IND vs ENG: விராட் கோலி ஏமாற்றம்.. ரிவியூ கூட எடுக்காமல் சோகத்தில் சென்றார்.. அடித்த ரன் எவ்வளவு?

பர்மிங்காம்: இங்கிலாந்து அணிக்கு எதிரான முதலாவது ஒருநாள் போட்டியில் இந்திய அணி பேட்டிங்கில் தடுமாறியது. பர்மிங்காமில் நடைபெற்ற இந்த ஆட்டத்தில் பெரிதும் எதிர்பார்க்கப்பட்ட நட்சத்திர பேட்ஸ்மேன் விராட் கோலி வெறும் 5 ரன்களில் ஆட்டமிழந்து ரசிகர்களை ஏமாற்றினார். முதலில் பேட்டிங் செய்த இங்கிலாந்து அணி 258 ரன்கள் குவித்தது. இலக்கை நோக்கி விளையாடிய இந்திய அணியின் தொடக்க ஆட்டக்காரர் ரோஹித் சர்மா பவர்பிளேயின் போதே ஆட்டமிழந்தார். இதையடுத்து எட்டாவது ஓவரில் விராட் கோலி களம் புகுந்தார்.

ஜோஃப்ரா ஆர்ச்சர் வீசிய ஒன்பதாவது ஓவரின் இரண்டாவது பந்தில் கோலி ஒரு பவுண்டரியை அடித்தார். இருப்பினும், அடுத்த பந்திலேயே ஆர்ச்சர் அதற்குப் பதிலடி கொடுத்தார். கோலியை LBW முறையில் ஆட்டமிழக்கச் செய்து வெளியேற்றினார். நேராக வீசப்பட்ட அந்தப் பந்தை கோலி நகர்ந்து ஃபிலிக் செய்ய முயன்றார்.

ஆனால், பந்து அவரது பேடில் பலமாகத் தாக்கியது. அது விக்கெட்டைத் தாக்கும் என்பது உறுதியாகத் தெரிந்ததால், எதிர்முனையில் இருந்த சுப்மன் கில்லுடன் சிறிது ஆலோசித்த போதிலும், கோலி ரிவியூ எடுக்காமல் மைதானத்தை விட்டு வெளியேறினார்.தொடைப் பகுதியில் ஏற்பட்ட காயம் காரணமாக ஆப்கானிஸ்தான் தொடரில் விளையாடாத கோலி, இப்போட்டியின் மூலம் மீண்டும் களம் திரும்பினார்.

IND vs ENG: பவுண்டரி லைனில் பும்ரா பிடித்த கேட்ச்.. போட்டியையே மாற்றிய அந்த 2 பந்து

ஆனால், வெறும் 6 பந்துகளில் 5 ரன்கள் மட்டுமே எடுத்து ஏமாற்றமளித்தார். இதனால் இரண்டு விக்கெட்டுகளை அடுத்தடுத்து இழந்த இந்தியா, ஒன்பது ஓவர்களுக்குள் 48 ரன்களுக்கு 2 விக்கெட்டுகளை இழந்து தடுமாறியது. மூத்த வீரர்களுக்கு வயதாகி வரும் நிலையில், 2027 ஒருநாள் உலகக் கோப்பை அணியில் நீடிப்பதற்கும், தொடர்ந்து சிறப்பான ஆட்டத்தை வெளிப்படுத்துவதற்கும் கடும் அழுத்தம் நிலவுகிறது.

இதனால், கார்டிஃப் நகரில் வரும் ஜூலை 16 ஆம் தேதி வியாழக்கிழமை நடைபெறவுள்ள இரண்டாவது ஒருநாள் போட்டியில் விராட் கோலி கம்பேக் தர தீவிரமாக முயற்சிப்பார். இங்கிலாந்து மண்ணில் கோலியின் ஒருநாள் போட்டி சாதனைகள் மிகவும் சிறப்பாக உள்ளன. அங்கு விளையாடியுள்ள 34 போட்டிகளில் 1 சதம் மற்றும் 12 அரைசதங்களுடன் 50.14 சராசரியோடு 1354 ரன்கள் எடுத்துள்ளார்.

IND vs ENG: பும்ரா மாபெரும் சாதனை.. முதல் இந்திய பவுலர் என்ற பெருமை

இந்த ஆண்டிலும் ஒருநாள் போட்டிகளில் அவரது செயல்பாடு ஓரளவுக்கு நன்றாகவே உள்ளது. 4 போட்டிகளில் விளையாடி 1 சதம் மற்றும் 1 அரைசதத்துடன் 61.25 சராசரியில், 104.70 ஸ்டிரைக் ரேட்டுடன் 245 ரன்களை அவர் குவித்துள்ளார்.கடந்த 2022-ஆம் ஆண்டு இந்தியா இங்கிலாந்திற்கு சுற்றுப்பயணம் மேற்கொண்ட போது, கோலி இரண்டு ஒருநாள் போட்டிகளில் வெறும் 33 ரன்கள் மட்டுமே எடுத்திருந்தார். தற்போதும் தொடரின் தொடக்க ஆட்டத்தில் சுமாரான ஆட்டத்தையே வெளிப்படுத்தியுள்ளதால், மீதமுள்ள போட்டிகளில் சிறப்பாக விளையாட வேண்டிய அழுத்தம் அவருக்கு ஏற்பட்டுள்ளது.