சூர்யகுமார் வெளியே நடிக்கிறார்.. ஆனால் உள்ளே வலிக்கும்.. சாம்சன் குறித்து யோசிக்கலாம்- பொலாக்

மும்பை: தென் ஆப்பிரிக்காவுக்கு எதிரான மூன்றாவது டி20 போட்டியில் சஞ்சு சாம்சனை மீண்டும் இந்திய அணியில் சேர்க்க யோசிக்கலாம் என்று முன்னாள் வீரர் பொலாக் தெரிவித்துள்ளார். சண்டிகரில் நடந்த இரண்டாவது டி20 போட்டியில் 51 ரன்கள் வித்தியாசத்தில் இந்தியா தோல்வியடைந்த நிலையில், ஐந்து போட்டிகள் கொண்ட தொடர் 1-1 என சமநிலையை எட்டியுள்ளது.

இந்தியாவின் டாப் ஆர்டரில் சுப்மன் கில்லின் மோசமான டி20 ஃபார்ம் தொடர்கிறது. முதல் போட்டியில் 4 ரன்கள் எடுத்தவர், இரண்டாவது டி20யில் கோல்டன் டக் அவுட் ஆனார். ஆசிய கோப்பை தொடங்கியதிலிருந்து, சாம்சனுக்குப் பதிலாக கில்லே தொடக்க வீரராக களமிறங்குகிறார்.

கீழ்வரிசையில் ஆடிய சாம்சனின் இடத்தை, கடைசி ஐந்து போட்டிகளில் ஜிதேஷ் சர்மா விக்கெட் கீப்பராக மாறியுள்ளார்.சாம்சனை மீண்டும் சேர்ப்பது குறித்து பொல்லாக் பேசும்போது: "இது ஒரு பெரிய விவாதமாகி விடும் என்பதால், இப்போது அவர்கள் இதைச் செய்ய மாட்டார்கள். ஆனால் அடுத்தடுத்து டி20 போட்டியில் சாம்சனை கொண்டு வருவது குறித்து யோசிக்கலாம்."

"ஆனால் போட்டியில் வென்றபோது மாற்றாத அணி, தோற்றபோதும் மாற்றம் செய்ய கூடாது. இன்னும் ஒரு போட்டிதான், அதன் பிறகு மாற்றம் குறித்து சிந்திக்கலாம். ஒருவேளை ஹர்ஷித் ராணாவுக்கு ஒரு வாய்ப்பு கிடைக்கலாம். அர்ஷ்தீப் நிறைய ஒருநாள் போட்டிகளில் விளையாடியுள்ளதால், ஹர்ஷித் அவருக்குப் பதிலாக இடம்பிடிக்கலாம்."

"சூர்யாவின் ஃபார்முக்கு, சில சமயங்களில் ஒரு இடைவெளி தேவைப்படும். அல்லது அவர் பேட்டிங் வரிசையில் கீழ் இறங்கி சிறிது காலம் வேறு ஒரு பங்கை எடுத்துக்கொள்ள வேண்டும். திலக் வர்மாவை மூன்றாவது இடத்திற்கும், வேறு ஒருவரை நான்காவது இடத்திற்கும், ஒருவேளை ஹர்திக்கிற்கு ஐந்தாவது இடத்திற்கும் கொண்டு வரலாம். இதன் மூலம் பினிஷராக வர முயற்சி செய்யலாம் என்றும் அவர் விளக்கினார்.

"வெளியிலிருந்து பார்க்கும்போது, சூர்யாவுக்கு எப்போதுமே அதிக தன்னம்பிக்கை இருப்பதாகத் தோன்றும். ஐபிஎல்லிலோ, இந்திய அணிக்காக விளையாடும்போது பார்ப்பதாகவோ, அவருடன் பேசும்போதோ, அவர் தன்னம்பிக்கையை வெளிப்படுத்துவார். அவர் தற்போது மனதளவில் சோர்வாக உணர்ந்திருக்க வேண்டும்."

"அணியின் பின்னால் பவுண்டரி லைன் அருகே புன்னகைப்பதை நீங்கள் கண்டாலும், அது உள்ளுக்குள் அவருக்கு வலிக்கிறது." என்றும் பொல்லாக் குறிப்பிட்டார்.2025 ஆம் ஆண்டில், 19 டி20 போட்டிகளில், சூர்யா சராசரியாக 14.35 ரன்கள் மட்டுமே எடுத்துள்ளார்; அவரது ஸ்ட்ரைக் ரேட் 126.41. 2024 ஆம் ஆண்டு சீசனிலும் அவர் எதிர்பார்த்த அளவுக்கு சிறப்பாக இல்லை. அந்த ஆண்டு 18 டி20 போட்டிகளில், சூர்யா 27 ரன்களுக்கும் குறைவாகவே சராசரியாக எடுத்தார்.