IND vs NZ: பாபர் அசாம் சாதனையை முறியடித்த நியூசிலாந்து வீரர் டேரல் மிட்செல்

வதோரா: ஒருநாள் கிரிக்கெட் பேட்டிங் சராசரியில், நியூசிலாந்து வீரர் டாரில் மிட்செல், பாகிஸ்தான் வீரர் பாபர் அசாமை முந்தி நான்காவது இடத்தைப் பிடித்தார். இந்தியாவுக்கு எதிரான போட்டியில் 84 ரன்கள் அடித்ததன் மூலம் இந்தச் சாதனையை அவர் நிகழ்த்தினார். இப்போட்டியில் நியூசிலாந்து 300 ரன்கள் எடுத்தது.

குறைந்தபட்சம் 50 இன்னிங்ஸ் விளையாடிய வீரர்களில், இந்திய அணியின் விராட் கோலி 58.46 சராசரியுடன் முதலிடத்தில் உள்ளார். சுப்மன் கில் 56.36 சராசரியுடன் இரண்டாவது இடத்திலும், முன்னாள் ஆஸ்திரேலிய வீரர் மைக்கேல் பெவன் 53.58 சராசரியுடன் மூன்றாவது இடத்திலும் உள்ளார்.தற்போது டாரில் மிட்செல் 53.82 சராசரியுடன் நான்காவது இடத்திலும், பாபர் அசாம் 53.52 சராசரியுடன் ஐந்தாவது இடத்திலும் உள்ளனர்.

இந்தியாவுக்கு எதிரான மூன்று போட்டிகள் கொண்ட ஒருநாள் தொடரின் முதல் ஆட்டம் வதோதராவில் உள்ள கோட்டாம்பி மைதானத்தில் நடைபெற்றது. இதில் நியூசிலாந்து அணி 300 ரன்கள் (8 விக்கெட்டுகள் இழப்புக்கு) எடுத்தது. மிட்செலின் அதிரடி அரை சதம் அந்த அணிக்கு வலுசேர்த்தது.டாரில் மிட்செல் 71 பந்துகளில் 84 ரன்கள் விளாசினார், இதில் ஐந்து பவுண்டரிகளும், மூன்று சிக்ஸர்களும் அடங்கும்.

அவர் மிட்செல் ஹே, கேப்டன் மைக்கேல் பிரேஸ்வெல் மற்றும் கிறிஸ்டியன் கிளார்க் ஆகியோருடன் இணைந்து பார்ட்னர்ஷிப்களை அமைத்து அணியின் ஸ்கோரை உயர்த்தினார்.ஆட்டத்தின் இடைவேளையின்போது மிட்செல் தனது பேட்டியில், "நாங்கள் சில விக்கெட்டுகளை இழந்தாலும், நாங்கள் அமைத்த பார்ட்னர்ஷிப்கள் முக்கியமானவை என்று கருதுகிறேன்.

மெதுவான ஆடுகளத்தில் 300 ரன்கள் எடுத்தது மிகுந்த மகிழ்ச்சி அளிக்கிறது. அடுத்து பந்துவீச்சில் எங்களால் என்ன செய்ய முடியும் என்பதை பார்க்க வேண்டும்," என்றார்.தனது எல்பிடபிள்யூ (LBW) மறுபரிசீலனை (ரிவியூ) குறித்துக் கேட்டபோது, "உண்மையாகச் சொல்லப் போனால், அது அவுட்தான். நான் ஆசைப்பட்டதால் மட்டுமே ரிவியூ செய்தேன்," என்று சிரித்துக்கொண்டே கூறினார்.

இந்திய பந்துவீச்சாளர்களில் ஹர்ஷித் (2/65) அபாயகரமான துவக்க ஜோடியான டெவோன் கான்வே (67 பந்துகளில் 56 ரன்கள்) மற்றும் ஹென்றி நிக்கோல்ஸ் (69 பந்துகளில் 62 ரன்கள்) ஆகியோரை அடுத்தடுத்து ஆட்டமிழக்கச் செய்து, 117 ரன்கள் பார்ட்னர்ஷிப்பை பிரித்தார்.சிராஜ் (2/40) வில் யங் (12), ஜாக் ஃபௌல்க்ஸ் (1) ஆகியோரை வெளியேற்றினார். பிரசித் கிருஷ்ணா (2/60) இரண்டு விக்கெட்டுகளை வீழ்த்தினார், அதில் மிட்செலின் விக்கெட்டும் அடங்கும்.