IND vs PAK: இந்தியாவுக்கு எதிராக பாபர் அசாம் டி20 போட்டிகளில் அடித்த ரன்கள் எவ்வளவு? இவ்வளவு தானா?

கொழும்பு: டி20 உலகக் கோப்பை 2026 தொடரின் குரூப் ஏ பிரிவில் இந்தியா, பாகிஸ்தான் போட்டி வரும் பிப்ரவரி 15 ஞாயிற்றுக்கிழமை கொழும்புவில் நடைபெறுகிறது. இந்தப் போட்டியில் பாகிஸ்தான் அணியின் முக்கிய வீரராக முன்னாள் கேப்டன் பாபர் அசாம் களமிறங்க உள்ளார். பாபர் அசாம், டி20 கிரிக்கெட்டில் அபாயகரமான வீரராக இல்லை என்றாலும், சில நேரம் கடினமான ஆடுகளங்களில் அபாரமாக பேட்டிங் செய்து அணியை பெற வைப்பதில் வல்லவர்.

டி20 சர்வதேச போட்டிகளில் அதிக ரன்கள் குவித்த வீரரான பாபர் அசாம், இந்த உலகக் கோப்பையில் பாகிஸ்தான் அணிக்காக இதுவரை விளையாடிய இரண்டு போட்டிகளிலும் 15 மற்றும் 46 ரன்கள் எடுத்துள்ளார். பிப்ரவரி 10 அன்று கொழும்பில் அமெரிக்காவுக்கு எதிரான போட்டியில் சிறப்பாக விளையாடிய அவர், நெதர்லாந்துக்கு எதிரான முதல் ஆட்டத்தில் மெதுவாக விளையாடியதற்காக விமர்சிக்கப்பட்டார்.

அண்மை காலமாக தடுமாறினாலும், இந்தியாவுக்கு எதிரான போட்டியில் பாகிஸ்தான் அணியில் பாபர் அசாம் நிச்சயம் இடம் பெறுவார். அவரது பேட்டிங் செயல்திறனே இந்தப் போட்டியின் முடிவைத் தீர்மானிக்கும் என எதிர்பார்க்கப்படுகிறது.

இதுவரை இந்தியாவுக்கு எதிராக நடைபெற்றுள்ள எட்டு டி20 உலகக் கோப்பை போட்டிகளில் பாகிஸ்தான் ஒரே ஒரு முறை மட்டுமே வென்றுள்ளது. அந்த வெற்றிப் போட்டியில், பாபர் அசாம் ஆட்டமிழக்காத ஒரு அரைசதம் விளாசினார். எனவே, இம்முறையும் பாபர் அசாமிடமிருந்து ஒரு பெரிய இன்னிங்ஸை பாகிஸ்தான் ரசிகர்கள் பெரிதும் எதிர்பார்க்கின்றனர்.

இந்திய கிரிக்கெட் அணிக்கு எதிராக பாபர் அசாம் இதுவரை ஐந்து டி20 சர்வதேச போட்டிகளில் களமிறங்கியுள்ளார். இந்தப் போட்டிகளில் ஒரு அரைசதம் உட்பட மொத்தமாக 105 ரன்களை அவர் குவித்துள்ளார். இந்தியாவுக்கு எதிராக அவரது பேட்டிங் சராசரி 26.25 ஆகவும், ஸ்ட்ரைக் ரேட் 128.04 ஆகவும் உள்ளது. அவர் அடித்த அதிகபட்சம் 68* ரன்களாகும்.

ஒட்டுமொத்த டி20 சர்வதேச போட்டிகளில் பாபர் அசாம் இதுவரை 141 ஆட்டங்களில் பங்கேற்று, 3 சதம் மற்றும் 39 அரைசதங்கள் உட்பட 4566 ரன்கள் குவித்து, 39.36 சராசரி மற்றும் 128.29 ஸ்ட்ரைக் ரேட் வைத்துள்ளார். அவரது அதிகபட்ச தனிப்பட்ட ஸ்கோர் 122 ஆகும். மொத்தமாக 475 பவுண்டரிகளையும் 80 சிக்ஸர்களையும் அவர் விளாசியுள்ளார்,

துபாயில் அக்டோபர் 24, 2021 அன்று, இந்தியாவுக்கு எதிராக தனது முதல் டி20 சர்வதேசப் போட்டியில் பாபர் அசாம் களமிறங்கினார். இந்தப் போட்டியில், 152 ரன்கள் இலக்கை துரத்தும்போது, பாபர் அசாம் 52 பந்துகளில் 68 ரன்கள் எடுத்து ஆட்டமிழக்காமல் களத்தில் நின்றார்.அவரது அபாரமான பேட்டிங்கால் பாகிஸ்தான் அணி இந்தியாவை 10 விக்கெட் வித்தியாசத்தில் வீழ்த்தி, பாகிஸ்தான் கிரிக்கெட் ரசிகர்கள் கொண்டாடும் ஒரு மறக்க முடியாத வெற்றியைப் பதிவு செய்தது.

ஆனால், அந்த வரலாற்றுச் சிறப்புமிக்க வெற்றிக்குப் பிறகு, இந்தியாவுக்கு எதிராக பாபரின் ஆட்டம் எதிர்பார்த்த அளவுக்கு பிரகாசிக்கவில்லை. 2022 ஆசியக் கோப்பை தொடரில் பாகிஸ்தான் அணி இந்தியாவை இருமுறை சந்தித்தது. இந்த இரு போட்டிகளிலும் பாபர் அசாம் முறையே 9 பந்துகளில் 10 ரன்களும், 10 பந்துகளில் 14 ரன்களும் மட்டுமே எடுத்து ஏமாற்றினார்.

அதே ஆண்டில், 2022 அக்டோபர் 23 அன்று மெல்போர்னில் நடைபெற்ற 2022 டி20 உலகக் கோப்பையின் மற்றொரு பரபரப்பான இந்தியா-பாகிஸ்தான் மோதலில், அர்ஷ்தீப் சிங் பந்துவீச்சில் பாபர் அசாம் முதல் பந்திலேயே கோல்டன் டக் ஆகி வெளியேறினார்.பாபர் அசாம், கடைசியாக 2024 ஜூன் 9 அன்று நியூயார்க்கில் இந்தியாவுக்கு எதிராக விளையாடினார். 2024 டி20 உலகக் கோப்பை குரூப் ஏ பிரிவில் நடந்த அந்தப் போட்டியில், பாகிஸ்தான் அணி 120 ரன்கள் என்ற சிறிய இலக்கை துரத்திக்கொண்டிருந்தது.

அச்சமயத்தில், இந்திய அணியின் முன்னணி வேகப்பந்து வீச்சாளர் ஜஸ்பிரித் பும்ராவால் 10 பந்துகளில் 13 ரன்கள் எடுத்து ஆட்டமிழந்து வெளியேறினார். இது பாகிஸ்தான் வெற்றி வாய்ப்பை பெரிதும் பாதித்தது.கடந்த ஆண்டு ஆசியக் கோப்பை தொடரில் இந்தியா மூன்று முறை பாகிஸ்தானை எதிர்கொண்டது. ஆனால் அந்த முக்கியத் தொடரில் பாகிஸ்தான் அணியில் பாபர் அசாம் இடம்பெறவில்லை என்பது குறிப்பிடத்தக்கது.