IND vs SA: இந்திய அணி இன்று எளிதில் வெல்லும்.. அபிஷேக் சர்மாவுக்கு அறிவுரை.. அஸ்வின் கருத்து

சென்னை: டி20 உலகக் கோப்பை 2026 போட்டியில், தாங்கள் எதிர்பார்த்த அளவு அபிஷேக் சர்மா செயல்படவில்லை என்று முன்னதாக, இந்திய வீரர் ரவிச்சந்திரன் அஸ்வின் தெரிவித்துள்ளார். இது தாங்களுக்கு ஏமாற்றம் அளிப்பதாகவும் அவர் கூறினார். உண்மையில், இடது கை பேட்ஸ்மேனான அபிஷேக், களமிறங்கிய மூன்று போட்டிகளிலும் அடுத்தடுத்து டக் அவுட்டாகி, இன்னும் ரன் கணக்கைத் திறக்கவில்லை.

போட்டிக்கு முன்னதாக அவரது சிறப்பான ஃபார்மை கருத்தில் கொண்டால், அபிஷேக்கின் இந்த தொடர் சொதப்பல் ஆச்சரியமளிப்பதாகவும், நம்ப முடியாததாகவும் இருப்பதாக அஸ்வின் குறிப்பிட்டார்.அபிஷேக்கின் மோசமான ஆட்டத்தால் சில கேள்விகள் எழுந்தாலும், அதை கேப்டன் சூர்யகுமார் யாதவ் சிறப்பாக கையாண்டிருப்பதாக அஸ்வின் பாராட்டினார்.

இது குறித்து பேசிய அஸ்வின், "அபிஷேக் ஷர்மா மிகுந்த ஃபார்முடன் வந்துள்ள வீரர், ஆனால் இன்னும் தனது ரன் கணக்கைத் தொடங்கவில்லை. இது மிகவும் ஆச்சரியமாகவும், நம்ப முடியாததாகவும் உள்ளது. களத்தில் அவரைத்தான் உன்னிப்பாக கவனிக்க வேண்டும் என்று கருதப்பட்டது. இதுபோன்ற திறமையான வீரர்கள் இந்தியாவில் பலர் உள்ளனர்.

அணியில் பலர் பெஞ்சில் அமர்ந்திருக்கும் நிலையில், அபிஷேக்கின் ஆட்டம் கேள்விக்குறியை எழுப்பியுள்ளது. ஆனால் சூர்யா இதை சிறப்பாக கையாண்டுள்ளார். இந்த ஆட்டத்தை அபிஷேக் தனக்கு நேரம் ஒதுக்கி, மீண்டும் ஃபார்முக்கு வர பயன்படுத்திக்கொள்ளலாம்" என்று கூறினார்.

பிப்ரவரி 22, ஞாயிற்றுக்கிழமை, அகமதாபாத்தில் உள்ள நரேந்திர மோடி மைதானத்தில் இந்தப் போட்டி நடைபெற உள்ளது. தென் ஆப்பிரிக்கா இந்த மைதானத்தில் பல முறை இலக்குகளைத் துரத்தி வெற்றி பெற்றுள்ளது என்பதை அஸ்வின் சுட்டிக்காட்டினார். இருப்பினும், முதலில் பேட்டிங் செய்வது இந்திய அணிக்குச் சாதகமாக இருக்கும் என அவர் தனது கருத்தை வெளிப்படுத்தினார்.

"சமீபத்திய நிகழ்வுகளைப் பார்க்கும்போது, பனி இல்லாத, முழுமையாக பேட்டிங் பிட்ச்சில் ஒரு நல்ல ஸ்கோரைத் துரத்துவது இந்தியாவுக்கு மிகப்பெரிய சவாலாக அமையலாம். இருப்பினும், அவர்களுக்கு ஒரு எக்ஸ் ஃபேக்டர் பந்துவீச்சு வரிசை உள்ளது, இது தனித்துவமாகத் தெரிகிறது." இந்தத் தொடரில் இதுவரை, இந்தியா முதலில் பேட்டிங் செய்து அனைத்து ஆட்டங்களிலும் வெற்றி பெற்றுள்ளது. அவர்கள் சேஸிங்கில் சோதனையை இன்னும் எதிர்கொள்ளவில்லை.

"இந்த ஆட்டத்தில் இந்தியா ஒருதலைப்பட்சமாக வெற்றி பெறும் என்று எதிர்பார்க்கலாம். ஆனால், தென் ஆப்பிரிக்கா பலம் வாய்ந்த அணி என்பதை உணர்ந்து கொஞ்சம் பதற்றத்துடனும் விளையாடுவார்கள். இந்த வடிவத்தில், அவர்கள் தங்கள் நாளில், எதிரணிக்கு அழுத்தத்தை கொடுக்க முடியும்," என்று அவர் குறிப்பிட்டார்.டி20 உலகக் கோப்பையில் இவ்விரு அணிகளும் இதுவரை ஏழு முறை மோதி உள்ளன. இதில் இந்தியா ஐந்து முறை வெற்றி பெற்று ஆதிக்கம் செலுத்தி வருகிறது, தென் ஆப்பிரிக்கா இரண்டு வெற்றிகளை மட்டுமே பெற்றுள்ளது.