IND vs PAK: “ஆசிய கோப்பை போனால் என்ன.. 14 கோப்பைகள்”.. விரக்தியில் பேசிய இந்திய கேப்டன் சூர்யகுமார்

துபாய்: 2025 ஆசிய கோப்பை இறுதிப் போட்டியில் பாகிஸ்தானை வீழ்த்தி இந்திய அணி சாம்பியன் பட்டம் வென்றது. ஆனால், வெற்றிக்குப் பிறகு கோப்பையை பெற முடியாமல் போனது குறித்து இந்திய அணியின் கேப்டன் சூர்யகுமார் யாதவ் தனது வேதனையை பகிர்ந்துள்ளார். "இது சும்மா கிடைத்த கோப்பை அல்ல. உழைத்து வெற்றி பெற்று கிடைத்த கோப்பை." என அவர் விரக்தியுடன் கூறி இருக்கிறார்.

ஆசிய கிரிக்கெட் கவுன்சில் தலைவரும், பாகிஸ்தான் உள்துறை அமைச்சருமான மோஷின் நக்வி, கோப்பையுடன் மைதானத்தை விட்டு வெளியேறிய பிறகு, செய்தியாளர்களைச் சந்தித்த சூர்யகுமார் யாதவ், தனது கிரிக்கெட் வாழ்க்கையில் இது போன்ற ஒரு சம்பவத்தை இதுவரை பார்த்ததே இல்லை என்று வேதனையுடன் குறிப்பிட்டார்.

இந்தியா - பாகிஸ்தான் அணிகளுக்கு இடையே கைகுலுக்க மாட்டோம் என்ற கொள்கை, ஆத்திரமூட்டும் சைகைகள் எனப் பல்வேறு சர்ச்சைகளுக்கு மத்தியில் ஆசிய கோப்பை இறுதிப் போட்டி நடந்து முடிந்தது. இறுதிப் போட்டிக்குப் பிந்தைய பரிசளிப்பு விழா, ஒரு மணி நேரத்திற்கும் மேலாகத் தாமதமானது. ஆசிய கிரிக்கெட் கவுன்சில் தலைவர் மோஷின் நக்வி கையால் கோப்பையைப் பெற இந்திய அணி மறுப்பு தெரிவித்ததால், இந்தக் குழப்பம் உச்சத்தை எட்டியது.

கோப்பையை ஐக்கிய அரபு அமீரக கிரிக்கெட் அமைப்பின் தலைவர் வழங்குவார் என இந்திய வீரர்கள் காத்திருந்தனர். ஆனால், மோஷின் நக்வி ஆசிய கோப்பையையும், இந்திய வீரர்களின் பதக்கங்களையும் எடுத்துக் கொண்டு தனது ஹோட்டல் அறைக்கு சென்றதாக கூறப்படுகிறது.

சூர்யகுமாரின் வேதனை:

பரிசளிப்பு விழா தாமதமாகத் தொடங்கியபோதும், கேப்டன் சூர்யகுமார் யாதவ் மேடையில் பேசவில்லை. அதன்பிறகு, அபிஷேக் ஷர்மாவுடன் செய்தியாளர்களைச் சந்தித்தபோது, அவரது குரலில் விரக்தி வெளிப்பட்டது.

"இது நான் இதுவரை பார்த்திராத ஒரு விஷயம். நான் கிரிக்கெட் விளையாடத் தொடங்கியதிலிருந்தும், கிரிக்கெட்டைப் பின்தொடர்வதிலிருந்தும், ஒரு சாம்பியன் அணிக்குக் கோப்பை மறுக்கப்படுவதை நான் பார்த்ததே இல்லை. அதுவும், இது ஒரு கடினமாக உழைத்து வென்ற கோப்பை. எளிதாகக் கிடைக்கவில்லை. கடந்த 4 ஆம் தேதியிலிருந்து நாங்கள் இங்கு இருக்கிறோம். நாங்கள் இந்தக் கோப்பைக்குத் தகுதியானவர்கள் என்று நான் நினைக்கிறேன். இதற்கு மேல் என்னால் எதுவும் சொல்ல முடியாது," என்று இந்திய கேப்டன் கூறினார்.

"வீரர்கள்தான் உண்மையான கோப்பைகள்":

வெளியில் கோப்பைப் பறிபோனாலும், அணியின் வெற்றிதான் உண்மையானது என்று சூர்யகுமார் உருக்கமாகத் தெரிவித்தார். "நீங்கள் கோப்பைகளைப் பற்றிக் கேட்டால், எனது கோப்பைகள் எனது உடைமாற்றும் அறையில் அமர்ந்திருக்கின்றன. எனது 14 வீரர்களும் என்னுடன் இருக்கிறார்கள். அனைத்து உதவி ஊழியர்களும் இருக்கிறார்கள். அதுதான் உண்மையான கோப்பைகள்."

"இந்த ஆசிய கோப்பைப் பயணம் முழுவதும் நான் இந்தப் பையன்களின் பெரிய ரசிகனாக இருந்தேன். அதுதான் நான் திரும்ப எடுத்துச் செல்லும் உண்மையான கோப்பைகள், உண்மையான தருணங்கள். அந்த அழகான நினைவுகள் என்றென்றும் என்னுடன் இருக்கும்" என்று அவர் உருக்கமாகத் தெரிவித்தார்.

"வெற்றிதான் முக்கியம்":

இந்தச் சர்ச்சை குறித்து மேலும் பேசிய சூர்யகுமார், "வெற்றிதான் முக்கியம். போட்டி முடிந்த பிறகு, பெரிய திரையில் 'இந்தியா, ஆசிய கோப்பை 2025 சாம்பியன்ஸ்' என்று எழுதப்பட்டிருந்ததை நீங்கள் பார்த்திருப்பீர்கள். இதைவிடச் சிறந்தது என்ன வேண்டும்? அதற்காகத்தான் நீங்கள் விளையாடுகிறீர்கள். இது ஒரு சிறந்த தருணம், சிறந்த பயணம், ஒரு அணியாக எங்களுக்கு ஒரு சிறந்த தொடர்" என்று கூறினார்.

இறுதிப் போட்டியில், 147 ரன்கள் என்ற இலக்கைத் துரத்திய இந்திய அணி, திலக் வர்மாவின் (53 பந்துகளில் 69* ரன்கள்) அபாரமான ஆட்டத்தால், 5 விக்கெட் வித்தியாசத்தில் பாகிஸ்தானை வீழ்த்தி ஆசிய கோப்பையை 9வது முறையாக வென்றது குறிப்பிடத்தக்கது.