IND vs NED: குல்தீப் அதிரடி நீக்கம்? இந்திய அணியின் பிளேயிங் லெவனில் மாற்றம்.. சஞ்சய் பங்கர் கணிப்பு

அகமதாபாத்: இந்திய அணி சரியான நேரத்தில் சிறப்பாக விளையாடுவதாக முன்னாள் பேட்டிங் பயிற்சியாளர் சஞ்சய் பாங்கர் தெரிவித்துள்ளார். டி20 உலகக்கோப்பை தொடரில் நெதர்லாந்து அணிக்கு எதிரான இந்தியா தனது கடைசி குரூப் போட்டியில் விளையாட உள்ளது. சூரியகுமார் யாதவ் தலைமையிலான இந்திய அணி, ஏற்கனவே சூப்பர் 8 சுற்றுக்குத் தகுதி பெற்றுவிட்டது.

பிப்ரவரி 15 அன்று கொழும்பில் நடைபெற்ற போட்டியில் பாகிஸ்தானை 61 ரன்கள் வித்தியாசத்தில் வீழ்த்திய பின்னர், அமெரிக்கா மற்றும் நமீபியா அணிகளையும் வென்று தனது இடத்தை இந்தியா உறுதி செய்தது குறிப்பிடத்தக்கது.

இது குறித்து செய்தி நிறுவனம் ஒன்றுக்கு சஞ்சய் பங்கர் அளித்த பேட்டியில், "இந்திய அணி தற்போது உத்வேகம் பெற்றுள்ளது. முதல் போட்டி, பிறகு இரண்டாவது போட்டி, மேலும் எனது பார்வையில் மூன்றாவது போட்டியையும் பார்க்கும் போது, இந்திய அணி மிகச் சிறப்பாக விளையாடி வந்துள்ளது."

"கடினமான சூழலில், சவாலான பிட்ச்சில் அவர்கள் நல்ல ஸ்கோரை அடித்தனர். தரமான சுழற்பந்து வீச்சாளர்களுக்கு எதிராக சிறப்பாக பேட் செய்தனர். இது முன்பு கவலையாக இருந்தது, ஏனெனில் முதல் இரண்டு போட்டிகளில் சுழற்பந்து வீச்சில் விக்கெட்டுகள் வீழ்ந்தன."

"ஆனால், அத்தகைய ஆடுகளத்தில் 18 ஓவர்கள் சுழற்பந்து வீச்சை எதிர்கொண்டு சிறப்பாக பேட் செய்து, எதிரணியை குறைந்த ரன்களுக்கு சுருட்டும்போது, இந்திய அணி சரியான நேரத்தில் உச்சத்தை அடைந்துள்ளதாக நான் நினைக்கிறேன்," என்றார் சஞ்சய் பாங்கர்.

"இந்திய பேட்ஸ்மேன்கள் அகமதாபாத்தில் பேட் செய்வதை விரும்புவார்கள். ஏனெனில் ஆடுகளத்தின் நிலை பேட்டிங்கிற்கு மிகவும் நல்லது. இதுவரை, இந்திய அணி தங்கள் அனைத்து போட்டிகளிலும் முதலில் பேட் செய்துள்ளது. எனது பார்வையில், இந்த போட்டியில் அவர்கள் சேஸ் செய்ய வேண்டிய வாய்ப்பு உள்ளது. ஆனால், ஒருவேளை அவர்கள் சேஸ் செய்ய நேர்ந்தால், ஒரு பெரிய ஸ்கோரை சேஸ் செய்ய வேண்டியிருக்கும் என நான் எதிர்பார்க்கவில்லை. " என்று அவர் தெரிவித்தார்.

இந்தியாவின் தொடக்க ஆட்டக்காரர் இஷான் கிஷன், இந்தத் தொடரில் மூன்று இன்னிங்ஸ்களில் 158 ரன்கள் குவித்து, அணியின் அதிக ரன் எடுத்தவர் பட்டியலில் முதலிடம் பிடித்துள்ளார். அவர் 52.66 சராசரியுடனும், 197.50 ஸ்ட்ரைக் ரேட்டுடனும், இரண்டு அரைசதங்களுடனும் அசத்தியுள்ளார்.

அதே விவாதத்தில், நெதர்லாந்து போட்டிக்கு இந்திய அணியின் ப்ளேயிங் XI-ல் ஒரு சிறிய மாற்றம் ஏற்படும் என சஞ்சய் பாங்கர் கணித்துள்ளார். "அணியின் காம்பினேஷனில் சிறிய மாற்றம் இருக்கலாம், ஏனெனில் இந்திய அணி மூன்றாவது ஒரு வேகப்பந்து வீச்சாளரை களமிறக்கத் தயாராக உள்ளது என்பதை காட்டியுள்ளது. முதல் போட்டியில், அர்ஷ்தீப் மற்றும் சிராஜ் இருவரும் விளையாடினர்."

"பிறகு பும்ரா திரும்பினார். குல்தீப் விளையாட வேண்டியிருந்தபோது, அர்ஷ்தீப் வெளியே அமர வேண்டியிருந்தது. அது களத்தின் நிலையைப் பொறுத்த ஒரு முடிவாகும். ஆகவே, இந்திய அணி அகமதாபாத்தில் விளையாடும் போது, வேகப்பந்து வீச்சுக்கு ஒரு கூடுதல் வாய்ப்பை சேர்க்கலாம் என்று நான் நினைக்கிறேன், அர்ஷ்தீப் குல்தீப்புக்கு பதிலாக வர வாய்ப்புள்ளது."

"சிராஜ் அடிப்படையில் ஜஸ்பிரித் பும்ராவின் மாற்று வீரராக இருந்தார், மேலும் அவர் சிறப்பாக செயல்பட்டுள்ளார். அணியின் பலம் நன்றாக உள்ளது, எனவே யாரும் பெரிதாகக் கருத மாட்டார்கள், ஏனெனில் உலகக் கோப்பை போன்ற போட்டியில், ஒரு வீரர் எத்தனை போட்டிகளில் விளையாடினார் என்பதை விட அணியின் காம்பினேஷன் முக்கியமானது," என சஞ்சய் பங்கர் தெரிவித்தார். இதற்கிடையில், இந்தியா மற்றும் நெதர்லாந்து அணிகள் இதற்கு முன்பு ஒரே ஒரு முறை மட்டுமே மோதியுள்ளன. அது டி20 உலகக் கோப்பை 2022-ல் நடந்த போட்டியாகும், இதில் இந்திய அணி 56 ரன்கள் வித்தியாசத்தில் வெற்றி பெற்றது.