IND vs NZ: எந்த இந்திய கேப்டனும் செய்யாததை செய்த சுப்மன் கில்.. நியூசிலாந்திடம் வரலாற்று தோல்வி

இந்தூர்: நியூசிலாந்து அணிக்கு எதிரான ஒருநாள் தொடரை 1-2 என்ற கணக்கில் இழந்ததன் மூலம், இந்திய அணியின் இளம் கேப்டன் சுப்மன் கில் தனது கிரிக்கெட் வாழ்வில் விரும்பத்தகாத வரலாற்றுச் சாதனை ஒன்றைப் படைத்துள்ளார். சொந்த மண்ணில் நியூசிலாந்து அணியிடம் ஒருநாள் தொடரை இழந்த முதல் இந்திய கேப்டன் என்ற மோசமான பெயரை அவர் பெற்றுள்ளார்.

இந்தூரில் நடைபெற்ற 3-வது மற்றும் கடைசி ஒருநாள் போட்டியில் இந்திய அணி 41 ரன்கள் வித்தியாசத்தில் தோல்வியடைந்தது. விராட் கோலி அபாரமாக விளையாடி 124 ரன்கள் குவித்த போதிலும், மற்ற வீரர்களின் ஒத்துழைப்பு இல்லாததால் இந்திய அணி 296 ரன்களுக்கு ஆல் அவுட்டாகி தொடரை இழந்தது.

1988-ம் ஆண்டு முதல் நியூசிலாந்து அணி இந்தியாவில் சுற்றுப்பயணம் மேற்கொண்டு ஒருநாள் தொடர்களில் விளையாடி வருகிறது. கடந்த 38 ஆண்டுகளாக திலிப் வெங்சர்க்கார் முதல் ரோஹித் சர்மா வரை எந்த ஒரு இந்திய கேப்டனும் சொந்த மண்ணில் நியூசிலாந்துக்கு எதிராக ஒருநாள் தொடரை இழந்ததே இல்லை.

ஆனால், சுப்மன் கில் தலைமையிலான இந்திய அணி அந்த வரலாற்றை மாற்றியெழுதி சோகத்தை ஏற்படுத்தியுள்ளது. கேன் வில்லியம்சன் உள்ளிட்ட முக்கிய வீரர்கள் இல்லாத நியூசிலாந்து அணியிடம் இந்தியா தோல்வியடைந்தது தான் ரசிகர்களுக்குப் பேரதிர்ச்சியாக உள்ளது.

சொந்த மண்ணில் இந்தியா vs நியூசிலாந்து (ஒருநாள் தொடர் வரலாறு):

1988: திலிப் வெங்சர்க்கார் - வெற்றி (4-0)
1995: முகமது அசாருதீன் - வெற்றி (3-2)
1999: சச்சின் டெண்டுல்கர் - வெற்றி (3-2)
2010: கௌதம் கம்பீர் - வெற்றி (5-0)
2016: எம்.எஸ்.தோனி - வெற்றி (3-2)
2017: விராட் கோலி - வெற்றி (2-1)
2023: ரோஹித் சர்மா - வெற்றி (3-0)
2026: சுப்மன் கில் - தோல்வி (1-2)

ஏற்கனவே 2024-ல் டெஸ்ட் தொடரை நியூசிலாந்திடம் இழந்த இந்தியா, தற்போது 2026-ல் ஒருநாள் தொடரையும் இழந்து உலகின் நம்பர் 1 அணி என்ற அந்தஸ்திற்குப் பின்னடைவை ஏற்படுத்தியுள்ளது.

இந்தியா தோல்வியடைந்தாலும், விராட் கோலி தனி ஆளாகப் போராடி சாதனை படைத்துள்ளார். நேற்றைய போட்டியில் சதம் அடித்ததன் மூலம், ஒருநாள் போட்டிகளில் நியூசிலாந்து அணிக்கு எதிராக அதிக சதங்கள் (7) விளாசிய வீரர் என்ற உலக சாதனையை விராட் கோலி படைத்தார்.

இதற்கு முன்பு வீரேந்திர சேவாக் மற்றும் ரிக்கி பாண்டிங் ஆகியோர் தலா 6 சதங்களுடன் முதலிடத்தில் இருந்தனர். மேலும், சர்வதேச கிரிக்கெட்டில் நியூசிலாந்துக்கு எதிராக அதிக சதங்கள் அடித்த வீரர் என்ற பெருமையையும் கோலி பெற்றார். இதுவரை 10 சதங்களை நியூசிலாந்து அணிக்கு எதிராக அடித்துள்ளார் கோலி. ஜாக் காலிஸ் மற்றும் சச்சின் டெண்டுல்கர் தலா 9 சதங்களுடன் அடுத்தடுத்த இடங்களில் உள்ளனர்.

கேப்டனாக சுப்மன் கில்லுக்கு இது ஒரு கசப்பான தொடராக அமைந்தாலும், விராட் கோலியின் ஃபார்ம் மற்றும் நிதிஷ் குமார் ரெட்டி, ஹர்ஷித் ராணா ஆகியோரின் முதல் அரைசதம் இந்தியாவுக்குச் சற்று ஆறுதலைத் தந்துள்ளது.