இந்தியாவுக்கு சிறப்பான தொடக்கம் காத்திருக்கு! இங்கிலாந்தில் வெல்ல என்ன செய்யனும்-EX வீரர்கள் கருத்து

மும்பை: இங்கிலாந்துக்கு சுற்றுப் பயணம் மேற்கொண்டுள்ள இந்திய அணி 5 டெஸ்ட் போட்டிகள் கொண்ட தொடரில் விளையாடுகிறது. இந்தப் போட்டிகளில் ஷுப்மன் கில் தலைமையிலான இந்திய அணி வெற்றி பெற, அங்குள்ள நிலைமைகளுக்கு ஏற்ப விளையாட வேண்டும் என்று முன்னாள் கிரிக்கெட் வீரர்கள் அறிவுறுத்தினர்.

ரோஹித் சர்மா, விராட் கோலி மற்றும் சுழற்பந்து வீச்சாளர் ரவிச்சந்திரன் அஷ்வின் ஆகியோரின் ஓய்வு மற்றும் வேகப்பந்து வீச்சாளர் முகமது ஷமி இடம்பெறாததால், இந்திய அணி ஒரு மாற்று காலகட்டத்தை எதிர்கொள்கிறது. இது குறித்து பேசிய சேதேஷ்வர் புஜாரா, அணி வெற்றி பெற ஒவ்வொரு வீரரும் பங்களிக்க வேண்டும் என்று கூறினார்.

"இங்கிலாந்து செல்லும் இந்திய அணி, அங்குள்ள நிலைமைகளுக்கு விரைவாக தயார்படுத்தி கொண்டு அதற்கேற்ப விளையாட வேண்டும். இங்கிலாந்து நிலைமைகளில் பேட்டிங், பந்துகளை பொறுமையாக எதிர்கொள்வது மற்றும் ஒருவருக்கு ஒருவர் ஆதரவு அளிப்பது மிக முக்கியம் என்று நம்புகிறேன்," என்று புஜாரா கூறினார்.

"ஒவ்வொரு வீரரும் பங்களிக்க வேண்டும் மற்றும் முன்னுள்ள சவால்களை மதிக்க வேண்டும். இந்தப் பயணம் ஒவ்வொரு வீரருக்கும், வளர்ச்சி மற்றும் வெற்றிக்கு ஒரு சிறந்த வாய்ப்பாக இருக்கும் என்று நான் நம்புகிறேன்," என்று புஜாரா, தெரிவித்தார். முன்னாள் இடது கை வேகப்பந்து வீச்சாளர் ஆஷிஷ் நெஹ்ராவும் இதே கருத்தை வெளிப்படுத்தினார்.

"எனக்கு, இங்கிலாந்து பயணம் எப்போதும் சவாலானது, ஆனால் மிகவும் வேடிக்கையானது. நிலைமைகளுக்கு ஏற்ப நாம் விளையாடுவது முக்கியமாக இருக்கும், மற்றும் எங்கள் வீரர்கள் அதைச் செய்யும் திறன் கொண்டவர்கள். பந்துவீச்சு ரீதியாக நமக்கு அனுபவமும், நிலைத்தன்மையும் உள்ளது," என்றார்.

இது குறித்து பேசிய முன்னாள் இந்திய ஆல்ரவுண்டர் இர்ஃபான் பதான்,"இங்கிலாந்தில் இந்தியாவின் புதிய அணி கடினமான சவாலை எதிர்கொள்கிறது, ஆனால் ஒரு ஆல்ரவுண்டராக, சவாலுக்கு தயாராக இருப்பது முக்கியம் என்பதை நான் அறிவேன். கில்லின் தலைமை, பண்ட்டின் ஆற்றல் மற்றும் இந்தியாவின் இளம் திறமைகள் முன்னேற வேண்டும்."

"இங்கிலாந்து நிலைமைகள் ஒவ்வொரு திறனையும் சோதிக்கின்றன - ஸ்விங், சீம் இந்திய வீரர்களுக்கு சவாலாக இருக்கும். கள சூழலுக்கு நம்மை தயார்படுத்தி கொண்டால், கடந்த காலங்களில் புதிய அணிகள் சந்தர்ப்பத்தைப் பயன்படுத்தி உயர்ந்ததைப் போல, இங்கிலாந்தை ஆச்சரியப்படுத்த முடியும்," என்றார்.

இது குறித்து கருத்து தெரிவித்துள்ள வாகன், 25 வயதான கில்லை டெஸ்ட் கேப்டனாக நியமித்தது ஒரு "தைரியமான முடிவு" என்றும், இது அவர்களுக்கு ஒரு முக்கியமான பயணமாக இருக்கலாம் என்றும் கூறினார்.
"இது உறுதியாகிவிட்டது. ஷுப்மன் கில் இந்திய டெஸ்ட் கிரிக்கெட்டின் புதிய முகமாக, இங்கிலாந்து தொடருக்கு கேப்டனாக பொறுப்பேற்றுள்ளார். ரோஹித் மற்றும் கோலி போன்ற மாபெரும் வீரர்களின் ஓய்வுக்குப் பிறகு, புதிய தோற்றமுடைய அணியுடன் ஒரு இளம் தலைவரை நம்புவது தைரியமான முடிவு," என்று வாகன் கூறினார்.

"கில்லுக்கு, குறிப்பாக வெளிநாட்டு மைதானங்களில், நிறைய நிரூபிக்க வேண்டியுள்ளது, ஆனால் பெரிய தருணங்களுக்கு சாதிக்கும் உத்வேகம் உள்ளது என்பதை அவர் காட்டியுள்ளார். ரிஷப் பண்ட் அவரது துணைக் கேப்டனாகவும், தங்கள் முத்திரையை பதிக்க ஆர்வமாக உள்ள அணியுடனும், இந்த இங்கிலாந்து பயணம் இந்தியாவின் அடுத்த தலைமுறைக்கு ஏதோ சிறப்பான தொடக்கமாக இருக்கலாம். இந்த இளம் வீரர்கள் சந்தர்ப்பத்தைப் பயன்படுத்தி உயர்ந்தால் ஆச்சரியப்பட வேண்டாம்," என்று வாகன் கூறினார்.