IND vs NZ: இவர் பேட்டிங் செய்தால் மட்டும் போதாது.. ஸ்ரேயாஸ்-க்கு வந்த சிக்கல்.. ODI அணியில் இடமில்லை

மும்பை: இந்திய கிரிக்கெட் அணியின் சிறந்த மிடில் ஆர்டர் பேட்ஸ்மேன்களில் ஒருவரான ஸ்ரேயாஸ் ஐயர், மீண்டும் எப்போது இந்திய அணிக்கு திரும்புவார் என்று காத்திருந்த ரசிகர்களுக்கு ஒரு கசப்பான செய்தி வந்து சேர்ந்திருக்கிறது. காயம் காரணமாக அவதிப்பட்டு வந்த ஸ்ரேயாஸ் ஐயர், முழு உடற்தகுதியை எட்ட இன்னும் சில காலம் ஆகும் என்பதால், வரும் நியூசிலாந்து ஒருநாள் தொடரில் அவர் பங்கேற்பது சந்தேகமாகியுள்ளது.

ஆஸ்திரேலியாவுக்கு எதிரான தொடரின் போது காயமடைந்த ஸ்ரேயாஸ் ஐயர், அதன் பிறகு கிட்டத்தட்ட 6 கிலோ வரை எடையை இழந்துள்ளதாக தகவல்கள் வெளியாகியுள்ளன. இது தான் தற்போது அவருக்கு பெரிய சிக்கலாக அமைந்துள்ளது. அவர் வலைப்பயிற்சியில் பேட்டிங் செய்வதில் எந்த பிரச்சனையும் இல்லை என்றாலும், காயத்திற்குப் பிறகு ஏற்பட்ட இந்த திடீர் எடை குறைவு மற்றும் தசை வலிமை குறைவு காரணமாக, அவரால் சர்வதேச போட்டிகளுக்குத் தேவையான முழுமையான உடற்தகுதியை எட்ட முடியவில்லை.

ஸ்ரேயாஸ் வெறுமனே வலையில் பேட்டிங் செய்தால் மட்டும் போதாது; மைதானத்தில் ஓடுவது, ஸ்லைடிங் செய்வது, ஃபீல்டிங் செய்வது என அனைத்தையும் சமாளிக்கும் அளவுக்கு உடல் வலிமை வேண்டும். அதனால் அவசரப்பட்டு அவரை களமிறக்கி மீண்டும் காயமடையச் செய்வதை விட, முழு ஓய்வு அளிப்பதே சிறந்தது என பிசிசிஐ கருதுகிறது.

இது குறித்து பேசிய பிசிசிஐ அதிகாரி ஒருவர், "ஸ்ரேயாஸ் பேட்டிங் செய்வதில் பிரச்சனை இல்லை. ஆனால் காயத்திற்குப் பிறகு அவர் உடல் எடையில் 6 கிலோ குறைந்துவிட்டார். இழந்த எடையை ஓரளவுக்கு மீட்டெடுத்தாலும், அவருடைய தசை வலிமை இன்னும் பழைய நிலைக்கு திரும்பவில்லை. ஒருநாள் போட்டி அணியில் அவர் மிக முக்கியமான வீரர் என்பதால், மருத்துவக் குழு எந்த அவசரமும் காட்ட விரும்பவில்லை. அவர் முழுமையாக குணமாக வேண்டும் என்பதே முக்கியம்" என்று தெரிவித்துள்ளார்.

விஜய் ஹசாரே ட்ராபியும் மிஸ்ஸிங்?

மும்பை அணிக்காக வரும் ஜனவரி 3 மற்றும் 6ம் தேதிகளில் நடைபெறவுள்ள விஜய் ஹசாரே ட்ராபி லீக் போட்டிகளில் ஸ்ரேயாஸ் ஐயர் விளையாடுவார் என்று எதிர்பார்க்கப்பட்டது. இந்த போட்டிகளில் ஆடி தனது உடற்தகுதியை நிரூபித்துவிட்டு, ஜனவரி 11ம் தேதி தொடங்கும் நியூசிலாந்துக்கு எதிரான ஒருநாள் தொடரில் இணையலாம் என்பது தான் திட்டமாக இருந்தது.

ஆனால், தற்போதைய சூழலில் அவர் லீக் போட்டிகளில் விளையாட வாய்ப்பில்லை என்றும், ஒருவேளை நாக்-அவுட் சுற்றுகளில் தான் அவர் களமிறங்க வாய்ப்புள்ளது என்றும் மும்பை கிரிக்கெட் சங்க வட்டாரங்கள் தெரிவிக்கின்றன.

ஜனவரி 11ம் தேதி இந்தியா - நியூசிலாந்து இடையிலான ஒருநாள் தொடர் தொடங்குகிறது. அதற்கு இன்னும் சில நாட்களே உள்ள நிலையில், ஸ்ரேயாஸ் ஐயரின் இந்த தாமதமான வருகை இந்திய அணித் தேர்வில் தாக்கத்தை ஏற்படுத்தியுள்ளது. சுழற்பந்து வீச்சாளர்களை திறம்பட எதிர்கொள்ளக்கூடிய ஸ்ரேயாஸ் ஐயர் இல்லாதது இந்திய மிடில் ஆர்டருக்கு பின்னடைவாக அமையலாம்.