இந்தியா - தென்னாப்பிரிக்கா முதல் டெஸ்ட்.. 5 நாட்களில் மழை வருமா? கொல்கத்தா வானிலை அறிக்கை

கொல்கத்தா: இந்தியா மற்றும் தென்னாப்பிரிக்கா அணிகளுக்கு இடையேயான டெஸ்ட் தொடரின் முதல் போட்டி, கொல்கத்தாவின் புகழ்பெற்ற ஈடன் கார்டன் மைதானத்தில் வெள்ளிக்கிழமை (நவம்பர் 14) தொடங்குகிறது. இந்த முக்கியப் போட்டிக்கு மழையால் பாதிப்பு ஏற்படுமா என்ற கவலை ரசிகர்களிடையே எழுந்த நிலையில், அது குறித்த வானிலை அறிக்கை வெளியாகி உள்ளது. அது கிரிக்கெட் ரசிகர்களுக்குப் பெரும் மகிழ்ச்சியை அளித்துள்ளது.

சுப்மன் கில் தலைமையிலான இந்திய அணி, டெஸ்ட் கிரிக்கெட்டில் சமீப காலமாகச் சிறந்த ஃபார்மில் உள்ளது. இங்கிலாந்துக்கு எதிரான ஆண்டர்சன்-டெண்டுல்கர் டிராபியைச் சமன் செய்த இந்திய அணி, அதைத் தொடர்ந்து வெஸ்ட் இண்டீஸ் அணியை 2-0 என்ற கணக்கில் அதன் சொந்த மண்ணில் வீழ்த்தி நம்பிக்கையுடன் களமிறங்குகிறது.

மறுபுறம், நடப்பு உலக டெஸ்ட் சாம்பியனான தென்னாப்பிரிக்க அணி, பாகிஸ்தானுக்கு எதிரான கடினமான தொடரை 1-1 எனச் சமன் செய்து, மிகுந்த தன்னம்பிக்கையுடன் இந்தியாவை எதிர்கொள்கிறது.

கொல்கத்தா வானிலை அறிக்கை

கிரிக்கெட் ரசிகர்களுக்கு ஒரு பெரும் நற்செய்தியாக, கொல்கத்தாவில் அடுத்த ஐந்து நாட்களுக்கும் மழையின் குறுக்கீடு இருக்காது என்று வானிலை ஆய்வு மையம் தெரிவித்துள்ளது. எனவே, ஐந்து நாட்களும் முழுமையான, தடையற்ற ஆட்டத்தைக் காணலாம்.

போட்டியின் ஐந்து நாட்களிலும் வானம் தெளிவாக இருக்கும். காலை நேரங்களில் லேசான பனிமூட்டம் காணப்படும் என்றாலும், நேரம் செல்லச் செல்ல வானம் தெளிவாகிவிடும். வெப்பநிலையைப் பொறுத்தவரை, காலை நேரங்களில் குறைந்தபட்சம் 18 டிகிரி செல்சியஸாகவும், மதிய நேரங்களில் அதிகபட்சமாக 30 டிகிரி செல்சியஸாகவும் இருக்கும் என எதிர்பார்க்கப்படுகிறது. காற்றின் ஈரப்பதம் சுமார் 60 முதல் 70 சதவீதம் வரை பதிவாகும்.

ஐந்து நாட்களும் கிரிக்கெட் விளையாடுவதற்கு மிகவும் உகந்த சூழல் நிலவும். தெளிவான வானிலை நிலவுவதால், இரு பலம் வாய்ந்த அணிகளுக்கு இடையேயான இந்த முதல் டெஸ்ட் போட்டி, ரசிகர்களுக்கு ஒரு விறுவிறுப்பான கிரிக்கெட் விருந்தாக அமையும் என்பதில் சந்தேகமில்லை.

இரு அணி வீரர்கள் விவரம்:

இந்தியா: சுப்மன் கில் (கேப்டன்), ரிஷப் பண்ட் (விக்கெட் கீப்பர் & துணை கேப்டன்), யஷஸ்வி ஜெய்ஸ்வால், கே.எல். ராகுல், சாய் சுதர்சன், தேவ்தத் படிக்கல், துருவ் ஜுரெல், ரவீந்திர ஜடேஜா, வாஷிங்டன் சுந்தர், ஜஸ்பிரித் பும்ரா, அக்சர் படேல், முகமது சிராஜ், குல்தீப் யாதவ், ஆகாஷ் தீப்.

தென்னாப்பிரிக்கா: டெம்பா பவுமா (கேப்டன்), கார்பின் போஷ், டெவால்ட் பிரேவிஸ், டோனி டி சோர்ஸி, சுபைர் ஹம்சா, சைமன் ஹார்மர், மார்கோ ஜான்சன், கேசவ் மஹாராஜ், ஐடன் மார்க்ரம், வியான் முல்டர், செனுரன் முத்துசாமி, ககிசோ ரபாடா, ரியான் ரிக்கெல்டன், டிரிஸ்டன் ஸ்டப்ஸ் மற்றும் கைல் வெர்ரெய்ன்.