IND vs SL: முதல் டெஸ்ட்டில் வெற்றி ஈஸியாக கிடைக்கல.. வானத்தை பார்த்து கொண் விளையாடினோம்.. ராகுல்

காலே: முதல் டெஸ்ட் போட்டியில் இந்திய அணி 165 ரன்கள் வித்தியாசத்தில் இலங்கையை வீழ்த்தி அபார வெற்றி பெற்றது. எனினும், இந்த வெற்றி எளிதாகக் கிடைத்த ஒன்றாகத் தோன்றினாலும், ஆட்டம் மிகவும் சவாலாக இருந்தது என்று இந்திய அணியின் துணை கேப்டன் கே.எல். ராகுல் தெரிவித்துள்ளார்.

போட்டியின் கடைசி கட்டத்தில் மானவ் சுதர், இலங்கை வீரர் கேசர நுவன்தாவை வீழ்த்தி தனது 10 விக்கெட் சாதனையை நிறைவு செய்து இந்தியாவின் வெற்றியை உறுதி செய்தார். அவர் விக்கெட்டை வீழ்த்திய சில நிமிடங்களிலேயே அங்கு பலத்த மழை பெய்யத் தொடங்கியது.

போட்டி முழுவதும் மழை அச்சுறுத்தல் இருந்த போதிலும், இரண்டாவது பகுதியில் மானவ் சுதர் ஒரே ஓவரில் மூன்று விக்கெட்டுகளை வீழ்த்தியதன் மூலம் இந்தியா 1-0 என்ற கணக்கில் தொடரில் முன்னிலை பெற்றுள்ளது.வானத்தில் கார்மேகங்கள் சூழ்ந்திருந்ததால், தங்களின் வெற்றி மழையினால் பாதிக்கப்படலாம் என்று இந்திய அணி கவலைப்பட்டது. தங்களுக்குள் இருந்த பதற்றம் குறித்து கே.எல். ராகுல் பகிர்ந்து கொண்டுள்ளார்.

"உண்மையாகவே எங்களுக்குப் பெரிய நிம்மதி கிடைத்துள்ளது. மேலே இருக்கும் மேகங்களை நாங்கள் தொடர்ந்து கவனித்துக் கொண்டே இருந்தோம். ஒரு பெரிய மழை வரப்போகிறது என்பது எங்களுக்குத் தெரியும், எனவே ஆட்டத்தை தாமதப்படுத்த நாங்கள் விரும்பவில்லை. விக்கெட்டுகளை எவ்வளவு விரைவாக வீழ்த்த முடியுமோ, அவ்வளவு விரைவாக வீழ்த்த முயன்றோம்," என்று இந்திய அணி வெற்றி பெற்ற பிறகு ராகுல் கூறினார்.

"அவர்கள் சிறந்ததொரு பார்ட்னர்ஷிப்பை அமைத்திருந்தனர். அந்த கூட்டணியை உடைத்தவுடன் நாங்கள் மீண்டும் ஆட்டத்திற்குள் வந்ததாக உணர்ந்தோம். அவர்களின் பேட்ஸ்மேன்கள் களமிறங்கியதும் விக்கெட்டுகளை விரைவாக வீழ்த்த முடியும் என்று எங்களுக்குத் தெரியும். இருப்பினும், எங்களின் ஒரு கண் வானத்தின் மீதே இருந்தது," என்று ராகுல் விவரித்தார்.

வெற்றி வித்தியாசம் பெரியதாக இருந்தாலும், இந்த டெஸ்ட் போட்டி மிகவும் கடினமானதாக இருந்தது என்று கூறிய ராகுல், ஐந்து நாட்களும் பிட்ச் சிறப்பாகச் செயல்பட்டதாகக் குறிப்பிட்டார். ஸ்பின்னர்களுக்குச் சாதகமாக இருந்த அதே வேளையில், பொறுமையுடன் விளையாடிய பேட்ஸ்மேன்களும் ரன்களைக் குவிக்க முடிந்தது என்று அவர் தெரிவித்தார்.

இலங்கை வீரர் சோனல் தினுஷாவின் சிறப்பான ஆட்டத்தையும் அவர் பாராட்டினார். இரு இன்னிங்ஸ்களிலும் முறையே சதம் மற்றும் 80 ரன்கள் விளாசிய தினுஷா, ஸ்பின்னர்களை எதிர்கொள்வதில் தெளிவான திட்டத்தைக் கொண்டிருந்ததாகக் குறிப்பிட்டார். இரு அணிகளுக்கும் இடையிலான இரண்டாவது டெஸ்ட் போட்டி ஆகஸ்ட் 23 முதல் கொழும்பில் தொடங்கவுள்ளது.