தென் ஆப்பிரிக்க அணியில் முக்கிய பவுலர் நீக்கம்.. 2வது டெஸ்ட் அணியில் சேர்க்கப்பட்ட லுங்கி இங்கிடி

கவுஹாத்தி: இந்திய அணிக்கு எதிரான டெஸ்ட் தொடரின் இரண்டாவது மற்றும் கடைசி டெஸ்ட் போட்டியில், தென் ஆப்பிரிக்காவின் நட்சத்திர வேகப்பந்து வீச்சாளர் ககிசோ ரபாடா காயம் காரணமாக விலகியுள்ளார். அவருக்குப் பதிலாக, மற்றொரு அனுபவ வேகப்பந்து வீச்சாளரான லுங்கி இங்கிடி அணியில் சேர்க்கப்பட்டுள்ளார். இந்த மாற்றம், தொடரைச் சமன் செய்யப் போராடும் இந்திய அணிக்கு மேலும் ஒரு சவாலாக அமைந்துள்ளது.

கொல்கத்தாவில் நடந்த முதல் டெஸ்ட் போட்டியின் போதே, விலா எலும்புப் பகுதியில் ஏற்பட்ட காயம் காரணமாக ரபாடாவால் களமிறங்க முடியவில்லை. தற்போது, அவர் இரண்டாவது டெஸ்ட் போட்டியிலிருந்தும் முழுமையாக விலகியுள்ளதை தென் ஆப்பிரிக்க கிரிக்கெட் வாரியம் உறுதி செய்துள்ளது. இதையடுத்து, மாற்று வீரராக லுங்கி இங்கிடி அவசரமாக அணிக்கு அழைக்கப்பட்டுள்ளார்.

கொல்கத்தா ஈடன் கார்டன்ஸ் மைதானத்தில் நடந்த முதல் டெஸ்ட் போட்டியில், ரபாடாவின் பங்களிப்பு இல்லாமலேயே தென் ஆப்பிரிக்க அணி 30 ரன்கள் வித்தியாசத்தில் அபார வெற்றி பெற்றது குறிப்பிடத்தக்கது. சுழற்பந்து வீச்சுக்குச் சாதகமான அந்த ஆடுகளத்தில், தென் ஆப்பிரிக்கச் சுழற்பந்து வீச்சாளர் சைமன் ஹார்மர் இரண்டு இன்னிங்ஸ்களிலும் தலா நான்கு விக்கெட்டுகளை வீழ்த்தி வெற்றிக்கு முக்கியப் பங்காற்றினார்.

குறிப்பாக, 124 ரன்கள் என்ற எளிய இலக்கைத் துரத்திய இந்திய அணியை, தனது சுழலால் வெறும் 93 ரன்களுக்குச் சுருட்டினார் ஹார்மர். இந்த வெற்றியின் மூலம், தென் ஆப்பிரிக்கா இரண்டு போட்டிகள் கொண்ட தொடரில் 1-0 என முன்னிலை வகிக்கிறது.

டெஸ்ட் அணிக்குத் திரும்பும் இங்கிடி

29 வயதான லுங்கி இங்கிடி, கடைசியாக ஜூன் 2025-ல் லார்ட்ஸ் மைதானத்தில் ஆஸ்திரேலியாவுக்கு எதிராக நடந்த உலக டெஸ்ட் சாம்பியன்ஷிப் இறுதிப் போட்டியில் தென் ஆப்பிரிக்காவுக்காக விளையாடினார். அந்தப் போட்டியின் இரண்டாவது இன்னிங்ஸில் அவர் மூன்று முக்கிய விக்கெட்டுகளை வீழ்த்தி அணியின் வெற்றிக்கு உதவினார்.

2018-ல் தனது டெஸ்ட் பயணத்தைத் தொடங்கிய இங்கிடி, இதுவரை 20 டெஸ்ட் போட்டிகளில் விளையாடி 58 விக்கெட்டுகளைக் கைப்பற்றியுள்ளார். அவரது வருகை, தென் ஆப்பிரிக்காவின் வேகப்பந்து வீச்சுக்கு மேலும் பலம் சேர்க்கும் என எதிர்பார்க்கப்படுகிறது.

முதல் போட்டியில் அடைந்த அதிர்ச்சித் தோல்வியால், இந்திய அணி கடும் விமர்சனங்களைச் சந்தித்து வருகிறது. கேப்டன் சுப்மன் கில்லின் காயம், பேட்ஸ்மேன்களின் தடுமாற்றம் என பலவீனங்கள் வெளிச்சத்திற்கு வந்துள்ளன. இந்நிலையில், தொடரைச் சமன் செய்ய வேண்டிய கட்டாயத்தில் இந்திய அணி உள்ளது.

மறுபுறம், 15 ஆண்டுகளுக்குப் பிறகு இந்திய மண்ணில் ஒரு டெஸ்ட் போட்டியில் வெற்றி பெற்ற உற்சாகத்துடன் தென் ஆப்பிரிக்கா உள்ளது. இந்த நிலையில், ரபாடாவுக்குப் பதிலாக இங்கிடியை களமிறக்கி, தொடரை வென்று வரலாற்றுச் சாதனை படைக்கும் முனைப்பில் தென் ஆப்பிரிக்கா களமிறங்கும்.

இரு அணிகளுக்கும் இடையேயான இரண்டாவது மற்றும் கடைசி டெஸ்ட் போட்டி, நவம்பர் 22 முதல் 26 வரை கவுஹாத்தியில் உள்ள பர்சபாரா மைதானத்தில் நடைபெற உள்ளது.