IND vs NZ: சஞ்சு சாம்சன் செய்த செயல்.. கடுப்பான ரசிகர்கள்.. வீணாகும் வாய்ப்புகள்.. என்ன நடக்கிறது?

ராய்ப்பூர்: நியூசிலாந்துக்கு எதிரான இரண்டாவது டி20 போட்டியில் இஷான் கிஷன் மற்றும் சூர்யகுமார் யாதவ் ஆகியோரின் அதிரடியால் இந்திய அணி வெற்றி பெற்று இருந்தாலும், மற்றொரு துவக்க வீரரான சஞ்சு சாம்சனின் ஆட்டம் ரசிகர்களுக்குப் பெரும் ஏமாற்றத்தை அளித்துள்ளது.

சுப்மன் கில்லுக்கு ஓய்வு அளிக்கப்பட்டுள்ளதால், இந்தத் தொடரில் சஞ்சு சாம்சனுக்குத் துவக்க வீரராகக் களமிறங்கும் பொன்னான வாய்ப்பு வழங்கப்பட்டது. ராய்ப்பூர் ஆடுகளம் பேட்டிங்கிற்குச் சாதகமாக இருந்ததால், சஞ்சு சாம்சன் பெரிய ஸ்கோர் அடிப்பார் என்று எதிர்பார்க்கப்பட்டது.

209 ரன்கள் என்ற இலக்கை நோக்கி களமிறங்கிய அவர், மேட் ஹென்றி வீசிய முதல் ஓவரின் இரண்டாவது பந்திலேயே ஒரு சிக்ஸரை விளாசி நம்பிக்கை அளித்தார். ஆனால் அந்த நம்பிக்கை நீண்ட நேரம் நீடிக்கவில்லை. அதே ஓவரின் ஐந்தாவது பந்தில், அவசரப்பட்டுத் தூக்கி அடிக்க முயன்று ரச்சின் ரவீந்திராவிடம் கேட்ச் கொடுத்து ஆட்டமிழந்தார். வெறும் 5 பந்துகளை மட்டுமே சந்தித்த அவர் 6 ரன்களில் வெளியேறினார்.

தொடரும் சறுக்கல்

ஏற்கனவே நாக்பூரில் நடைபெற்ற முதல் டி20 போட்டியிலும் சஞ்சு சாம்சன் 10 ரன்கள் மட்டுமே எடுத்து ஆட்டமிழந்தார். தற்போது இரண்டாவது போட்டியிலும் அவர் ஒற்றை இலக்க ரன்னில் வெளியேறியுள்ளது அவரது இடத்திற்குப் பெரும் நெருக்கடியை ஏற்படுத்தியுள்ளது. அணியில் நிரந்தர இடம் பிடிக்கப் போராடி வரும் நிலையில், இது போன்ற ஆட்டங்கள் அவருக்குப் பின்னடைவாகவே அமையும்.

இஷான் கிஷன் பாடம்

மறுமுனையில், நீண்ட இடைவெளிக்குப் பிறகு அணிக்குத் திரும்பிய இஷான் கிஷன், தனக்குக் கிடைத்த வாய்ப்பைக் கெட்டியாகப் பிடித்துக்கொண்டார். முதல் பந்து முதலே அதிரடி காட்டிய அவர், 21 பந்துகளில் அரைசதம் கடந்து தன்னை நிரூபித்தார். ஆனால், சஞ்சு சாம்சன் தனக்குக் கிடைத்த வாய்ப்பைத் தொடர்ந்து வீணடித்து வருகிறார்.

சஞ்சு சாம்சனுக்கு எப்போதுமே ரசிகர்கள் மத்தியில் தனி ஆதரவு உண்டு. அவருக்கு அணியில் இடம் கிடைக்காதபோதெல்லாம் சமூக வலை தளங்களில் ரசிகர்கள் தொடர்ந்து குரல் கொடுத்து வருகின்றனர். ஆனால், அணியில் இடம் கிடைக்கும் போதெல்லாம் அவர் சொற்ப ரன்களில் ஆட்டமிழப்பது ரசிகர்களை விரக்தியில் ஆழ்த்தியுள்ளது.

"எப்போதுதான் சஞ்சு சாம்சன் பொறுப்புடன் விளையாடுவார்?", "கிடைக்கும் வாய்ப்பைப் பயன்படுத்திக் கொள்ளத் தவறுகிறார்" என்று ரசிகர்கள் சமூக வலைத்தளங்களில் தங்கள் அதிருப்தியை வெளிப்படுத்தி வருகின்றனர். டி20 உலகக்கோப்பை நெருங்கி வரும் வேளையில், சஞ்சு சாம்சனின் இந்த மோசமான ஃபார்ம் தேர்வுக்குழுவினரை யோசிக்க வைக்கும் என்பதில் சந்தேகமில்லை.