உலககோப்பை வென்று தந்தவரை எப்படி நீக்குவீங்க.. கொஞ்சம் பொறுமையாக இருங்க.. அம்பத்தி ராயுடு கருத்து

மும்பை: இந்திய டி20 அணியில் வைபவ் சூர்யவன்ஷி சேர்க்கப்பட்டிருந்தாலும், அவரை உடனடியாக ஆடுகளத்திற்குள் இறக்க இந்திய அணி நிர்வாகம் தயக்கம் காட்டி வருகிறது. இந்திய அணியில் தேர்வு செய்யப்பட்ட மிக இளம் வீரர் என்ற பெருமையை சூர்யவன்ஷி பெற்றுள்ளார்.

வைபவ் சூர்யவன்ஷி ஒரு அசாதாரண திறமைசாலி என்பதைப் பலரும் பாராட்டினாலும், சர்வதேச கிரிக்கெட்டில் அவருக்கு இதுதான் சரியான நேரமா அல்லது ஏற்கனவே தங்களை நிரூபித்த வீரர்களுக்கே தொடர்ந்து வாய்ப்பளிக்க வேண்டுமா என்ற விவாதம் தீவிரமாக எழுந்துள்ளது.

மிகச்சிறப்பான ஐபிஎல் 2026 சீசனுக்குப் பிறகு சூர்யவன்ஷி இந்திய அணியின் பேசுபொருளாக மாறினார். நடந்து முடிந்த ஐபிஎல் சீசனில் அவர் 16 போட்டிகளில் விளையாடி 237.31 என்கிற அபாரமான ஸ்டிரைக் ரேட்டுடன் 776 ரன்களைக் குவித்தார். சுப்மன் கில், விராட் கோலி, சாய் சுதர்சன் போன்ற முன்னணி வீரர்களை முந்தி ஆரஞ்சு தொப்பியை (Orange Cap) வென்றதோடு, இந்த சாதனையைப் படைத்த மிக இளம் வீரர் என்ற வரலாற்றையும் படைத்தார்.

அயர்லாந்துடன் தோல்விக்கு ஸ்ரேயாஸ் ஐயர் மீது பழிபோட முயற்சி.. கம்பீர் மீது மனோஜ் திவாரி மறைமுக தாக்கு

அயர்லாந்து அணிக்கு எதிரான டி20 தொடரில் இந்தியா வரலாற்று தோல்வியைச் சந்தித்ததைத் தொடர்ந்து, சூர்யவன்ஷியை அணியில் சேர்க்க வேண்டும் என்ற குரல்கள் வலுத்து வருகின்றன. இருப்பினும், டி20 உலகக் கோப்பையை வென்ற இந்திய அணி ஓரிரு போட்டிகளில் தோற்றுவிட்டதால் அவசரப்பட்டு எந்த முடிவையும் எடுக்க வேண்டாம் என்று முன்னாள் வீரர் அம்பதி ராயுடு அறிவுறுத்தியுள்ளார்.

இது குறித்து பேசிய அவர், "உலகக் கோப்பையை வென்று கொடுத்து, ஏற்கனவே சிறப்பாகச் செயல்பட்டு வரும் அனுபவம் வாய்ந்த தொடக்க ஆட்டக்காரர்களுக்கே தொடர்ந்து வாய்ப்பளிப்பது மிகவும் முக்கியம். அவர்களுக்குப் போதிய வாய்ப்புகளை வழங்குவது மிகவும் அவசியமானது" என்று ராயுடு கூறினார்.

"சூர்யவன்ஷி தற்போது இந்திய அணியின் உடை மாற்றும் அறையின் சூழல் எப்படி இருக்கிறது, அங்கு என்ன எதிர்பார்க்கப்படுகிறது, அவரது பங்களிப்பு என்னவாக இருக்க வேண்டும் என்பதை அனுபவித்து வருகிறார். இந்த சுற்றுப்பயணத்தில் அவர் கற்றுக்கொள்ளப் போகும் பல விஷயங்கள் எதிர்காலத்தில் அவருக்கு உதவும். ஆனால், நாம் சில போட்டிகளில் வெல்லவில்லை என்பதற்காக ஒரு இருதரப்பு தொடரிலேயே அவரை அவசரமாகக் களம் இறக்க நான் விரும்பவில்லை" என்று அவர் கூறினார்.

பெல்ஃபாஸ்டில் நடந்த இரண்டு போட்டிகள் கொண்ட தொடரில் சஞ்சு சாம்சன் மற்றும் அபிஷேக் சர்மா ஆகியோரையே தொடக்க ஜோடியாகத் தொடர இந்திய அணி முடிவு செய்தது. இருப்பினும், ஐபிஎல் 2026-ல் விளையாடியதைப் போன்ற பேட்டிங்கிற்கு சாதகமான ஆடுகளங்கள் இல்லாததால், இந்திய பேட்டர்கள் ரன் குவிக்கத் திணறினர். இந்திய பேட்டர்கள் இந்த சவாலான ஆடுகளங்களுக்கு தங்களைத் தயார்படுத்திக் கொள்ளவில்லை என்று ராயுடு சுட்டிக்காட்டினார்.

"இல்லை, இதில் நான் ஆச்சரியப்படவில்லை. ஏனெனில் அங்கே அவர்கள் எதிர்கொண்ட சூழ்நிலைகளுக்கு ஏற்ப அவர்கள் போதிய பயிற்சி பெறவில்லை என்று நினைக்கிறேன். பேட்டிங்கிற்கு சாதகமான ஆடுகளங்களில் இருந்து, பந்து சற்று மெதுவாகவும், பக்கவாட்டு நகர்வுகளுடனும் வரும் ஆடுகளங்களுக்குச் சென்று விளையாடுவது எப்போதும் மிகவும் கடினமானது" என்றார்.

IND Vs IRE: 1 ரன் மட்டுமே ஓடிய ஆர்ஸ்தீப் சிங்.. புத்தியை பயன்படுத்துங்க.. தினேஷ் கார்த்திக் காட்டம்

"பெரும்பாலான வீரர்கள் மிக வேகமான பேட்-ஸ்விங் பழக்கத்திற்கு ஆளாகியுள்ளனர். அதனால் பந்தின் வேகத்தைக் கணித்து அதற்கேற்ப தங்கள் பேட்டின் அசைவைக் கட்டுப்படுத்துவது அவர்களுக்கு ஒரு முக்கிய கவலையாக உள்ளது" என்றும் ராயுடு தெரிவித்தார். அடுத்தது இந்திய அணி வரும் புதன்கிழமை இங்கிலாந்துக்கு எதிராக டி20 தொடரில் விளையாடுகிறது.