IND vs SL: சதம் அடித்தாலும் இடம் உறுதி கிடையாது.. படிக்கல்லுக்கு ரஹானே தந்த வார்னிங்

மும்பை: இலங்கைக்கு எதிரான இரண்டாவது டெஸ்ட் போட்டிக்கான இந்திய அணியின் பிளேயிங் லெவன் குறித்து இந்திய அணியின் முன்னாள் பேட்ஸ்மேன் அஜிங்கியா ரஹானே தனது கருத்துக்களைப் பகிர்ந்துள்ளார். இப்போட்டி கொழும்பில் உள்ள SSC மைதானத்தில் ஆகஸ்ட் 23, ஞாயிற்றுக்கிழமை அன்று தொடங்க உள்ளது.

இந்த போட்டியில் தேவ்தத் படிக்கல் தொடர்ந்து இந்திய அணியின் மூன்றாவது வரிசை பேட்ஸ்மேனாக களமிறங்குவார் என்று ரஹானே கணித்துள்ளார். இருப்பினும், அணியில் தனது இடத்தை அவர் சாதாரணமாக எடுத்துக்கொள்ளக் கூடாது என்றும், அவரும் இதே போன்ற சிந்தனையோடுதான் இருப்பார் என்றும் ரஹானே தெரிவித்துள்ளார்.

"ஒரு மூத்த வீரர் வெளியில் சென்றிருக்கும் போது, அவருக்குப் பதிலாக விளையாடும் படிக்கல் ரன்கள் குவித்தால், அந்த மூத்த வீரர் மீண்டும் அணிக்கு திரும்பும்போது படிக்கல் தனது இடத்தை இழக்க நேரிடும். ஆனால் தற்போதைய நிலையில், சாய் சுதர்சனுக்கும் டெஸ்ட் கிரிக்கெட்டில் அதிக அனுபவம் இல்லை. எனவே, இந்திய அணி மூன்றாவது வரிசையில் படிக்கலைத் தொடரவே விரும்பும் என்று நினைக்கிறேன்.

ஆனால் எதையும் சாதாரணமாக எடுத்துக்கொள்ள முடியாது, தேவ்தத் மனதிலும் இது இருக்கும். சுதர்சனும் ஒரு தரமான வீரர், அவர் தொடர்ந்து சிறப்பாக செயல்பட முயற்சிப்பார்" என்று ரஹானே தனது யூடியூப் சேனலில் வெளியிட்ட வீடியோவில் தெரிவித்துள்ளார்.முதலாவது டெஸ்ட் போட்டியில் சாய் சுதர்சனுக்குப் பதிலாக களமிறங்கிய தேவ்தத் படிக்கல், தனது சிறப்பான ஆட்டத்தின் மூலம் அணியில் தனது இடத்தை தற்காலிகமாக உறுதிப்படுத்தியுள்ளார்.

"தற்போதைக்கு அவர் மூன்றாவது வரிசையில் விளையாடுவார் என்று நம்புகிறேன். ஒரு பேட்ஸ்மேன் ரன்கள் எடுப்பதோடு மட்டும் அல்லாமல், அவர் அதை எவ்வாறு எடுக்கிறார் என்பதையும் நாம் பார்க்க வேண்டும். படிக்கலின் ஃபுட் வொர்க் மிகவும் துல்லியமாக இருந்தது. அவர் காட்டிய தன்னம்பிக்கை பந்துவீச்சாளர்களை நிலைபெற விடவில்லை. இத்தகைய ஆடுகளங்களில் மூன்றாவது வரிசை பேட்ஸ்மேன் ஆதிக்கம் செலுத்துவது மிகவும் முக்கியம். இது அணிக்கு ஒரு நல்ல அறிகுறி" என்று ரஹானே தெரிவித்துள்ளார்.