IND vs NZ: கிரிக்கெட்டில் பாகிஸ்தானுக்கு அடுத்து இந்தியா மட்டுமே செய்த பிரம்மாண்ட உலக சாதனை!

கிறைஸ்ட்சர்ச்: சர்வதேச டி20 கிரிக்கெட் வரலாற்றில் 300 போட்டிகளில் விளையாடிய உலகின் 2-வது அணி என்ற மாபெரும் மைல்கல்லை இந்திய கிரிக்கெட் அணி எட்டியுள்ளது. நியூசிலாந்துக்கு எதிரான 5 போட்டிகள் கொண்ட தொடரின் 2-வது ஆட்டம் கிறைஸ்ட்சர்ச் ஹாக்லி ஓவல் மைதானத்தில் சனிக்கிழமை தொடங்கியது. இந்தப் போட்டியே இந்திய ஆடவர் கிரிக்கெட் அணி களம் கண்ட 300-வது சர்வதேச டி20 போட்டியாகும். இதற்கு முன்பு பாகிஸ்தான் அணி மட்டுமே சர்வதேச அரங்கில் இந்த இமாலய சாதனையை நிகழ்த்தியுள்ளது.

சர்வதேச டி20 கிரிக்கெட்டில் அதிக போட்டிகளில் விளையாடிய அணிகள் வரிசையில் பாகிஸ்தான் 304 போட்டிகளுடன் முதலிடத்தில் நீடிக்கிறது. அதேநேரம் இதுவரை விளையாடிய 299 போட்டிகளில் இந்தியா 199 வெற்றிகளைக் குவித்துள்ளது. நியூசிலாந்துக்கு எதிரான இந்தப் போட்டியில் ஸ்ரேயாஸ் ஐயர் தலைமையிலான இந்திய அணி வெற்றி பெறும் பட்சத்தில், சர்வதேச டி20 கிரிக்கெட்டில் 200 வெற்றிகளைப் பதிவு செய்த உலகின் முதல் அணி என்ற புதிய உலக சாதனையை இந்தியா தன்வசப்படுத்தும். இதுவரை ஆடிய ஆட்டங்களில் இந்தியா 83 தோல்விகள், 7 சமன் மற்றும் 10 முடிவில்லா போட்டிகளைச் சந்தித்துள்ளது.

2026 காலண்டர் ஆண்டில் மட்டும் இந்திய அணி விளையாடும் 37-வது சர்வதேச டி20 போட்டி இதுவாகும். நடப்பு ஆண்டில் உலகிலேயே அதிக டி20 போட்டிகளில் ஆடிய அணியாகத் திகழும் இந்தியா, இதுவரை 24 வெற்றிகளை குவித்து மிரட்டியுள்ளது. குறிப்பாக 2026-ல் நியூசிலாந்துக்கு எதிராக ஆடிய 7 போட்டிகளில் 6-ல் இந்தியா வெற்றி வாகை சூடியுள்ளது. டி20 உலக சாம்பியனான இந்திய அணி தொடர்ந்து தனது ஆதிக்கத்தை நிலைநிறுத்தி வருகிறது.

IND vs NZ: 2வது டி20 போட்டி பிளேயிங் 11.. வைபவ் சூர்யவன்ஷி குறித்து நல்ல செய்தியை சொன்ன ஸ்ரேயாஸ்

இந்த வரலாற்று சிறப்புமிக்க போட்டியில் டாஸ் வென்ற கேப்டன் ஸ்ரேயாஸ் ஐயர் பந்துவீச்சைத் தேர்வு செய்தார். இஷான் கிஷனுக்கு ஏற்பட்ட காயத்தால் வைபவ் சூர்யவன்ஷி 3-வது வரிசையில் களமிறக்கப்பட்டுள்ளார். மயங்க் யாதவுக்குப் பதிலாக பிரின்ஸ் யாதவ் அணியில் சேர்க்கப்பட்டுள்ளார்.