கட்டுப்படுத்த முடியாமல் இந்திய பந்துவீச்சாளர்கள் திணறி வருகின்றனர். இந்த போட்டியின் மூலம், இங்கிலாந்து அணி தொடரை சமன் செய்யும் முனைப்பில் தீவிரமாக உள்ளது குறிப்பிடத்தக்கது.