IND vs NZ: இந்திய ரசிகர்களின் இதயத்தை உடைத்து அமைதியாக்குவோம்.. நியூசி. கேப்டன் சாண்ட்னர்

அகமதாபாத்: 2026 டி20 உலககோப்பை கிரிக்கெட் தொடரின் இறுதிப் போட்டியில் இந்தியா, நியூசிலாந்து அணிகள் நாளை ஞாயிற்றுகிழமை பலப்பரீட்சை நடத்துகிறது. இந்தப் போட்டிக்கு முன் செய்தியாளர்களிடம் பேசிய நியூசிலாந்து அணி கேப்டன் சாண்ட்னர், இந்திய ரசிகர்கள் இதயத்தை உடைப்போம் என்று கூறியுள்ளார். சிலரின் மனதைத் துயரப்படுத்தினாலும் கோப்பையை வெல்வதைப் பற்றிக் கவலைப்படப் போவதில்லை என தெரிவித்தார்.

தாங்கள் இறுதிப் போட்டியில் வெல்வோம் என்று யாரும் சொல்லவில்லை என்றாலும், சிறப்பாகச் செயல்பட்டால் கோப்பையை வெல்ல நல்ல வாய்ப்பு உள்ளதாகக் குறிப்பிட்டார்.கடந்த பத்தாண்டுகளுக்கும் மேலாக, ஐசிசி நடத்தும் வெள்ளைப் பந்து தொடர்களின் இறுதிப் போட்டிக்கு நியூசிலாந்து அணி தொடர்ந்து முன்னேறி வருகிறது.

இருப்பினும், 2021-ல் உலக டெஸ்ட் சாம்பியன்ஷிப்பை வென்றபோதும், 2000 சாம்பியன்ஸ் டிராபிக்குப் பிறகு எந்த ஒரு ஐசிசி லிமிடெட் ஓவர்ஸ் கோப்பையையும் அவர்களால் இதுவரை வெல்ல முடியவில்லை.டி20 உலகக் கோப்பை 2026 இறுதிப் போட்டிக்கு முன்னதாக நடந்த செய்தியாளர் சந்திப்பில், 'இதயங்களை வென்று, கோப்பைகளை வெல்லாத நல்லவர்கள்' என்ற பெயர் குறித்து நியூசிலாந்து அணிக்கு சலிப்படைந்துவிட்டதா என்று சான்ட்னரிடம் கேட்கப்பட்டது.

அதற்கு பதில் அளித்த அவர், “ஒரு கோப்பையை வெல்வது எனக்கு கவலையில்லை. கடந்தகாலக் குழுக்களையும் பார்த்தால், இத்தகையப் போட்டிகளில் நாங்கள் மிகவும் நிலையாகச் செயல்படுகிறோம். ஏனென்றால், நாங்கள் நிலைமையாலோ அல்லது எதிரணிகளாலோ பாதிக்கப்படாமல் இருக்க முயற்சி செய்கிறோம். ஒரு அணியாக எங்கள் வேலையைச் செய்கிறோம். இந்த முறையும் இது வேறுபாடில்லை.”

“நிச்சயமாக இது ஒரு சவாலாக இருக்கும். நாங்கள் கோப்பை வெல்லும் Favourite அணி இல்லை என்பது அனைவருக்கும் தெரியும், ஆனால் நாங்கள் அதைப் பற்றி கவலைப்படுவதில்லை. எங்கள் சிறிய விஷயங்களைச் சரியாகச் செய்து, ஒரு வலுவான அணி செயல்திறனை வெளிப்படுத்தினால், கோப்பையை வெல்லும் நல்ல நிலையில் இருப்போம் என்று நம்புகிறோம். ஒரு முறை கோப்பையை வெல்வதற்காகச் சிலரின் இதயங்களை உடைப்பதில் எனக்கு எந்த வருத்தமும் இல்லை.” என்றார்.

நியூசிலாந்து அணி, பல முக்கிய ஐசிசி இறுதிப் போட்டிகளில் தோல்விகளைச் சந்தித்திருக்கிறது. 2015 ஒருநாள் உலகக் கோப்பை இறுதிப் போட்டியில் ஆஸ்திரேலியாவிடம் வீழ்ந்தது. 2019-ல் இங்கிலாந்திடம் பவுண்டரி எண்ணிக்கை அடிப்படையில் தோற்றது. 2025 சாம்பியன்ஸ் டிராபி இறுதிப் போட்டியில் இந்தியாவிடம் தோல்வியுற்றதுடன், 2021 டி20 உலகக் கோப்பை இறுதிப் போட்டியில் ஆஸ்திரேலியா அணியால் படுதோல்வி அடைந்தது.

டி20 உலகக் கோப்பை 2026 தொடரின் குரூப் பிரிவில் நியூசிலாந்து இரண்டாவது இடத்தைப் பிடித்தது. ஆப்கானிஸ்தான் மற்றும் ஐக்கிய அரபு அமீரகத்திற்கு எதிரான வெற்றிகளுடன் தங்கள் பயணத்தைத் தொடங்கினர். ஆனால், தென்னாப்பிரிக்காவிடம் ஏழு விக்கெட் வித்தியாசத்தில் தோல்வியைத் தழுவினர். கடைசி குரூப் போட்டியில் கனடாவை எட்டு விக்கெட் வித்தியாசத்தில் வீழ்த்தி அடுத்த சுற்றுக்கு தகுதி பெற்றனர்.

சூப்பர் 8 சுற்றில், நியூசிலாந்தின் முதல் போட்டி மழை காரணமாகக் கைவிடப்பட்டது. தொடர்ந்து, இலங்கையை 61 ரன்கள் வித்தியாசத்தில் வீழ்த்தினர். இங்கிலாந்திடம் நான்கு விக்கெட்டுகள் வித்தியாசத்தில் தோல்வியடைந்த போதிலும், பாகிஸ்தானை நிகர ரன் ரேட் அடிப்படையில் முந்தி அரையிறுதிக்குத் தகுதி பெற்றனர். அங்கு தென்னாப்பிரிக்காவை ஒன்பது விக்கெட் வித்தியாசத்தில் வீழ்த்தி இறுதிப் போட்டிக்கு முன்னேறினர்.