IND vs SL: படிக்கலுக்கு 2 கேட்ச் மிஸ்.. சதம் அடித்து அபாரம்.. பலமான நிலையில் இந்திய அணி

கொழும்பு: இலங்கைக்கு எதிரான இரண்டாவது டெஸ்ட் போட்டியின் முதல் நாள் ஆட்ட முடிவில், இந்திய அணி தனது முதல் இன்னிங்சில் 5 விக்கெட் இழப்பிற்கு 300 ரன்கள் குவித்துப் பலமான நிலையில் உள்ளது. கொழும்பு SSC மைதானத்தில் தொடங்கிய இப்போட்டியில், இந்திய இளம் வீரர் தேவ்தத் படிக்கல் அபாரமாக விளையாடி தனது இரண்டாவது தொடர்ச்சியான டெஸ்ட் சதத்தைப் பதிவு செய்தார்.

கர்நாடகாவைச் சேர்ந்த இடதுகை பேட்டரான படிக்கல் 117 ரன்கள் குவித்து இந்திய அணியின் முதுகெலும்பாகத் திகழ்ந்தார். மூன்றாவது விக்கெட்டுக்கு ஷுப்மன் கில்லுடன் 50 ரன்கள் இணைந்து 120 ரன்களும், நான்காவது விக்கெட்டுக்கு ரவீந்திர ஜடேஜாவுடன் 43 ரன்கள் இணைந்து 74 ரன்களும் சேர்த்து அணியை வலுவான நிலைக்கு இட்டுச் சென்றார்.

இலங்கை பந்துவீச்சில் அசிதா பெர்னாண்டோ 16 ஓவர்களில் 46 ரன்கள் மட்டுமே வழங்கி 3 விக்கெட்டுகளைக் கைப்பற்றி அசத்தினார். லஹிரு குமரா மற்றும் கேஷார நுவாந்தா தலா ஒரு விக்கெட் வீழ்த்தினர்.

IND vs SL: விராட் கோலி, ரோகித் கூட செய்யல.. கேப்டனாக சுப்மன் கில் மாபெரும் சாதனை

முதல் நாள் ஆட்டநேர முடிவில், துருவ் ஜுரெல் 7 ரன்களுடனும், அறிமுக வீரர் சாரண்ஷ் ஜெயின் 4 ரன்களுடனும் களத்தில் இருந்தனர். ஆட்டத்தின் கடைசி ஓவரில் அசிதா பெர்னாண்டோ வீசிய பந்தில் பவுண்டரி அடித்து சாரண்ஷ் ஜெயின் சர்வதேச டெஸ்ட் அரங்கில் தனது ரன் கணக்கைத் தொடங்கினார்.

போட்டியின் முதல் அமர்வில் இந்திய தொடக்க ஆட்டக்காரர்களான யஷஸ்வி ஜெய்ஸ்வால் மற்றும் கே.எல். ராகுல் ஆகியோர் நல்ல அடித்தளம் அமைத்துக் கொடுத்தாலும், சீரான இடைவெளியில் ஆட்டமிழந்தனர். தொடக்கத்தில் 0 மற்றும் 1 ரன்களில் இருந்தபோது படிக்கல் கொடுத்த இரண்டு கேட்ச் வாய்ப்புகளை இலங்கை வீரர்கள் நழுவவிட்டனர்.

இந்த அதிர்ஷ்டத்தைப் பயன்படுத்திக் கொண்ட படிக்கல், ஷுப்மன் கில்லுடன் இணைந்து அணியை மீட்டார். மதிய அமர்வில் ஆடுகளம் பேட்டிங்கிற்கு சாதகமாக மாறிய நிலையில், இருவரும் தங்களது அரைசதங்களைக் கடந்தனர். 120 ரன்கள் சேர்த்த இந்த ஜோடியை அசிதா பெர்னாண்டோ பிரித்தார்.

Also Read

IND vs SL: தேவ்தத் படிக்கல் தொடர்ந்து 2வது சதம்.. சச்சின், புஜாரா பட்டியலில் இணைந்து ரெக்கார்ட்

மாலையில் இலங்கை வேகப்பந்து வீச்சாளர் லஹிரு குமரா வீசிய பவுன்சர் பந்து ரிஷப் பந்தின் இடது மணிக்கட்டில் பலமாகத் தாக்கியதால், அவர் வலியால் துடித்து 'ரிட்டையர்ட் ஹர்ட்' முறையில் மைதானத்தை விட்டு வெளியேற வேண்டியதாயிற்று. இதேபோல், இடது கையில் ஏற்பட்ட தசைப்பிடிப்பு வலியுடன் போராடிய ரவீந்திர ஜடேஜாவும், கடைசி கட்டத்தில் அசிதா பெர்னாண்டோவின் பந்தில் போல்டாகி 43 ரன்களுக்கு வெளியேறினார். எனினும், இந்திய அணி ரன் ரேட்டை 3.5-க்கு மேல் தக்கவைத்து, முதல் நாளில் 300 ரன்களை எட்டி ஆட்டத்தை தன்வசப்படுத்தியுள்ளது.