IND vs SA: தமிழக வீரர் வருண் சக்கரவர்த்தி மாபெரும் சாதனை.. தொடர்ந்து 18 போட்டியில்... சோகத்திலும் ஒரு நல்லது

அகமதாபாத்: உலக தரவரிசையில் நம்பர் 1 டி20 பந்துவீச்சாளரான இந்திய அணியின் வருண் சக்கரவர்த்தி கிரிக்கெட் வரலாற்றில் புதிய சாதனை ஒன்றை படைத்துள்ளார். அகமதாபாத் நரேந்திர மோடி ஸ்டேடியத்தில் தென்னாப்பிரிக்காவுக்கு எதிராக நடைபெற்ற டி20 உலகக் கோப்பை சூப்பர் 8 போட்டியில் வருண் சக்கரவர்த்தி விளையாடினார்.

இப்போட்டியில் வருண், தனது நான்கு ஓவர்களில் 47 ரன்கள் கொடுத்து ஒரு விக்கெட்டை கைப்பற்றினார். அவரது நான்காவது ஓவரின் நான்காவது பந்தில், பெரிய ஷாட் அடிக்க முயன்ற தென்னாப்பிரிக்க வீரர் டேவிட் மில்லரை விக்கெட் வீழ்த்தினார். மில்லர் அடித்த பந்தை, திலக் வர்மா பவுண்டரி கோட்டின் அருகே லாவகமாக கேட்ச் பிடித்து ஆட்டமிழக்கச் செய்தார்.

ஆட்டமிழப்பதற்கு முன் டேவிட் மில்லர், 35 பந்துகளில் 7 பவுண்டரிகள் மற்றும் 3 சிக்ஸர்களுடன் 63 ரன்கள் குவித்து அசத்தினார். உலகின் மிகப்பெரிய கிரிக்கெட் மைதானமான நரேந்திர மோடி ஸ்டேடியத்தில் வீழ்த்தப்பட்ட இந்த மில்லரின் விக்கெட்தான், வருண் சக்கரவர்த்தியை அர்ஷ்தீப் சிங்கின் சாதனையை முறியடிக்க வழிவகுத்தது. இதன் மூலம் தொடர்ந்து 18 டி20 சர்வதேச போட்டிகளில் குறைந்தது ஒரு விக்கெட்டை வீழ்த்திய முதல் இந்தியர் என்ற பெருமையை அவர் பெற்றுள்ளார்.

அர்ஷ்தீப் சிங், ஜூன் 29, 2024 முதல் டிசம்பர் 9, 2025 வரை தொடர்ந்து 17 டி20 சர்வதேச போட்டிகளில் விக்கெட் எடுத்திருந்தார். வருண் சக்கரவர்த்தி, கடைசியாக செப்டம்பர் 21, 2025 அன்று இந்திய அணிக்காக டி20 போட்டியில் விக்கெட் எடுக்கத் தவறியிருந்தார். ஆனால், அதன் பிறகு அவர் களமிறங்கிய 18 டி20 சர்வதேச போட்டிகளில் மொத்தமாக 34 விக்கெட்டுகளை கைப்பற்றி, தனது சிறப்பான பந்துவீச்சு திறனை வெளிப்படுத்தியுள்ளார்.

தொடர்ந்து அதிக டி20 சர்வதேச போட்டிகளில் விக்கெட் எடுத்த இந்திய பந்துவீச்சாளர்கள் பட்டியலில் வருண் சக்கரவர்த்தி (2025-2026 காலகட்டத்தில் 18* போட்டிகள்) முதலிடம் பிடித்துள்ளார். இப்பட்டியலில், அவருக்கு அடுத்தபடியாக அர்ஷ்தீப் சிங் (2024-2025 காலகட்டத்தில் 17 போட்டிகள்), ஆஷிஷ் நெஹ்ரா (2016-ல் 13 போட்டிகள்), மீண்டும் வருண் சக்கரவர்த்தி (2024-2025 காலகட்டத்தில் 11 போட்டிகள்), வாஷிங்டன் சுந்தர் (2024-2025 காலகட்டத்தில் 11 போட்டிகள்) ஆகியோர் இடம்பெற்றுள்ளனர்.

வருண் சக்கரவர்த்தியிடம் விக்கெட்டை இழப்பதற்கு முன், டேவிட் மில்லர் ஒரு தனித்துவமான சாதனையை சமன் செய்தார். ஐசிசி ஆடவர் டி20 உலகக் கோப்பை போட்டிகளில் இந்தியாவுக்கு எதிராக அதிக ரன்கள் எடுத்த வீரர்களில் டேவிட் வார்னரின் சாதனையை மில்லர் எட்டினார். வார்னர் 5 போட்டிகளில் 166 ரன்கள் எடுத்திருந்த நிலையில், மில்லர் 4 போட்டிகளிலேயே 166 ரன்களைப் பெற்று இந்த மைல்கல்லை அடைந்தார்.