IND vs SL: டெஸ்ட் கிரிக்கெட் அழிந்து வருகிறது.. இளைஞர்கள் டி20 பக்கம் செல்கின்றனர்.. வாஸ் வேதனை

கொழும்பு: டி20 லீக் போட்டிகளின் ஆதிக்கம் அதிகரித்து வரும் தற்போதைய கிரிக்கெட் உலகில், டெஸ்ட் கிரிக்கெட் தனது முக்கியத்துவத்தை இழந்து வருகிறது என்று இலங்கையின் முன்னாள் வேகப்பந்து வீச்சாளர் சமிந்தா வாஸ் தெரிவித்துள்ளார். இதற்கு கிரிக்கெட் வாரியங்கள் காலம் கடந்து போவதற்குள் உரிய நடவடிக்கை எடுக்க வேண்டும் என்று சமிந்தா வாஸ் வலியுறுத்தியுள்ளார்.

தனது சர்வதேச கிரிக்கெட் வாழ்க்கையில் 111 டெஸ்ட் போட்டிகளில் விளையாடி 355 விக்கெட்டுகளை வீழ்த்தியுள்ள வாஸ், எதிர்காலத்தில் டி20 வடிவமே கிரிக்கெட்டின் மிகப்பெரிய அங்கமாக இருக்கும் என்று கூறியுள்ளார். இருப்பினும், வீரர்களின் திறமைகளை வளர்ப்பதற்கும் சோதிப்பதற்கும் அவசியமாக விளங்கும் டெஸ்ட் மற்றும் ஒருநாள் போட்டிகளை கிரிக்கெட் வாரியங்கள் பாதுகாக்க வேண்டும் என்று அவர் கூறியுள்ளார்.

இது குறித்து பேசிய அவர், "எதிர்காலத்தில் பெரும்பாலான நாடுகள் டி20 போட்டிகளில் விளையாடவே விரும்பும் என்று நான் நினைக்கிறேன். டி20 தான் எதிர்காலத்திற்கான ஆட்டம். ஆனால், டெஸ்ட் கிரிக்கெட்டும் ஒருநாள் கிரிக்கெட்டும் தான் இந்த விளையாட்டின் முன்னோடிகள் என்பதை அனைத்து வாரியங்களும் உணர்ந்து, இந்த இரண்டு வடிவங்களையும் பாதுகாக்க வேண்டும்" என்று சதெரிவித்தார்.

ஒருநாள் போட்டிகளில் 400 விக்கெட்டுகளையும், டெஸ்ட் போட்டிகளில் 355 விக்கெட்டுகளையும் வீழ்த்திய வாஸ், பாரம்பரிய கிரிக்கெட் வடிவங்களை பாதுகாக்க அனைத்து கிரிக்கெட் வாரியங்களும் இணைந்து செயல்பட வேண்டும் என்று கூறினார்.

"50 ஓவர் கிரிக்கெட்டை உயிர்ப்புடன் வைத்திருக்க நாம் ஏதேனும் ஒரு திட்டத்தை வகுக்க வேண்டும். இது பல இளம் கிரிக்கெட் வீரர்களை டெஸ்ட் அல்லது 50 ஓவர் போட்டிகளில் விளையாட ஊக்குவிக்கும் என்பதில் எனக்கு உறுதியுள்ளது. குறிப்பாக டெஸ்ட் கிரிக்கெட்டைப் பொறுத்தவரை, அது தற்போது அழிந்து வருகிறது. டெஸ்ட் கிரிக்கெட்டை உயிர்ப்புடன் வைத்திருக்கவும், இளம் வீரர்களுக்கு அதிக வாய்ப்புகளை வழங்கவும் அனைத்து வாரியங்களும் ஒரு திட்டத்தை வைத்திருக்க வேண்டும். ஏனெனில், இங்குதான் உங்களது உண்மையான திறமை சோதிக்கப்படும்," என்று அவர் கூறினார்.