IND vs NZ: வெளுத்து வாங்கிய நியூசிலாந்து.. டேரில் மிட்செல் ரன்குவிப்பு.. இந்தியாவுக்கு இமாலய இலக்கு

வதோதரா: இந்தியா மற்றும் நியூசிலாந்து அணிகளுக்கு இடையிலான முதலாவது ஒருநாள் போட்டியில் டாஸ் வென்று பந்துவீச்சைத் தேர்வு செய்த இந்திய கேப்டன் சுப்மன் கில்லின் முடிவு, எதிர்பார்த்த பலனை அளிக்கவில்லை என்றே சொல்ல வேண்டும். முதலில் பேட்டிங் செய்த நியூசிலாந்து அணி, இந்திய பந்துவீச்சாளர்களைத் துவம்சம் செய்து நிர்ணயிக்கப்பட்ட 50 ஓவர்களில் 8 விக்கெட் இழப்பிற்கு 300 ரன்களைக் குவித்துள்ளது. இதன் மூலம் இந்திய அணிக்கு 301 ரன்கள் என்ற சவாலான வெற்றி இலக்கு நிர்ணயிக்கப்பட்டுள்ளது.

ஆட்டத்தின் ஆரம்பமே இந்திய அணிக்குச் சோதனையாக அமைந்தது. நியூசிலாந்து அணியின் தொடக்க வீரர்களான டேவன் கான்வே மற்றும் ஹென்றி நிக்கோல்ஸ் ஜோடி, இந்திய வேகப்பந்து வீச்சாளர்களை லாவகமாக எதிர்கொண்டு ரன் வேட்டையைத் தொடங்கியது. விக்கெட் விழும் என்று எதிர்பார்த்த இந்திய ரசிகர்களுக்கு ஏமாற்றமே மிஞ்சியது.

நிதானமாகவும், அதே சமயம் தேவையான நேரத்தில் அதிரடியாகவும் ஆடிய இந்த ஜோடி, முதல் விக்கெட்டுக்கு 117 ரன்களைச் சேர்த்து அணிக்கு வலுவான அடித்தளத்தை அமைத்துக் கொடுத்தது. அரைசதம் கடந்த டேவன் கான்வே 56 ரன்களிலும், ஹென்றி நிக்கோல்ஸ் 62 ரன்களிலும் ஹர்ஷித் ராணாவின் பந்துவீச்சில் ஆட்டமிழந்தனர்.

தொடக்க ஜோடி பிரிந்த பிறகு, நியூசிலாந்து அணி சற்றுத் தடுமாறியது. வில் யங் 12 ரன்களிலும், அதிரடி மன்னன் கிளென் பிலிப்ஸ் 12 ரன்களிலும் வெளியேற, இந்திய அணி ஆட்டத்திற்குள் திரும்பியது போல் இருந்தது. ஆனால், ஒருமுனையில் நங்கூரம் போல நிலைத்து நின்ற டேரில் மிட்செல், இந்திய பந்துவீச்சாளர்களுக்குத் சிம்ம சொப்பனமாக விளங்கினார்.

விக்கெட்டுகள் விழுந்தாலும் பதற்றமடையாமல் ஆடிய மிட்செல், மைதானத்தின் நாலாபுறமும் பந்துகளை சிதறடித்தார். 71 பந்துகளில் 5 பவுண்டரிகள் மற்றும் 3 சிக்ஸர்களுடன் 84 ரன்கள் விளாசிய மிட்செல், அணியின் ஸ்கோர் 300-ஐ நெருங்க முக்கிய காரணமாக அமைந்தார். கடைசி நேரத்தில் களமிறங்கிய அறிமுக வீரர் கிறிஸ்டியன் கிளார்க், 17 பந்துகளில் ஆட்டமிழக்காமல் 24 ரன்கள் சேர்த்தது அந்த அணிக்கு கூடுதல் பலமாக அமைந்தது.

இந்தியத் தரப்பு பந்துவீச்சை உற்றுநோக்கினால், முகமது சிராஜ் மட்டுமே சற்று ஆறுதல் அளிக்கும் வகையில் பந்துவீசினார். தனது 8 ஓவர்களில் வெறும் 40 ரன்களை மட்டுமே விட்டுக்கொடுத்து 2 முக்கிய விக்கெட்டுகளை அவர் கைப்பற்றினார். இளம் வீரர் ஹர்ஷித் ராணா மற்றும் பிரசித் கிருஷ்ணா ஆகியோர் தலா 2 விக்கெட்டுகளை வீழ்த்தினாலும், ரன்களை வாரி வழங்கியது அணிக்குப் பின்னடைவாக அமைந்தது.

சுழற்பந்து வீச்சில் குல்தீப் யாதவ் ஒரு விக்கெட்டை வீழ்த்தினார். தற்போது 301 ரன்கள் என்ற இமால இலக்கை நோக்கி இந்திய அணி களமிறங்கவுள்ளது. ரோகித் சர்மா, விராட் கோலி போன்ற மூத்த வீரர்கள் இருப்பதால், இந்த இலக்கை இந்தியா எட்டுமா என்பதைப் பொறுத்திருந்துதான் பார்க்க வேண்டும்.