"மேட்ச் கைவிட்டுப் போச்சுன்னு நினைச்சேன் அப்போது..".. திலக், நிதிஷ் ஆட்டத்தால் மிரண்ட ஸ்ரேயாஸ் ஐயர்

கிறைஸ்ட்சர்ச்: நியூசிலாந்து அணிக்கு எதிரான 2-வது டி20 போட்டியில் கடைசி ஓவரில் சேஸிங்கை முடித்து, 4 விக்கெட் வித்தியாசத்தில் திரில் வெற்றி பெற்றது இந்திய அணி. இந்த வெற்றிக்கு பின் பேசிய இந்திய அணியின் கேப்டன் ஸ்ரேயாஸ் ஐயர், ஆட்டத்தின் நடுவே அடுத்தடுத்து விக்கெட்டுகள் சரிந்த போது ஆட்டம் தங்களது கையை விட்டுப் போய்விட்டதாகவே தான் நினைத்ததாக குறிப்பிட்டார். இக்கட்டான சூழலில் அபாரமாக விளையாடி அணியை வெற்றிப் பாதைக்கு அழைத்துச் சென்ற திலக் வர்மா மற்றும் நிதிஷ் குமார் ரெட்டி கூட்டணியை அவர் மனம் திறந்து பாராட்டியுள்ளார்.

போட்டிக்குப் பிந்தைய நிகழ்வில் பேசிய ஸ்ரேயாஸ் ஐயர், "எங்கள் அணியில் உள்ள ஒவ்வொரு வீரருமே தனி ஆளாகப் போட்டியை வென்று கொடுக்கும் திறமை படைத்தவர்கள். அதற்கு இந்த ஆட்டமே மிகச்சிறந்த உதாரணமாகும். தொடர்ச்சியாக முன்னணி விக்கெட்டுகள் விழுந்த போது ஆட்டம் நம்மை விட்டு நழுவிவிட்டது என்றே நினைத்தோம். ஆனால் திலக் வர்மாவும், நிதிஷ் குமார் ரெட்டியும் அசாத்திய தைரியத்தையும் மன உறுதியையும் வெளிப்படுத்தினர். அதேபோல் நமன் திரின் அதிரடி ஆட்டமும் எங்களுக்கு முக்கிய நேரத்தில் உதவியது. அவர் பேட்டிங், பந்துவீச்சு, சுறுசுறுப்பான பீல்டிங் என அனைத்திலும் முத்திரை பதிக்கும் சிறந்த ஆல்ரவுண்டர்" என்றார்.

சேஸிங்கின் போது ஏற்பட்ட சறுக்கலுக்கு விளக்கம் அளித்த அவர், "நாங்கள் தொடக்கத்திலேயே அதிக டாட் பந்துகளை வீணடித்துவிட்டோம். அதுவே ரன் ரேட் அழுத்தத்தை எகிற வைத்தது. நியூசிலாந்து சுழற்பந்து வீச்சாளர்களான மிட்செல் சான்ட்னர் மற்றும் மைக்கேல் பிரேஸ்வெல் மிடில் ஓவர்களில் ஆட்டத்தை அற்புதமாகக் கட்டுப்படுத்தினர். இடைவெளிகளைக் கணித்து பவுண்டரி அடித்திருந்தால் இலக்கை எளிதாக எட்டியிருக்கலாம். இந்த தவறுகளில் இருந்து பாடம் கற்றுக்கொண்டு அடுத்த போட்டியில் இன்னும் சிறப்பாக ஆடுவோம்" எனக் கூறினார்.

7 பந்தில் 15 ரன்கள் மட்டுமே எடுத்தாலும் 2 மெகா சாதனைகளை செய்த அபிஷேக் சர்மா.. 1000 ரன், 100 சிக்ஸ்

பீல்டிங் வியூகம் குறித்துப் பேசிய ஐயர், "எதிரணி பேட்டர்கள் 2 ரன்கள் ஓடுவதைத் தடுக்க வேண்டும் என்பதே எங்கள் திட்டமாக இருந்தது. பந்தை நோக்கி ஓடினால் அவர்கள் 2-வது ரன் எடுக்கத் தயங்குவார்கள் என வீரர்களுக்குக் கூறினோம்" என்றார். தொடரில் இந்தியா 2-0 என முன்னிலை பெற்றது குறித்துக் கேட்டதற்கு, "எங்கள் வேலை இன்னும் பாதியளவே முடிந்துள்ளது" என்று கூறி அடுத்தடுத்த போட்டிகளில் கவனம் செலுத்துவதாக தெரிவித்தார்.