IND vs NZ: பைனலில் இந்த அணி தான் வெல்லும்.. பலமாக இருக்கிறார்கள்.. கங்குலி கணிப்பு

அகமதாபாத்: 2026 டி20 உலகக் கோப்பை இறுதிப் போட்டியில் இந்தியா, நியூசிலாந்தை இன்று இரவு அகமதாபாத்தில் உள்ள நரேந்திர மோடி மைதானத்தில் எதிர்கொள்கிறது. இந்திய அணி இந்த உலகக் கோப்பையை நிச்சயம் வெல்லும் என்று முன்னாள் இந்திய கேப்டன் சௌரவ் கங்குலி நம்பிக்கை தெரிவித்துள்ளார். அணியின் பலமான வரிசையை அவர் இதற்கு ஒரு முக்கிய காரணமாகக் குறிப்பிட்டுள்ளார்.

சூரியகுமார் யாதவ் தலைமையிலான இந்திய அணி, இங்கிலாந்தை வீழ்த்தி இறுதிப் போட்டிக்கு முன்னேறியது. அதே சமயம், சௌத் ஆப்பிரிக்காவை வீழ்த்தி நியூசிலாந்து இறுதிப் போட்டிக்குத் தகுதி பெற்றது. நடப்பு சாம்பியனாக களமிறங்கிய இந்தியா, முதல் சுற்றிலேயே வலுவான தொடக்கத்தைக் கண்டது. குரூப் ஏ பிரிவில் அமெரிக்கா, நமீபியா, பாகிஸ்தான், நெதர்லாந்து ஆகிய அணிகளுக்கு எதிராக அனைத்து நான்கு போட்டிகளிலும் வெற்றி பெற்று சூப்பர் 8 சுற்றுக்கு முன்னேறியது.

சூப்பர் 8 சுற்றில், இந்தியாவுக்கு பின்னடைவு ஏற்பட்டது. தென் ஆப்பிரிக்காவிடம் 76 ரன்கள் வித்தியாசத்தில் தோல்வியடைந்தது. எனினும், அடுத்த இரண்டு போட்டிகளிலும் கட்டாய வெற்றி என்ற நிலையில் இந்திய அணி, ஜிம்பாப்வே மற்றும் வெஸ்ட் இண்டீஸை வீழ்த்தி அரையிறுதிப் போட்டிக்கு தகுதி பெற்றது. வான்கடே மைதானத்தில் நடைபெற்ற அரையிறுதிப் போட்டியில், இங்கிலாந்தை இந்தியா எதிர்கொண்டது.

IND vs NZ: நரேந்திர மோடி மைதானம் ராசி இல்லையா? யார் சொன்னது? இந்திய அணியின் ரெக்கார்டை பாருங்க

இது டி20 உலகக் கோப்பை அரையிறுதியில் இரு அணிகளும் தொடர்ச்சியாகச் சந்திக்கும் மூன்றாவது முறையாகும். இந்தப் போட்டியில் ரன் மழை பொழிய இந்திய அணி 254 ரன்கள் என்ற இமாலய இலக்கை நிர்ணயித்தது. இங்கிலாந்தும் அதிரடி காட்டிய நிலையில், பும்ராவின் அபார பந்துவீச்சு இந்தியாவை ஏழு ரன்கள் வித்தியாசத்தில் த்ரில் வெற்றி பெறச் செய்து இறுதிப் போட்டிக்கு அழைத்துச் சென்றது. நியூசிலாந்து அணியும், தென் ஆப்பிரிக்காவை வீழ்த்தி, ஒரு போட்டியில் மட்டுமே தோல்வியடைந்து இறுதிப் போட்டிக்கு வந்துள்ளது.

வரலாற்று ரீதியாக, இந்தியா டி20 உலகக் கோப்பை இறுதிப் போட்டிகளில் நியூசிலாந்தை ஒருபோதும் தோற்கடித்ததில்லை. இருப்பினும், இந்திய அணியின் முன்னாள் கேப்டன் சௌரவ் கங்குலி, முன்றாவது முறையாக உலகக் கோப்பையை வெல்லும் என்பதில் உறுதியாக இருக்கிறார். ஏ.என்.ஐ செய்தி நிறுவனத்திடம் அவர் கூறுகையில், "இந்த உலகக் கோப்பையை இந்தியா வெல்லும். அவர்கள் மிகவும் வலிமையானவர்கள். அவர்களின் அனைத்து வீரர்களாலும் சிக்ஸர்களை அடிக்க முடியும். அவர்கள் நிச்சயம் வெற்றி பெறுவார்கள்," என்றார்.

இதனிடையே, இந்தியக் கேப்டன் சூரியகுமார் யாதவ், அழுத்தம் இருப்பதை ஒப்புக்கொண்டாலும், அதே நேரத்தில் இந்தியாவில் உலகக் கோப்பை இறுதிப் போட்டியில் விளையாடும் அரிய வாய்ப்பு என்பதால் மிகுந்த உற்சாகத்துடன் இருப்பதாகத் தெரிவித்தார். சனிக்கிழமை செய்தியாளர்களிடம் பேசிய அவர், "ஆம், நிச்சயமாக, ஒரு தலைவராக என் மீது நிச்சயமாக ஒரு அழுத்தம் இருக்கும். அழுத்தம் இருக்காது என்று நான் சொல்லவில்லை. ஆனால் அதே நேரத்தில், ஒரு உலகக் கோப்பை இறுதிப் போட்டியில் விளையாடும் வாய்ப்பு எப்போதும் கிடைப்பதில்லை என்பதால் மிகுந்த உற்சாகமும் உள்ளது." என்றார்.

IND vs NZ: பைனலில் 300 ரன்கள் கூட அடிக்கலாம்.. அகமதாபாத் ஆடுகளத்தை மாற்றிய ஐசிசி.. விவரம்

"இந்த நிலைக்காக நாங்கள் கடந்த இரண்டு ஆண்டுகளாக மிக நன்றாகத் தயாராகி வருகிறோம். 2023-இல் நாங்கள் விட்ட அதே மைதானத்திற்குக் களம் மீண்டும் வந்துள்ளது. சவாலான சூழ்நிலைகளில் சிறந்த மற்றும் துணிச்சலான கிரிக்கெட்டை விளையாடுவோம் என்று நம்புகிறேன்," என்று சூர்யகுமார் கூறினார்.