IND vs SA: சூப்பர் 8 போட்டியில் இந்திய அணியின் பிளேயிங் 11.. ஒரே சிக்கல்.. அர்ஷ்தீப் vs குல்தீப்?

அகமதாபாத்: 2026 டி20 உலகக்கோப்பை தொடரின் சூப்பர் 8 சுற்றில் இந்திய அணி தனது முதல் போட்டியில் பலமான தென்னாப்பிரிக்காவை எதிர்கொள்கிறது. அகமதாபாத்தில் உள்ள நரேந்திர மோடி மைதானத்தில் நடைபெறும் இந்தப் போட்டியில், வெற்றிப் பயணத்தைத் தொடரும் முனைப்புடன் சூர்யகுமார் யாதவ் தலைமையிலான இந்திய அணி களமிறங்குகிறது.

லீக் சுற்றில் தாங்கள் விளையாடிய நான்கு போட்டிகளிலும் இந்திய அணி வெற்றி பெற்றுள்ளது. இருப்பினும், அமெரிக்கா, நமீபியா மற்றும் நெதர்லாந்து ஆகிய அணிகளுக்கு எதிரான போட்டிகளில் இந்திய அணியின் பேட்டிங் வரிசை சற்று தடுமாற்றத்தைச் சந்தித்தது. டாப் ஆர்டர் அல்லது மிடில் ஆர்டரில் சரிவுகள் இருந்தன. இனி வரும் சூப்பர் 8 சுற்றில் சிறிய தவறுகள் கூட அணியைத் தொடரை விட்டு வெளியேற்றும் அளவுக்குக் கொண்டு செல்லலாம் என்பதால், இந்திய அணி மிகுந்த எச்சரிக்கையுடன் செயல்பட வேண்டியுள்ளது.

ஆடும் லெவனில் மாற்றம் வருமா?

சூழ்நிலைக்கு ஏற்ப சரியான ஆடும் லெவனைத் தேர்வு செய்வதில் இந்திய அணி நிர்வாகம் கவனம் செலுத்தி வருகிறது. நெதர்லாந்து அணிக்கு எதிரான கடந்த லீக் போட்டியில் அக்சர் படேல் மற்றும் குல்தீப் யாதவ் ஆகியோருக்கு ஓய்வளிக்கப்பட்டு, வாஷிங்டன் சுந்தர் மற்றும் அர்ஷ்தீப் சிங் ஆகியோர் அணியில் சேர்க்கப்பட்டனர்.

அகமதாபாத் மைதானம் அக்சர் படேலின் உள்ளூர் மைதானம் என்பதால், அவர் மீண்டும் ஆடும் லெவனுக்குத் திரும்புவது கிட்டத்தட்ட உறுதியாகியுள்ளது. ஆனால், மற்றொரு பந்துவீச்சாளராக அர்ஷ்தீப் சிங்கைத் தொடரச் செய்வதா அல்லது குல்தீப் யாதவை மீண்டும் அணிக்குள் கொண்டு வருவதா என்ற குழப்பம் அணி நிர்வாகத்திடம் நிலவுகிறது.

தென்னாப்பிரிக்க அணிக்கு எதிராக இந்த இரு பந்துவீச்சாளர்களுமே சிறப்பான சாதனைகளை வைத்துள்ளனர். எனவே, ஆடுகளத்தின் தன்மையைப் பொறுத்தே இறுதி முடிவு எடுக்கப்படும். நெதர்லாந்துக்கு எதிரான போட்டியில் ஆடுகளம் சுழற்பந்து வீச்சுக்கு பெரிய அளவில் ஒத்துழைக்கவில்லை. இதனால் வேகப்பந்து வீச்சாளர் அர்ஷ்தீப் சிங் தனது இடத்தைத் தக்கவைத்துக் கொள்ளவே அதிக வாய்ப்புள்ளது. அதே சமயம், மிடில் ஓவர்களில் விக்கெட்டுகளை வீழ்த்தும் குல்தீப் யாதவின் திறமையும் அணி நிர்வாகத்தைப் பரிசீலிக்க வைக்கும்.

தென்னாப்பிரிக்க அணியின் நிலை

ஐக்கிய அரபு அமீரகத்திற்கு எதிரான சம்பிரதாய லீக் போட்டியில் தென்னாப்பிரிக்க அணி தங்களது முக்கிய வீரர்களுக்கு ஓய்வளித்து மாற்று வீரர்களைக் களமிறக்கியது. தற்போது சூப்பர் 8 சுற்று என்பதால், அந்த அணியின் முன்னணி வீரர்கள் மீண்டும் அணிக்குத் திரும்புகின்றனர். ஜேசன் ஸ்மித், ஜார்ஜ் லிண்டே, அன்ரிச் நோர்ட்ஜியா மற்றும் குவேனா மபாகா ஆகியோருக்குப் பதிலாக டேவிட் மில்லர், மார்கோ ஜான்சன், கேஷவ் மகாராஜ் மற்றும் லுங்கி நிகிடி ஆகியோர் ஆடும் லெவனில் இடம்பெறுவார்கள் என்று எதிர்பார்க்கப்படுகிறது.

கணிக்கப்பட்ட ஆடும் லெவன் விவரம்:

இந்திய அணி:

சூர்யகுமார் யாதவ் (கேப்டன்), அபிஷேக் சர்மா, இஷான் கிஷன் (விக்கெட் கீப்பர்), திலக் வர்மா, ஹர்திக் பாண்டியா, அக்சர் படேல், சிவம் துபே, ரிங்கு சிங், வருண் சக்கரவர்த்தி, ஜஸ்பிரித் பும்ரா, அர்ஷ்தீப் சிங் / குல்தீப் யாதவ்.

தென்னாப்பிரிக்க அணி:

எய்டன் மார்க்ரம் (கேப்டன்), குயின்டன் டி காக் (விக்கெட் கீப்பர்), ரியான் ரிக்கெல்டன், டெவால்ட் பிரேவிஸ், டேவிட் மில்லர், டிரிஸ்டன் ஸ்டப்ஸ், கார்பின் போஷ், மார்கோ ஜான்சன், காகிசோ ரபாடா, கேஷவ் மகாராஜ், லுங்கி நிகிடி.