IND vs NAM: இந்திய அணிக்கு மட்டும் 2 வாய்ப்பு.. எங்களுக்கு கொடுக்கவே இல்ல.. ஐசிசி மீது நமீபியா கேப்டன் புகார்

டெல்லி: டி20 உலககோப்பையில் இந்தியாவுக்கு எதிரான போட்டிக்கு முன்னதாக, நமீபியா அணிக்கு இரவுநேரப் பயிற்சி வழங்கப்படாதது குறித்து அதன் கேப்டன் கெர்ஹார்ட் எராஸ்மஸ் தனது அதிருப்தியை வெளிப்படுத்தியுள்ளார். இந்தியாவுக்கு எதிராக இரவு நேரத்தில் மின்விளக்குவெளிச்சத்தில் நடைபெறவுள்ள போட்டிக்கு முன்னதாக, இரவுநேரப் பயிற்சி நேரம் தரப்படாதது குறித்து நமீபியா கேப்டன் குற்றம்சாட்டியுள்ளார்.

நமீபியா அணி திங்கள்கிழமை நெதர்லாந்துக்கு எதிராகப் பகல் ஆட்டத்தில் விளையாடியது. அதைத் தொடர்ந்து அவர்களது பயிற்சி அமர்வுகள் பகல் நேரத்திலேயே நடைபெற்றன.இதற்கு மாறாக, இந்திய அணிக்கு, போட்டிக்குத் தயாராகும் வகையில் இருமுறை இரவுநேரப் பயிற்சி பெறும் வாய்ப்பைப் பெற்றது. நமீபியாவில் பகல்-இரவு ஆட்டங்களுக்கான உள்கட்டமைப்பு வசதி இல்லாததால், வியாழன் அன்று இந்தியாவுடன் மோதுவதற்கு முன்பு விளக்கு வெளிச்சத்தில் சில பயிற்சிகள் செய்ய வாய்ப்பு வழங்கப்பட்டிருக்க வேண்டும்.

”இந்த ஆட்டத்திற்கு முன் எங்களுக்கு இரவுநேரப் பயிற்சி வழங்கப்படவில்லை. அதற்கான காரணம் எனக்குத் தெரியவில்லை. இந்தியாவுக்கு இரண்டு இரவுநேரப் பயிற்சிகள் கிடைத்துள்ளன என்று நான் நினைக்கிறேன். இப்போது கனடாவுக்கு இரவுநேரப் பயிற்சி இருப்பதாக வெளியே பார்க்கிறேன், நீங்கள் எதை வேண்டுமானாலும் முடிவு செய்யுங்கள். ஆனால் நாங்கள் மைதானத்திற்கு வந்து எங்கள் நமீபிய பாணியில் போராடுவோம்,” என எராஸ்மஸ் கூறினார்.

நமீபியாவில் பகல்-இரவு ஆட்டங்களுக்கான வெள்ளொளி விளக்குகள் இல்லை என்பதை எராஸ்மஸ் சுட்டிக்காட்டினார். இது போன்ற உள்கட்டமைப்பு சவால்களே தங்களுக்கு பெரிய பிரச்சினை என்றும், இந்த அனுபவம் இல்லாத வீரர்களுக்கு இது சாதாரணமாக இருக்காது என்றும் அவர் குறிப்பிட்டார். நேபாளன் பிரீமியர் லீக், ஐ.எல்.டி.20 மற்றும் உலகக் கோப்பைகளில் விளையாடிய சில வீரர்களைத் தவிர மற்ற யாரும் இந்தக் குறிப்பிட்ட வெளிச்சச் சூழலுக்குப் பழகுவது கடினம் என்றார்.

வெள்ளிக்கிழமை பகல் ஆட்டத்தில் ஐக்கிய அரபு எமிரேட்ஸை எதிர்கொள்ளவிருக்கும் கனடா, இந்திய அணியுடன் ஃபெரோஸ் ஷா கோட்லா மைதானத்தில் பயிற்சி செய்ததையும் எராஸ்மஸ் சுட்டிக்காட்டினார். நமீபியா அணி நெதர்லாந்துக்கு எதிரான தனது முதல் ஆட்டத்தில் தோல்வியடைந்தது. மீதமுள்ள லீக் ஆட்டங்களில் அமெரிக்கா மற்றும் பாகிஸ்தானை எதிர்கொள்ளவுள்ளது. இந்த இரண்டு ஆட்டங்களும் பிற்பகல் 3 மணிக்குத் தொடங்க உள்ளன.

ICC ஆண்கள் டி20 உலகக் கோப்பை 2026க்கான நமீபியா அணி: கெர்ஹார்ட் எராஸ்மஸ் (கேப்டன்), ஜான் பால்ட், ஜேன் கிரீன் (விக்கெட் கீப்பர்), மாலன் க்ரூகர், டிலான் லீச்சர், லாரன் ஸ்டீன்காம்ப், ஜான் ஃப்ரைலின்க், ஜான் நிக்கோல் லோஃப்டி-ஈடன், வில்லியம் மைபர்க், ஜே.ஜே. ஸ்மித், ஜாக் பிரசல், மேக்ஸ் ஹெய்ங்கோ, பெர்னார்ட் ஸ்கோல்ட்ஸ், பென் ஷிகாங்கோ, ரூபன் ட்ரம்பெல்மன்.