IND vs SL டெஸ்ட் தொடர்: 3 வீரர்கள் சிறப்பாக செயல்பட்டும் வாய்ப்பு தராத தேர்வுக்குழு

மும்பை: ஆகஸ்ட் மாதம் நடைபெறவுள்ள இலங்கை அணிக்கு எதிரான இரண்டு போட்டிகள் கொண்ட டெஸ்ட் தொடருக்கான இந்திய கிரிக்கெட் அணி அறிவிக்கப்பட்டுள்ளது. 2025-27 உலக டெஸ்ட் சாம்பியன்ஷிப் சைக்கிளில் இறுதிப்போட்டிக்கு தகுதி பெறுவதற்கு இத்தொடர் இந்திய அணிக்கு மிகவும் முக்கியமானதாகும்.

ஆப்கானிஸ்தான் தொடரில் சிறப்பான ஆட்டத்தை வெளிப்படுத்திய அதே பேட்டிங் வரிசை இதிலும் தொடரும் என எதிர்பார்க்கப்படுகிறது. இருப்பினும், உள்நாட்டுப் போட்டிகளில் அபாரமாகச் செயல்பட்டும் இந்தத் தொடருக்கான இந்திய அணியில் வாய்ப்பு கிடைக்காத மூன்று துரதிர்ஷ்டவசமான வீரர்களைப் பற்றி இங்கு பார்ப்போம்.

1. ஹர்ஷ் துபே
ஐபிஎல் 2026 சீசனுக்குப் பிறகு அனைத்து வகை கிரிக்கெட் போட்டிகளுக்கும் முதன்முறையாக இந்திய அணிக்கு அழைக்கப்பட்ட இடதுகை சுழற்பந்து வீச்சாளரான ஹர்ஷ் துபே, தற்போது டெஸ்ட் அணியில் இருந்து நீக்கப்பட்டுள்ளார். ஆப்கானிஸ்தானுக்கு எதிரான டெஸ்டில் அறிமுகமாகும் வாய்ப்பை சக இடதுகை சுழற்பந்து வீச்சாளர் மானவ் சுதரிடம் இழந்த அவர், தற்போது ரவீந்திர ஜடேஜாவின் வருகையால் அணியில் தனது இடத்தை இழந்துள்ளார்.வாஷிங்டன் சுந்தரின் காயம் காரணமாக அணியில் ஏற்பட்ட காலி இடத்திற்கு, தேர்வு குழுவினர் சரண்ஷ் ஜெயினைத் தேர்வு செய்தனர்.

2. ஆகிப் நபி
2025-26 ரஞ்சி கோப்பையில் மிகச்சிறந்த பந்துவீச்சை வெளிப்படுத்திய போதிலும், ஆகிப் நபிக்கு இந்திய அணியில் இன்னும் வாய்ப்பு கிடைக்கவில்லை. இந்திய அணியில் பும்ரா, சிராஜ், பிரசித் கிருஷ்ணா, குர்னூர் பிரார் ஆகிய நான்கு வேகப்பந்து வீச்சாளர்கள் தேர்வு செய்யப்பட்டுள்ளனர். பும்ராவின் உடற்தகுதி குறித்த சந்தேகங்கள் இன்னும் முழுமையாக விலகாத நிலையிலும், ஆகிப் நபிக்கு முதன்மை 15 பேர் கொண்ட அணியில் இடம் அளிக்கப்படவில்லை.

3. சர்பராஸ் கான்

இந்திய அணியில் நீண்ட போராட்டத்திற்குப் பிறகு நுழைந்த சர்பராஸ் கான், 2024 இறுதிக்குப் பிறகு மீண்டும் அணியில் சேர்க்கப்படாமல் தொடர்ந்து புறக்கணிக்கப்பட்டு வருகிறார். சுப்மன் கில் தலைமையிலான புதிய அணியில் நிரந்தர இடத்தை பிடிக்க இயலவில்லை. வெள்ளை பந்து கிரிக்கெட்டிலும் தனது ஆட்டத்திறனை மேம்படுத்தியுள்ள சர்பராஸ், ரஞ்சி கோப்பை 2025-26 தொடரில் 7 போட்டிகளில் விளையாடி 53.62 சராசரியுடன் 429 ரன்கள் குவித்துள்ளார்.

ஜிம்பாப்வே தொடரில் இந்திய அணி வென்றாலும், பெரிய குறை இருக்கிறது.. பெரிய அணிக்கு எதிராக தோல்வி தான்

இலங்கை டெஸ்ட் தொடருக்கான இந்திய அணி: சுப்மன் கில் (கேப்டன்), கே.எல். ராகுல் (துணை கேப்டன்), யஷஸ்வி ஜெய்ஸ்வால், ரிஷப் பந்த் (விக்கெட் கீப்பர்), சாய் சுதர்சன், துருவ் ஜூரல் (விக்கெட் கீப்பர்), ரவீந்திர ஜடேஜா, குல்தீப் யாதவ், மானவ் சுதர், ஜஸ்பிரித் பும்ரா, முகமது சிராஜ், பிரசித் கிருஷ்ணா, குர்னூர் பிரார், தேவ்தத் படிக்கல், சரண்ஷ் ஜெயின்.