IND vs WI: ஸ்ரேயாஸ் ஐயர் இடத்தில் எந்த வீரர்கள் விளையாடுவார்கள்? 3 பேருக்கு வாய்ப்பு

மும்பை: வெஸ்ட் இண்டீஸிற்கு எதிரான வரவிருக்கும் மூன்று போட்டிகள் கொண்ட ஒருநாள் தொடரின் போது, இந்திய ஒருநாள் அணியில் சில முக்கிய வீரர்கள், ஆசிய போட்டிகளில் விளையாட உள்ளனர். திருவனந்தபுரத்தில் வரும் ஞாயிற்றுக்கிழமை தொடங்கவிருக்கும் இந்த ஒருநாள் தொடரில், கேப்டன் சுப்மன் கில்லுக்கு ஸ்ரேயாஸ் ஐயர், ஜஸ்பிரித் பும்ரா மற்றும் அக்சர் படேல் ஆகியோரின் சேவைகள் கிடைக்காது.

ஸ்ரேயாஸ் ஐயர் இல்லாதது இந்திய பேட்டிங் வரிசையின் நடுப்பகுதியில் ஒரு பெரும் வெற்றிடத்தை ஏற்படுத்துகிறது. இந்தச் சவாலை அணி நிர்வாகம் எதிர்கொள்ள வேண்டும். வலது கை பேட்டரான ஸ்ரேயாஸ் ஐயர், நீண்ட காலமாக 4-வது இடத்தில் விளையாடி வருகிறார். குறைந்தபட்சம் 2027 ஒருநாள் உலகக் கோப்பை வரை அவரே இந்தியாவின் முதல் தேர்வாகவும் இருக்கிறார்.

இந்த சூழ்நிலையில், வெஸ்ட் இண்டீஸிற்கு எதிரான 2026 ஒருநாள் தொடரில் ஸ்ரேயாஸ் ஐயர் இல்லாதபோது, இந்திய அணியில் 4-வது இடத்தில் களமிறங்கக்கூடிய 3 வீரர்களைப் பற்றி இங்கு பார்ப்போம்.

IND vs JPN: ஜப்பானை ஏமாற்றி வென்றோம் என சொல்வதா? ஆகாஷ் சோப்ரா காட்டம்

1. ருதுராஜ் கெய்க்வாட்

கடந்த முறை காயம் காரணமாக ஸ்ரேயாஸ் ஐயர் இல்லாத போது, ருதுராஜ் கெய்க்வாட் பேட்டிங் வரிசையில் 4-வது இடத்தில் களமிறங்கி அனைவரையும் கவர்ந்தார். பொதுவாக டாப்-ஆர்டரில் விளையாடும் ருதுராஜ், தென் ஆப்பிரிக்காவிற்கு எதிரான தொடரில் ஆச்சரியமளிக்கும் வகையில் 4-வது இடத்தில் களமிறக்கப்பட்டார்.

ஆனால் அந்த சவாலை அவர் சிறப்பாகக் கையாண்டார். ராய்ப்பூரில் நடைபெற்ற இந்தத் தொடரின் இரண்டாவது போட்டியில் தனது முதல் ஒருநாள் சதத்தை விளாசி, தனக்கு கிடைத்த அரிய வாய்ப்பை ருதுராஜ் மிகச் சரியாகப் பயன்படுத்திக் கொண்டார். விராட் கோலியுடன் ஜோடி சேர்ந்த அவர், ரன் ரேட்டை உயர்த்துவதில் சிறப்பாகச் செயல்பட்டு நடு ஓவர்களில் ஆதிக்கம் செலுத்தினார்.

நியூசிலாந்து மற்றும் இங்கிலாந்து அணிகளுக்கு எதிரான போட்டிகளில் இடம்பெறாத ருதுராஜ் கெய்க்வாட், தற்போது மீண்டும் ஒருநாள் அணிக்குத் திரும்பியுள்ளார். எனவே, இந்தத் தொடரில் காலியாக உள்ள 4-வது இடத்தில் விளையாட அவரே முதன்மையான தேர்வாக இருப்பார்.

2. சுப்மன் கில்

இந்திய அணி கேப்டன் கில் 4-வது இடத்தில் களமிறங்குவது என்பது முற்றிலும் ஒரு தற்காலிக பரிசோதனை முயற்சியாகும். ஏனெனில், சமீபத்திய ஆண்டுகளில் மிகவும் வெற்றிகரமான ஒருநாள் தொடக்க ஆட்டக்காரர்களில் ஒருவராக இருக்கும் அவர், ரோஹித் சர்மாவுடன் இணைந்து சிறந்த ஆட்டத்தை வெளிப்படுத்தியுள்ளார். இருப்பினும், கேப்டன் கில் தனது பேட்டிங் வரிசையை 4-வது இடத்திற்கு இறக்கிக் கொண்டால், அது யஷஸ்வி ஜெய்ஸ்வால் தொடக்க வீரராக விளையாட வழிவகுக்கும்.

ஆப்கானிஸ்தானுக்கு எதிரான ஒருநாள் தொடரில் விராட் கோலி இல்லாதபோது, சுப்மன் கில் தன்னை 3-வது இடத்திற்கு இறக்கிக் கொண்டார் என்பது குறிப்பிடத்தக்கது. 2027 ஒருநாள் உலகக் கோப்பைக்கான தயாரிப்புப் பணிகளில் இந்தியா தற்போதே ஈடுபட்டுள்ளதால், மாற்றுத் தொடக்க ஆட்டக்காரரான ஜெய்ஸ்வாலுக்கு போதுமான விளையாடும் நேரத்தை வழங்க வேண்டிய கட்டாயம் உள்ளது. இங்கிலாந்து சுற்றுப்பயணத்தில் நீக்கப்பட்ட பிறகு, சமீபத்தில் தான் ஜெய்ஸ்வால் மீண்டும் ஒருநாள் அணிக்குத் திரும்பியுள்ளார்.

மேலும், சுப்மன் கில் தொடக்க ஆட்டக்காரராக நீண்ட நேரம் விளையாடும் போது தசைப்பிடிப்பு மற்றும் கழுத்து வலி போன்ற பிரச்சினைகளை எதிர்கொண்டு வருகிறார். எனவே, ஸ்ரேயாஸ் ஐயர் இல்லாத இந்த தருணம், இந்தியா புதிய பேட்டிங் கலவையை சோதித்துப் பார்க்க ஒரு நல்ல வாய்ப்பை வழங்குகிறது.

3. துருவ் ஜூரல்

ஒருநாள் போட்டிகளில் கே.எல். ராகுலை அவரது வழக்கமான இடத்திலிருந்து மாற்ற அணி நிர்வாகம் விரும்பவில்லை என்றும், ரவீந்திர ஜடேஜா பேட்டிங் வரிசையில் முன்னிலைப்படுத்தப்பட வாய்ப்பில்லை என்றும் வைத்துக் கொண்டால், துருவ் ஜூரலை 4-வது இடத்தில் இறக்கிப் பரிசோதிக்க இந்தியாவுக்கு நல்ல வாய்ப்பு உள்ளது. 25 வயதான துருவ் ஜூரல் ஒருநாள் அணியில் இடம் பிடித்துள்ளார். அவர் ஒரு மாற்று விக்கெட் கீப்பராக அறியப்பட்டாலும், 4-வது இடம் உட்பட எந்தவொரு இடத்திலும் சிறப்பாக விளையாடக்கூடிய திறமை கொண்டவர்.

விஜய் ஹசாரே டிராபி 2025-26 மற்றும் ஐபிஎல் 2026 தொடர்களில் 3-வது வரிசையில் களமிறங்கி அசத்திய அவர், வெள்ளைப் பந்து கிரிக்கெட்டில் தொடர்ந்து சிறப்பான ஃபார்மில் உள்ளார். கொழும்பில் இலங்கைக்கு எதிராக நடந்த இரண்டாவது டெஸ்ட் போட்டியில் அபார சதம் அடித்த துருவ் ஜூரல், தற்போது நல்ல பார்மில் உள்ளார். விக்கெட் கீப்பர்-பேட்டரான ஜூரலை வெள்ளைப் பந்து போட்டிகளுக்கான திட்டங்களுக்குள் கொண்டு வர இந்தியா விரும்பினால், வரவிருக்கும் வெஸ்ட் இண்டீஸ் தொடர் அதற்கு ஒரு சிறந்த வாய்ப்பாக இருக்கும்.

Also Read

இந்திய அணி பேட்டிங் மோசமாக இருக்கிறது.. பவுலிங் பிட்சில் சுத்தமாக ஆட தெரியல.. வசீம் ஜாபர்

இதைத் தவிர, நிதிஷ் குமார் ரெட்டி மற்றும் நமன் திர் ஆகியோரையும் இந்த இடத்தில் இந்தியா சோதித்துப் பார்க்கலாம். இவர்கள் இருவரும் உள்நாட்டு மற்றும் ஃபிரான்சைஸ் கிரிக்கெட்டில் நடுவரிசையில் விளையாடி நல்ல ஃபார்மில் உள்ளவர்கள் என்பது குறிப்பிடத்தக்கது.