"ஒரே ஒரு நாள் பயிற்சி.. அதுக்குள்ள மேட்சா?".. நியூசிலாந்து தொடர் குறித்து சஞ்சு சாம்சன் ஆதங்கம்

பெங்களூர்: வெஸ்ட் இண்டீஸ் அணிக்கு எதிரான டி20 தொடர் முடிந்த வெறும் 5 நாள்களிலேயே, நியூசிலாந்து மண்ணில் 5 போட்டிகள் கொண்ட டி20 தொடரில் விளையாட இந்திய அணி உடனடியாகப் பயணமாகிறது. வெளிநாட்டுச் சுற்றுப்பயணத்தில் ஆடுகளத்தின் தன்மைக்கு ஏற்ப தங்களை மாற்றிக்கொள்ள வீரர்களுக்குப் பயிற்சி எடுக்க ஒரே ஒரு நாள் மட்டுமே அவகாசம் கிடைத்துள்ளதாக இந்திய அணியின் தொடக்க ஆட்டக்காரர் சஞ்சு சாம்சன் ஆதங்கத்தை வெளிப்படுத்தி உள்ளார்.

கிறைஸ்ட்சர்ச்சில் வரும் அக்டோபர் 22 அன்று முதல் டி20 போட்டி நடைபெறுகிறது. இதுபற்றிப் பேசிய சஞ்சு சாம்சன், "தற்போதைய கிரிக்கெட் அட்டவணைகள் மிகவும் நெருக்கமாக அமைக்கப்படுகின்றன. இதனால் வீரர்கள் முழுமையாகப் பயிற்சி எடுக்கவோ, தயாராகவோ போதிய நேரமே இருப்பதில்லை. நாங்கள் அக்டோபர் 20 அன்று நியூசிலாந்து சென்றடைவோம். 21 அன்று ஒரே ஒரு நாள் மட்டுமே பேட்டிங் பயிற்சி மேற்கொள்வோம். அடுத்த நாளே, அதாவது 22 அன்று போட்டியில் களமிறங்கியாக வேண்டும். இதுபோன்ற இக்கட்டான சூழலில் நமது சர்வதேச அனுபவமே கைகொடுக்கும். மனதளவில் நிதானமாக இருந்து, கிடைக்கும் குறைந்த நேரத்தை முழுமையாகப் பயன்படுத்த வேண்டும்" என்றார்.

நியூசிலாந்து ஆடுகளங்கள் குறித்துப் பேசிய அவர், "அங்குள்ள சூழலுக்கு ஏற்ப நம்மைப் பழக்கப்படுத்திக் கொள்ளச் சற்று நேரம் தேவைப்படும். எனவே ஆடுகளத்தின் தன்மையையும் வேகத்தையும் புரிந்துகொள்ள களத்தில் 2 அல்லது 3 பந்துகள் எடுத்துக்கொள்வோம். வெஸ்ட் இண்டீஸ் தொடரில் நாங்கள் சிறப்பாகச் செய்த விஷயங்களை இங்கும் செய்வோம். அனுபவத்தின் மூலம் கற்றுக்கொண்ட பாடங்களைப் பின்பற்றி, ஆடுகளத்தின் நிலவரத்தை மதித்து ஆடுவோம்" எனக் குறிப்பிட்டார்.

5 பந்தில் 1 ரன்.. இந்திய கேப்டனின் ஸ்டம்பை பறக்கவிட்ட பவுலர்.. ரஞ்சி கோப்பை தொடரில் சொதப்பிய கில்

இந்திய அணிக்கு இது புதிய சவால் அல்ல. முன்னதாக ஜப்பானில் நடந்த ஆசிய விளையாட்டுப் போட்டியில் பாகிஸ்தானை வீழ்த்தி தங்கம் வென்ற இந்திய வீரர்கள், நாடு திரும்பிய 3 நாள்களிலேயே வெஸ்ட் இண்டீஸ் தொடரில் விளையாட நேரிட்டது. பயணக் களைப்பால் தூங்கக்கூட நேரமில்லை என கேப்டன் ஸ்ரேயாஸ் ஐயர் அப்போது புலம்பியிருந்தார். தற்போது மீண்டும் அதேபோன்ற பணிச்சுமை நெருக்கடி எழுந்துள்ளது. எனினும் பெங்களூருவில் கடைசி போட்டி 7.4 ஓவர்களோடு மழையால் கைவிடப்பட்டதால், நியூசிலாந்து செல்வதற்கு முன்பாக வீரர்களுக்குக் கூடுதல் ஓய்வு கிடைத்துள்ளது மட்டுமே ஒரே நிம்மதி.