IND vs WI: 4வது டி20 தோல்விக்கு காரணம் அபிஷேக் சர்மாவா? ஹனுமா விகாரி காட்டம்

ஐதராபாத்: வெஸ்ட் இண்டீஸ் அணிக்கு எதிரான நான்காவது டி20 போட்டியில் இந்திய அணி தோல்வியடைந்த நிலையில், தொடக்க ஆட்டக்காரர் அபிஷேக் சர்மாவிற்கு ஆதரவாக இந்திய கிரிக்கெட் வீரர் ஹனுமா விஹாரி குரல் கொடுத்துள்ளார். ஹைதராபாத்தில் நடைபெற்ற இந்தப் போட்டியில் 248 ரன்கள் என்ற கடினமான இலக்கை துரத்திய இந்திய அணி 223 ரன்கள் மட்டுமே எடுத்து 24 ரன்கள் வித்தியாசத்தில் தோல்வியடைந்தது.

இப்போட்டியில் 24 பந்துகளில் 29 ரன்கள் மட்டுமே எடுத்த அபிஷேக் சர்மாவின் மெதுவான ஆட்டம் விமர்சனத்திற்குள்ளானது. இருப்பினும், அபிஷேக் சர்மாவை ஹனுமா விஹாரி ஆதரித்துப் பேசியுள்ளார். பவர்பிளே ஓவர்களில் அவருக்கு அதிக பந்துகளைச் சந்திக்க வாய்ப்பு கிடைக்காததே அவரது தடுமாற்றத்திற்கு காரணம் என்று அவர் குறிப்பிட்டுள்ளார்.

இது குறித்து தனது யூடியூப் சேனலில் பேசிய விஹாரி, "அபிஷேக் சர்மாவினால்தான் இந்திய அணி தோற்றது என்று பலர் கூறலாம். ஆனால் அதை நான் ஏற்றுக்கொள்ள மாட்டேன். பவர்பிளே ஓவர்களில் அவருக்குப் போதிய பந்துகள் கிடைக்கவில்லை. ஒரு தொடக்க ஆட்டக்காரருக்கு பவர்பிளே ஓவர்களில்தான் ஆட்டத்தின் வேகமும் லயமும் கிடைக்கும்.

IND vs WI: பேட்ஸ்மேன்கள் பொறுப்பேற்கவில்லை என்றால் இனியும் தோல்வி நிச்சயம்.. கவாஸ்கர் தாக்கு

அங்கிருந்துதான் மிடில் ஓவர்களில் அதைத் தொடர முடியும். பவர்பிளேவில் போதிய பந்துகளைச் சந்திக்காமல் மிடில் ஓவர்களில் அதிரடியாக பவுண்டரிகளை அடிப்பது எளிதல்ல. எனவே அவர் மீது எந்தத் தவறும் இல்லை" என்று தெரிவித்தார்.

அபிஷேக் சர்மா சோபிக்கத் தவறினாலும், இந்திய அணி கடைசி வரை போட்டியில் நீடித்ததாக விஹாரி தெரிவித்தார். கடைசி கட்டத்தில் போராடிய திலக் வர்மா மற்றும் நிதிஷ் குமார் ரெட்டி ஆகியோரின் ஆட்டத்தை அவர் வெகுவாகப் பாராட்டினார். திலக் வர்மா 25 பந்துகளில் 43 ரன்களும், நிதிஷ் குமார் ரெட்டி 20 பந்துகளில் 41 ரன்களும் குவித்தனர்.

"இந்திய அணியிடம் தேவையான அதிரடி இருந்தது. கடைசி 3 ஓவர்களில் 48 ரன்கள் தேவைப்பட்டபோதும் திலக் மற்றும் நிதிஷ் மீது நம்பிக்கை இருந்தது. தோல்வி அடைந்திருந்தாலும், இருவரின் ஆட்டமும் இந்திய அணிக்கு ஒரு சிறந்த நேர்மறையான விஷயமாகும். இந்த ஆடுகளத்தில் 248 ரன்கள் என்பது சராசரி ஸ்கோரை விட 20 ரன்கள் அதிகம்" என்று விஹாரி கூறினார்.

இந்திய பந்துவீச்சாளர்களை விட வெஸ்ட் இண்டீஸ் பந்துவீச்சாளர்கள் சிறப்பாகச் செயல்பட்டதாக விஹாரி சுட்டிக்காட்டினார். இந்திய பந்துவீச்சாளர்கள் மெதுவான பந்துகளை சரியாக வீசத் தவறினர் என்றும், வெஸ்ட் இண்டீஸ் பந்துவீச்சாளர்கள் பந்தின் வேகத்தை மாற்றி வீசியதுடன், திட்டமிட்டு துல்லியமாக யார்க்கர்களை வீசியதாகவும் அவர் கூறினார்.

"ஸ்ரேயாஸ் ஐயருக்கு ஆஃப் ஸ்டம்பிற்கு வெளியே வீசியது, இஷான் கிஷனுக்கு டீப் மிட்-விக்கெட்டில் ஃபீல்டரை நிறுத்தியது என வெஸ்ட் இண்டீஸ் அணி தங்களது திட்டங்களைச் சரியாகச் செயல்படுத்தியது. மோட்டி அடுத்தடுத்து விக்கெட்டுகளை வீழ்த்தினார். அனைத்தும் அவர்களுக்குச் சாதகமாக அமைந்தது" என்று அவர் விவரித்தார்.

Also Read

IND vs NZ: ஒருநாள், டி20 தொடரில் பும்ரா வேண்டாம்.. டெஸ்ட் தொடர் தான் முக்கியம்.. தேர்வுக்குழு முடிவு

இந்தத் தொடர் தற்போது இறுதிப் போட்டியான ஐந்தாவது டி20 போட்டிக்கு நகர்ந்துள்ளது. சொந்த மண்ணில் தொடரை இழப்பதைத் தவிர்க்க இந்திய அணியும், வரலாற்றுச் சாதனை படைக்க வெஸ்ட் இண்டீஸ் அணியும் கடைசி போட்டியில் தீவிரமாகப் போராடும்.